👇२४ तासांत ८६ हजारांपेक्षा अधिक रुग्णांची नोंद

👇२४ तासांत ८६ हजारांपेक्षा अधिक रुग्णांची नोंद

देशात करोनानं थैमान घातलं आहे. गेल्या काही दिवसांपासून करोनाबाधितांची संख्या मोठ्या प्रमाणात वाढत आहे. गेल्या दोन दिवसांमध्ये तर करोनाबाधितांच्या संख्येनं ८० हजारांचा टप्पा पार करत उच्चांक गाठल्याचं दिसून येतंय. दरम्यान, करोनाबाधितांच्या वाढत्या संख्येवरूनही विरोधकांनी सरकारवर निशाणा साधला आहे. “जर अन्य देश करोनावर नियंत्रण मिळवण्यास यशस्वी ठरले तर भारताला का यश मिळालं नाही,” असा सवाल माजी अर्थमंत्री पी. चिदंबरमजी यांनी पंतप्रधान नरेंद्र मोदी यांना केला आहे.“भारत हा जगातील एकमेव देश आहे ज्याला लॉकडाउनच्या रणनितीचा फायदा उठवता येत नाहीये असं दिसतंय. २१ दिवसांमध्ये करोनावर मात करू असं पंतप्रधान नरेंद्र मोदी यांनी आश्वासन दिलं होतं. परंतु अन्य देश जर यात यशस्वी झाले तर भारत का अयशस्वी झाला हे पंतप्रधानांनी सांगितलं पाहिजे,” असं चिदंबरमजी म्हणाले.मी भविष्यवाणी केली होती की ३० सप्टेंबरपर्यंत करोनाबाधितांची संख्या ५५ लाखांपर्यंत पोहोचेल. परंतु मी चुकीचा ठरतोय. भारत २० सप्टेंबरपर्यंतच त्या संख्येपर्यंत पोहोचेल. सप्टेंबरच्या अखेरिस ही संख्या ६५ लाखांपर्यंत पोहोचण्याची शक्यता असल्याचेही ते म्हणाले.

♦️२४ तासांत ८६ हजारांपेक्षा अधिक रुग्ण

देशातील एकूण करोनाबाधित रुग्णांची संख्या ४० लाखांच्या पुढे गेली आहे. गेल्या २४ तासांत देशात ८६ हजार ४३२ नवीन करोनाबाधित नव्या रुग्णांची नोंद करण्यात आली. ही आतापर्यंतची सर्वात मोठी वाढ आहे. महाराष्ट्रा, दिल्ली, गुजरात, तामिळनाडू, मध्यप्रदेश आणि पश्चिम बंगालमध्ये करोनाबाधित रुग्णांची संख्या वेगानं वाढत असल्याचं दिसत आहे. आरोग्य मंत्रालयानं दिलेल्या माहितीनुसार, मागील २४ तासांत देशात ८६ हजार ४३२ करोनाबाधित रुग्ण वाढले. त्यामुळे देशातील एकूण करोनाबाधित रुग्णांची संख्या ४० लाख २३ हजार १७९ इतकी झाली  आहे. दिलासादायक बाब म्हणजे आतापर्यत ३१ लाख ७ हजार २२३ जणांनी करोनावर मात केली आहे. ८ लाख ४६ हजार ३९५ करोनाबाधित रुग्णांवर सध्या उपचार सुरु आहेत.