नवीन वर्षाचे स्वागत करत २५६ रक्तदात्यांच्या निस्वार्थ रक्तदानाने अभूतपूर्व रक्तदान सोहळा उत्साहात संपन्न झाला !

नवीन वर्षाचे  स्वागत करत २५६ रक्तदात्यांच्या निस्वार्थ रक्तदानाने अभूतपूर्व  रक्तदान सोहळा उत्साहात संपन्न झाला !

मुंबई - निलेश कोकमकर 

            चालू वर्ष सरत आले की अनेकांना वेध लागेलेले असतात ते नवीन वर्षाच्या स्वागताची. वर्षाची सुरुवात कुठे तरी बाहेर सहलीला जाऊन, मित्रांसोबत दारू घेऊन बसून मनसोक्त आनंद घ्यायचा आणि नवीन वर्षाची सुरूवात करायची. त्याला अपवाद असे काही आहेत त्या मध्येच अग्रेसर आहेत ते म्हणजे रक्तदाते. त्यांना माहीत आहे की रक्त कुण्या कारखान्यात बनत नसतं ते शरिरातच निर्माण होत असतं आणि मानवी रक्तच माणसाला जीवनदान देऊ शकत, म्हणूनच  रक्तदान करून रुग्णाला जीवनदान देण्याचे महान कार्य हे रक्तदाताच करू शकतो. 

          युनिक ब्लड मोटिव्हेटर्स आणि रूग्ण कल्याण सेवा सामाजिक संस्था (रुग्णमित्र)  यांच्या संयुक्त विद्यमानाने आणि संडे फ्रेंड्स, रोटरी क्लब ऑफ चेंबूर, सत् करम फाउंडेशन, इनर व्हील क्लब ऑफ नॉर्थ ठाणे, श्री प्रतिष्ठान  - ठाणे, वेदांत फाऊंडेशन, मालवणचो कट्टो प्रतिष्ठान, ऋतेश चॅरिटेबल ट्रस्ट, भंडारी युवा फाऊंडेशन, सायन रुग्णालय रक्तपेढी यांच्या सहकार्याने आयोजित करण्यात आलेल्या रक्तदान सोहळा २०२५ ह्या सोहळ्यात  रुग्णांचा जीव वाचवण्यासाठी, त्यांच्या आयुष्यात हसू उमलण्यासाठी  निःस्वार्थ रक्तदानाची गरज असते  अश्या  २५६ रक्तदात्यांच्या उदंड प्रतिसादाने नवीन वर्षाचा पहिला दिवस रक्तदान करून जोशात साजरा  केला . 

        मुंबईतल्या सर्वच सरकारी हॉस्पिटलमध्ये संपूर्ण राज्यातून तसेच परराज्यातून गरीब , गरजू रुग्ण उपचारासाठी आलेले असतात, त्यांच्या अनेक शस्त्रक्रिया रक्ताविना थांबलेल्या असतात... अपघात , बाळंतपण, डायलेसिस रुग्ण, सिकलसेल रुग्ण, थेलेसेमीयाच्या रुग्णांना आणि अन्य शस्त्रक्रियांसाठी मोठ्या प्रमाणात रक्ताची गरज लागते. मुंबई सारख्या शहरात दररोज हजारोंच्या संख्येत रक्त युनिटची गरज लागत असते आणि त्या मानाने रक्त संकलन खूप कमी प्रमाणात होत असताना दिसते. आपलं रक्त अश्या खऱ्या गरजु रुग्णांपर्यंत विनामूल्य पोहचावे म्हणून शक्यतो सरकारी हॉस्पिटलमध्ये रक्तदान करावे आणि सरकारी हॉस्पिटलला रक्तदान शिबिर द्यावे असा आमचा आग्रह असतो.  तो ह्याच साठी सर्व रक्तदात्यांच्या प्रामाणिक प्रयत्नाने येत्या नवीन वर्षाची सुरुवात करत असतो. आणि इतर संस्थांना सुद्धा हेच सांगणे आहे कि रक्तदान शिबीराकडे कल वाढवला पाहिजे आणि रक्तदाते वाढवले पाहिजेत.   

        सोहळा यशस्वी पार पाडण्याचे सर्व श्रेय युनिक ब्लड मोटिव्हेटर्स व इतर सहकारी संस्थांना तसेच लोकमान्य टिळक रुग्णालयाचे स्टाफचे तसेच या कॅम्प करिता रात्रं दिवस मेहनत घेणाऱ्या सर्व सभासदांचे आहे. असे रक्तदान सोहळे निरंतर सुरु राहतील असा विश्वास सर्व संस्थांना आहे.