कल्याणातील बुद्धभूमी फाऊंडेशन वादावर खासदार शिंदे आक्रमक; विशेष चौकशी समितीची मागणी !

कल्याणातील बुद्धभूमी फाऊंडेशन वादावर खासदार शिंदे आक्रमक; विशेष चौकशी समितीची मागणी !

कल्याण, संदीप शेंडगे : कल्याणातील बुद्धभूमी फाऊंडेशनच्या जागेचा वाद चिघळत असताना खासदार डॉ. श्रीकांत शिंदे यांनी फाऊंडेशनच्या मागण्यांना सकारात्मक प्रतिसाद दिला आहे. कल्याण डोंबिवली महानगरपालिकेचे आयुक्त अभिनव गोयल यांच्या दालनात झालेल्या बैठकीनंतर खासदार शिंदे यांनी या प्रकरणाची विशेष समिती स्थापन करून चौकशी करण्याची मागणी मनपा आयुक्तांकडे केली आहे.

खासदार शिंदे यांनी आपल्या निवेदनात १० प्रमुख मागण्या केल्या आहेत:

१. या प्रकरणाची चौकशी करण्यासाठी विशेष चौकशी समिती (ST) स्थापन करावी.  

२. बुद्धभूमी फाऊंडेशन आणि विवादित जमिनीचा सातबारा व नावनोंदणीबाबत उचित तपासणी करून कार्यवाही करावी.  

३. जमिनीसंदर्भात दिलेल्या हस्तांतरणीय विकास हक्क (TDR) बाबत समिती गठीत करून तपासून कायदेशीर कारवाई करावी.  

४. उड्डाणपुलाच्या अलाइनमेंटबद्दल पुनर्निरीक्षण करून फाऊंडेशनची मागणी तपासावी.  

५. येथे विपश्यना केंद्र, शैक्षणिक केंद्र किंवा समाजोपयोगी रुग्णालय, शाळेसाठी सविस्तर प्रकल्प अहवाल (DPR) तयार करण्याबत तपासून कार्यवाही करावी.  

६. जमिनीचे आरक्षण बदलण्याबत तपासून शासनाकडे प्रस्ताव सादर करावा.  

७. उड्डाणपुलाच्या नावाबत फाऊंडेशनची मागणी तपासून शासनास प्रस्ताव सादर करावा.  

८. संरक्षण भिंत आणि पोहोच रस्ता बांधण्याबत फाऊंडेशनच्या मागणीची तपासणी करून कार्यवाही करावी.  

९. जमीन भूसंपादन आणि नुकसान भरपाईबाबत जिल्हाधिकारी स्तरावर चौकशी करून कार्यवाही करावी.  

१०. ३० मे रोजीच्या कारवाईदरम्यान कोणतेही बेकायदेशीर कृत्य झाले असल्यास त्याची चौकशी करून संबंधितांवर कायदेशीर कारवाई करावी.

बुद्धभूमी फाऊंडेशनच्या मागण्यांना न्याय देण्याच्या दृष्टीने खासदार शिंदे यांच्या या आक्रमक भूमिकेमुळे प्रकरणाला आता गती मिळण्याची शक्यता आहे.