रेल्वे प्रवासात मुंबईकरांचा मुखपट्टीला (मास्क)फाटा, "करोनाविषयक नियमांबाबत प्रवाशांची बेफिकिरी"!!
१४ दिवसांत ४६१८ जणांवर कारवाई........
मुंबई : सर्वसामान्यांसाठी उपनगरी रेल्वेसेवा सुरू होऊन १५ दिवस उलटतात न तोच करोना रुग्णांची संख्या वाढू लागल्यामुळे या रुग्णवाढीचा थेट संबंध लोकल प्रवासाशी जोडला जात आहे. लोकलमध्ये होणाऱ्या गर्दीमुळे अंतर नियमांचा फज्जा उडत असताना अनेक प्रवासी मुखपट्टी (मास्क) लावण्याच्या नियमाकडेही दुर्लक्ष करत आहेत.
गेल्या १५ दिवसांत मध्य आणि पश्चिम रेल्वे मार्गावर १४ हजार ५००हून अधिक रेल्वे प्रवाशांवर विनामुखपट्टी (मास्क) प्रवास करत असल्याबद्दल कारवाई करण्यात आली आहे.
मात्र तरीही मुंबईकर याबाबत बेपर्वा आहेत. सर्वसामान्य प्रवाशांसाठी १ फेब्रुवारीपासून लोकलचे दरवाजे मर्यादित वेळेसाठी उघडण्यात आले. सर्वानाच सकाळी ७ च्या आधी आणि दुपारी १२ ते दुपारी ४ आणि रात्री ७ नंतर लोकल प्रवासाची परवानगी देण्यात आली. हा पर्यायही अनेकांनी निवडला असून कार्यालयीन वेळाही त्याप्रमाणे बदलून घेतल्या. त्यामुळे प्रवासी संख्याही काहीशी वाढली आहे. परंतु ही संख्या वाढत असतानाच करोना प्रतिबंध नियमावलीकडे प्रवाशांनी दुर्लक्षच केले आहे.
अनेक प्रवाशी प्रवासादरम्यान मुखपट्टीचा (मास्क) वापर करीत नसल्याचे आढळले आहे. काही जण हनुवटीवर मुखपट्टी (मास्क)ठेवून सहकारी प्रवाशांसोबत गप्पांच्या फडात सहभागी होताना दिसतात. केवळ प्रवासा दरम्यानच नव्हे तर स्थानकात उतरल्यानंतरही ही मंडळी मुखपट्टीचा (मास्क) वापर करीत नाहीत. करोना संसर्गाचा धोका अद्याप टळलेला नाही. यामुळे मुखपट्टीचा (मास्क) वापर करून खबरदारी घेणाऱ्या प्रवाशांचे मुखपट्टीविना (मास्क) प्रवास करणाऱ्यांशी वाद होत आहेत.
विनामुखपट्टी (मास्क) प्रवास करणाऱ्यांबाबत मध्य आणि पश्चिम रेल्वे प्रशासन आणि स्थानिक यंत्रणांनीही कठोर पावले उचलण्यास सुरुवात केली आहे.
No comments:
Post a Comment