सोमवारपासून निर्बंधात शिथीलता ! "आरोग्यमंत्री राजेश टोपे" यांची घोषणा..

सोमवारपासून निर्बंधात शिथीलता ! "आरोग्यमंत्री राजेश टोपे" यांची घोषणा..

मुंबई : आरोग्यमंत्री राजेश टोपे यांनी राज्यातील २५ जिल्ह्यांमध्ये निर्बंध शिथिल करण्याची घोषणा केल्याने उत्साहाचा श्रावण व्यावसायिकांसाठी तसेच व्यवसायावर उपजीविका करणाऱ्या कर्मचाऱ्यांसाठी उत्साह घेऊन येणार आहे.

मागील वर्षी मार्चपासून लॉकडाऊनची घोषणा झाली. त्यानंतर टप्प्या-टप्प्याने विविध व्यवसायाला सरकारने परवानगी दिली. परंतु, परवानगी दिल्यानंतर निर्बंधाची वेसण घातली होती. यात शिथिलता येईल, या आशेवर व्यापारी, लहान-मोठे दुकानदार होते.

राज्य सरकारने निर्बंध हटविण्यासाठी वेगवेगळ्या लेवल जाहीर केल्या. काही जिल्हात तिसऱ्या लेवलनुसार दुकाने रात्री आठपर्यंत तर हॉटेल्स रात्री दहापर्यंत सुरू करण्यात आले होते. परंतु, हा आनंद केवळ आठवडाभरच टिकला.

आठवड्याभरातच डेल्टा प्लस रुग्णाच्या वाढीमुळे दुकाने, हॉटेल्सच्या वेळा चारपर्यंत करण्यात आला. काही जिल्हात पॉझिटिव्हिटी दर खाली असूनही निर्बंधात शिथिलता आणली जात नसल्याने राज्यातील व्यापाऱ्यांत चांगलाच असंतोष निर्माण झाला होता. आता उच्चस्तरीय अधिकाऱ्यांकडूनही सकारात्मक चिन्हे मिळाली. त्यानंतर व्यापारी, दुकानदारांनाही निर्बंध शिथिल होण्याचे वेध लागले होते.

गुरुवारी सायंकाळी त्यांच्या कानावर आरोग्यमंत्री राजेश टोपे यांची घोषणा पडली अन् चेहऱ्यावर उत्साह दिसून आला. निर्बंधात शिथिलतेचा अंतिम प्रस्ताव सहीसाठी मुख्यमंत्री उद्धव ठाकरेंकडे पाठवण्यात आला असून, मुख्यमंत्र्यांच्या मान्यतेनंतर त्यावर १ ते २ दिवसांमध्ये जीआर निघेल असेही आरोग्यमंत्र्यांनी स्पष्ट केले. त्यामुळे सोमवारपासून निर्बंधात शिथिलता येण्याची शक्यता असून व्यावसायिक, लहान मोठे दुकानदारांच्या आशा पल्लवित झाल्या.

निर्बंध कायम असलेले ११ जिल्हे यात सध्या अस्तित्वात असलेले निर्बंध कायम राहणार आहेत. पश्चिम महाराष्ट्रातील पुणे, सोलापूर, सांगली, सातारा, कोल्हापूर हे जिल्हे, कोकणातील रायगड, सिंधुदुर्ग, रत्नागिरी, पालघर हे जिल्हे, मराठवाड्यातील बीड तर उत्तर महाराष्ट्रातील अहमदनगरमधील निर्बंध कायम राहणार आहेत.