*शेतकरी - कष्टकऱ्यांसाठी झटणारा खरा संघर्ष योद्धा : जयराम दादा भोईर*
जयराम भोईर यांच्या निधनाची वार्ता ऐकून अतिव दुःख झालं. ठाणे पालघर जिल्ह्यातील शेतकरी, कष्टकरी जनतेच्या समस्यांसाठी झटणारा खरा संघर्ष योद्धा आपल्यातून गेल्याची खऱ्या अर्थाने जाणीव झाली. वाडा तालुक्यातील निंबवली या गावातील शेतकरी कुटुंबातील असणारे जयराम भोईर यांनी आपल्या भागातील शेतकऱ्यांवर होणाऱ्या अन्यायाबाबत नेहमीच पुढाकार घेऊन त्या समस्या सोडवण्यासाठी सातत्याने प्रयत्न केला. साधारण 1990 नंतर इथला शेतकरी वर्ग विविध समस्यांनी पिचला गेला होता. त्यांच्यावर टाकल्या गेलेल्या वेठबिगाराच्या केसेस असतील, शेती उत्पादनांना मिळणारा तुटपुंजा भाव असेल, विविध शासकीय प्रकल्पांमुळे बाधित होणाऱ्या शेतकऱ्यांना मोबदला मिळण्यासाठी येणाऱ्या अडचणी असतील यासारख्या अनेक समस्या सोडवण्यासाठी त्यांनी सातत्याने पाठपुरावा केला. तसेच प्रसंगी संघर्ष ही उभा केला. ठाणे व पालघर जिल्ह्यातील विविध पक्ष - संघटनांमध्ये विखुरलेले सर्वपक्षीय नेते, कार्यकर्ते, पुढारी, लोकप्रतिनिधी यांना एकाच ठिकाणी आणून शेतकऱ्यांच्या कष्टकऱ्यांच्या प्रश्नांना वाचा फोडण्याचे काम करणारा एकमेव व्यक्ती म्हणजे जयराम भोईर होत.
शेतकऱ्यांचे विविध समस्या सोडवत असतानाच बोरिवली नॅशनल पार्क सारख्या ठिकाणी आदिवासी वस्तीतील बांधवांच्या समस्यांसाठीही त्यांनी सरकार दरबारी सातत्याने पाठपुरावा संघर्ष केला. असा त्यांच्या कामाचा लेखाजोखा प्रचंड आहे.
वास्तविक जयराम भोईर यांचे गाव निंबवली हे वाडा तालुक्यात येत असले तरी त्यांच्या दृष्टीने तानसा नदी पलीकडे असणारे भिवंडी तालुक्यातील गणेशपुरी - वज्रेश्वरी हा परिसर त्यांच्यासाठी अगदी हाकेच्या अंतरावरचा आहे. मात्र 25 - 30 वर्षांपूर्वी येथील तानसा नदीवर पूल नसल्याने या ठिकाणी जाण्यासाठी निंबवली परिसरातील ग्रामस्थांना केळठण - डाकीवली - अंबाडी मार्गे वज्रेश्वरी - गणेशपुरी असा अठरा-वीस किलोमीटरचा प्रवास करून जावं लागत होतं. ही समस्या लक्षात घेऊन जयराम भोईर यांनी सातत्याने सरकार दरबारी पाठपुरावा करून निंबवली - गणेशपुरीला जोडणारा तानसा नदीवर पूल तयार करून घेतला, यासाठी तत्कालीन स्थानिक आमदार विष्णूजी सवरा यांचेही मोलाचे योगदान या पुलासाठी लाभलं. त्यानंतर केळठण - अकलोली या गावाला जोडणारा तानसा नदीवरील पूलही काही वर्षानंतर तयार करण्यात आला. अशा अनेक समस्या सोडवण्यासाठी जयराम भोईर यांनी सातत्याने आपलं योगदान दिलेलं आहे, याची आठवण आज त्यांच्या निधनानिमित्त करणं कर्मप्राप्त आहे.
स्वर्गीय जयराम भोईर यांच्या जाण्याने आपण ठाणे पालघर जिल्ह्यातील एका संघर्ष योध्याला व संवेदनशील कार्यकर्त्याला मुकलो आपण आहोत, मी अखिल भारतीय कुर्मी (कुणबी) महासभा महाराष्ट्र, राष्ट्रवादी काँग्रेस पक्ष वाडा तालुका, कोकण पत्रकार संघ यांच्यावतीने स्व. जयराम भोईर यांना विनम्र श्रद्धांजली अर्पण करतो.
*जयेश शेलार - पाटील*
*महासचिव* : अखिल भारतीय कुर्मी (कुणबी) महासभा महाराष्ट्र,
*अध्यक्ष* : राष्ट्रवादी काँग्रेस पक्ष वाडा तालुका,
*अध्यक्ष* : कोकण पत्रकार संघ
मो. 7620256750
No comments:
Post a Comment