गुटखा विक्रीला अभय ! वरिष्ठ पोलीस निरीक्षकासह हवालदार अटकेत !

गुटखा विक्रीला अभय ! वरिष्ठ पोलीस निरीक्षकासह हवालदार अटकेत !

 

नवी मुंबई : नवी मुंबई गुन्हे शाखेच्या अमली पदार्थ विरोधी पथकाचे वरिष्ठ पोलीस निरीक्षक जयराज छापरीया व हवालदार इक्बाल शेख यांना 25 हजार रुपयांची लाच घेताना अ‍ॅन्टी करप्शनच्या पथकाने अटक करण्यात आली आहे. अमली पदार्थ विरोधी पथकाचे प्रमुख असतानाच त्यांनी गुटखा विक्री करण्यास अभय देण्यासाठी 40 हजार रुपयांची लाच मागितली होती. इक्बाल शेख याच्या माध्यमातून ही लाच मागण्यात आली होती. त्यात वरिष्ठांसाठी ७ हजार ५०० व स्वत:साठी ३२ हजार ५०० रुपये शेख याने मागितले होते.

संबंधित व्यापार्‍याने ठाणे लाच लुचपत प्रतिबंधक विभागाकडे तक्रार केली होती. त्यानंतर या तक्रारीची पडताळणी करण्यात आली.

त्यात तडजोड होऊन २५ हजार रुपये लाच देण्याचे ठरले. त्यानंतर लाच लुचपत प्रतिबंधक विभागाचे पोलीस अधीक्षक डॉ. पंजाबराव उगले यांच्या मार्गदर्शनाखाली पोलीस निरीक्षक मनोज प्रजापती, योगेश देशमुख यांच्या पथकाने सायंकाळी शेख याला 25 हजार रुपयांची लाच घेताना रंगेहाथ पकडले. अमली पदार्थ विरोधी पथकाचे वरिष्ठ पोलीस निरीक्षक जयराज छापरीया व शेख या दोघांवरही गुन्हा दाखल करुन अटक करण्यात आली आहे.