पिंपळेश्वर मंदिराची जमीन अखेर मंदिरालाच; मुख्यमंत्री फडणवीस यांची घोषणा !!

पिंपळेश्वर मंदिराची जमीन अखेर मंदिरालाच; मुख्यमंत्री फडणवीस यांची घोषणा !!

डोंबिवली, संदीप शेंडगे : महसूल आणि उद्योग विभागाच्या सकारात्मक सहकार्यामुळे पिंपळेश्वर महादेव मंदिराचा प्रलंबित जमीनप्रश्न अखेर मार्गी लागला आहे. सोमवारी रात्री डोंबिवलीत झालेल्या जाहीर कार्यक्रमात मुख्यमंत्री देवेंद्र फडणवीस यांनी संपूर्ण जमीन पिंपळेश्वर महादेवाला समर्पित करण्याचा निर्णय जाहीर केला.

“पिंपळेश्वर महादेवाच्या मंदिरासाठी सुरू असलेल्या प्रदीर्घ संघर्षाला आज पूर्णविराम मिळाला असून यात सर्व महादेव भक्तांचा विजय झाला आहे,” असे मुख्यमंत्री फडणवीस म्हणाले.

कार्यक्रमापूर्वी मुख्यमंत्र्यांच्या हस्ते मंदिरात विधीवत महापूजा झाली आणि भक्त मंडळाच्या वतीने त्यांचा भव्य सत्कार करण्यात आला. यावेळी राज्याचे उद्योगमंत्री उदय सामंत, खासदार डॉ. श्रीकांत शिंदे, आमदार रवींद्र चव्हाण, किसन कथोरे, कुमार आयलानी, सुलभा गायकवाड, राजेश मोरे, माजी खासदार कपिल पाटील, कल्याण-डोंबिवली महापालिका आयुक्त अभिनव गोयल, मंदिराचे विश्वस्त आणि हजारो भाविक उपस्थित होते.

मुख्यमंत्री म्हणाले, “उपमुख्यमंत्री एकनाथ शिंदे, उपमुख्यमंत्री सुनेत्रा पवार आणि मंत्रिमंडळातील सर्व सहकाऱ्यांच्या प्रयत्नांमुळे हे पवित्र कार्य पूर्ण झाले. मात्र आम्ही केवळ निमित्तमात्र आहोत. जे कार्य करायचे असते ते महादेवच करवून घेतात. या यशाचे संपूर्ण श्रेय भगवान महादेवालाच जाते.”

पिंपळेश्वर मंदिराला मोठा ऐतिहासिक वारसा लाभला असून तोच सुवर्ण इतिहास पुन्हा प्राप्त करून देण्याचे काम शासन करणार असल्याची ग्वाही त्यांनी दिली. खासदार डॉ. श्रीकांत शिंदे आणि आमदार रवींद्र चव्हाण यांनी मांडलेल्या मंदिर परिसराच्या विकासाच्या सर्व मागण्या प्राधान्याने पूर्ण केल्या जातील, असेही त्यांनी स्पष्ट केले.

कार्यक्रमात भाजपा प्रदेशाध्यक्ष रवींद्र चव्हाण यांनी मंदिरासाठी झालेल्या आंदोलनाचा इतिहास सांगितला, तर खासदार डॉ. श्रीकांत शिंदे यांनी लोकसभा क्षेत्रातील पुढील विकास आराखडा मांडला.