अंबरनाथ येथे मराठी फिल्म फेस्टीवलचा पुरस्कार सोहळा संपन्न !*अंबर भरारी, अखिल भारतीय चित्रपट महामंडळ व डॉ.

अंबरनाथ येथे मराठी फिल्म फेस्टीवलचा पुरस्कार सोहळा संपन्न !

*अंबर भरारी, अखिल भारतीय चित्रपट महामंडळ व डॉ. श्रीकांत शिंदे फाउंडेशन यांचे यशस्वी आयोजन*

 

अंबरनाथ, प्रकाश संकपाळ :- अंबरनाथ पूर्व, गावदेवी मैदान येथे अंबर भरारी, अखिल भारतीय चित्रपट महामंडळ व डॉ. श्रीकांत शिंदे फाउंडेशन यांच्या संयुक्त विद्यमाने “अंबरनाथ मराठी चित्रपट महोत्सव पुरस्कार सोहळा” हा अंबरनाथचा सांस्कृतिक वारसा जपणारा सोहळा आज अंबरनाथचे माजी नगराध्यक्ष श्री. सुनील चौधरी, श्री. गुणवंत खेरोदिया, श्री. निखिल चौधरी यांनी आयोजित केला असून या कार्यक्रमास भारतीय सिनेसृष्टीतील दिग्गज कलाकारांनी उपस्थिती दर्शवत या सोहळ्याची शान वाढवली.

या अंबरनाथ मराठी चित्रपट महोत्सवात जेष्ठ अभिनेते जयंत सावरकर यांना जीवनगौरव तर सुप्रसिद्ध संगीतकार श्रीधर फडके यांना कारकीर्द गौरव पुरस्काराने सन्मानित करण्यात आले त्याचप्रमाणे जेष्ठ दिग्दर्शक कुमार सोहनी कारकीर्द सन्मान पुरस्कार, नंदकुमार पाटील यांना सिनेपत्रकारिता पुरस्कार, प्रिया लक्ष्मीकांत बेर्डे यांना कुटुंब योगदान पुरस्कार यांने सन्मानित केले तर सिनेसृष्टीतील कलाकारांचा सन्मान केला. पुरस्कार सोहळ्याच्या निमित्ताने जयंत सावरकर यांचा लग्नाचा ६२ वा वाढदिवस साजरा केला. यावेळी कलाकारांचा व रसिक प्रेक्षकांचा उत्स्फूर्त प्रतिसाद लाभला. 

यावेळी सुनील चौधरी यांनी सांगितले की या फेस्टिव्हलचे आठवे वर्ष असून अगदी कोरोना काळात सुध्दा यांचे आयोजन केले होते, दरवर्षी प्रेक्षकांचा भरभरून प्रतिसाद मिळाला. फेस्टिव्हलचे दिग्दर्शक महेंद्र पाटील यांनी सांगितले की ही संकल्पना मी अंबरनाथचे मा. नगराध्यक्ष सुनील चौधरी यांच्या कडे घेऊन गेलो असता त्यांनी मला सहकार्य केले व आज त्यामुळेच कार्यक्रमाचे आठ वर्षे पूर्ण केली आहेत.

अंबरनाथ चे आमदार डॉक्टर बालाजी किणीकर  यांनी उपस्थित राहून आयोजित कार्यक्रमाचा आनंद लुटला व या प्रसंगी पुरस्काराने सन्मानित करण्यात आलेल्या सर्व कलाकारांचे अभिनंदन केले.