प्रारूप मतदान यादीतील मतदाराच्या नावांची पडताळणी करण्यासाठी आणि नवमतदारांची व दिव्यांगांची मतदार यादीत नोंदणी करण्यासाठी राजकीय पक्षांनी सहकार्य करावे ! "अतिरिक्त आयुक्त सुनिल पवार"

प्रारूप मतदान यादीतील मतदाराच्या नावांची पडताळणी करण्यासाठी आणि नवमतदारांची व दिव्यांगांची मतदार यादीत नोंदणी करण्यासाठी राजकीय पक्षांनी सहकार्य करावे ! "अतिरिक्त आयुक्त सुनिल पवार"

कल्याण : प्रारूप मतदान यादीतील मतदाराच्या नावांची पडताळणी करण्यासाठी आणि नवमतदार व दिव्यांगांची मतदार यादीत नोंदणी करण्यासाठी राजकीय पक्षांनी सहकार्य करावे असे उद्गार अतिरिक्त आयुक्त सुनील पवार यांनी आज महापालिका भवनात मतदार यादी विशेष संक्षिप्त पुनरीक्षण कार्यक्रमाच्या अनुषंगाने संपन्न झालेल्या राजकीय पक्षांच्या बैठकीत काढले.  सदर बैठक मतदार पुनरीक्षण कार्यक्रमाची माहिती नागरिकांपर्यंत/ मतदारांपर्यंत पोचण्याच्या अनुषंगाने  जनजागृती करणे कामी तसेच त्याबाबत अधिक माहिती सर्व पक्षांना अवगत करणे काम घेण्यात आली होती. दिनांक 1 नोव्हेंबर 2021 ते 30 नोव्हेंबर 2021 या काळात राबविल्या जाणाऱ्या या मतदार पुनरीक्षण अभियानात नवीन नाव नोंदविणे, नावे वगळणे, मतदाराचे नाव दुरुस्त करणे ही कामे करता येणार आहेत.   राजकीय पक्षांनी प्रारूप मतदार यादी जाहीर झाल्यावर त्याची आपल्या स्तरावर पडताळणी करून सहकार्य करावे असे आवाहन महापालिकेच्या अतिरिक्त आयुक्त सुनिल पवार यांनी यावेळी केले. प्रारुप मतदार यादी 1 नोव्हेंबर 2021 रोजी प्रसिद्ध करण्यात आली असून दिनांक 30 नोव्हेंबर 2021 पर्यंत यादीबाबत दावे व हरकती स्विकारल्या जातील.  20 डिसेंबर 2021 पर्यंत दावे व हरकती निकालात काढून 5 जानेवारी 2022 पर्यंत मतदार यादी अंतिम करण्यात येईल.

01 जानेवारी 2022 रोजी 18 वर्षे पूर्ण होणाऱ्या नागरिकास मतदानाचा हक्क प्राप्त होणार आहे. महानगरपालिकेने महानगरपालिकेच्या दहा प्रभाग कार्यालयातील नागरी सुविधा केंद्रात मतदान नोंदणी अर्ज नागरिकांसाठी/ मतदारांसाठी उपलब्ध करून ठेवले आहेत. 

महापालिकेत संपन्न झालेल्या या बैठकीस शिवसेना, भारतीय जनता पार्टी, राष्ट्रीय काँग्रेस पार्टी, राष्ट्रवादी काँग्रेस पार्टी, महाराष्ट्र नवनिर्माण सेना बहुजन समाज पार्टी, आम आदमी पार्टी, एम आय एम पार्टी, वंचित बहुजन आघाडी, पीपल्स रिपब्लिकन पार्टी इत्यादी राजकीय पक्षांचे पदाधिकारी उपस्थित होते.  बैठकीस उपस्थित असलेल्या राजकीय प्रतिनिधींच्या शंकाबाबत अतिरिक्त आयुक्त सुनिल पवार आणि महापालिका सचिव संजय जाधव यांनी मार्गदर्शन केले.