व्यसना पासून दूर ठेवण्यासाठी अल-अनॉन साधना ग्रुप उरण गटाची स्थापना होणार !!

व्यसना पासून दूर ठेवण्यासाठी अल-अनॉन साधना ग्रुप उरण गटाची स्थापना होणार !!

उरण दि ११, (विठ्ठल ममताबादे) : दारूच्या व्यसनामुळे अनेक कुटुंबांचे जीवन प्रभावित होते. अशा परिस्थितीत कुटुंबातील सदस्यांना मानसिक आधार, समज आणि मार्गदर्शन मिळावे या उद्देशाने अल-अनॉन साधना ग्रुप, उरण या नवीन गटाची स्थापना उरण मध्ये करण्यात येणार आहे.

या गटाचा उद्घाटन सोहळा रविवार, दिनांक १५ मार्च २०२६ रोजी सायंकाळी ४:०० वाजता उरण नगरपरिषद कन्या शाळा, ग्राउंड फ्लोअर, पेंशनर्स पार्क समोर, एन.एम.एम.टी बस स्टॉप जवळ, उरण, जि. रायगड येथे आयोजित करण्यात आला आहे. या कार्यक्रमाचे उद्घाटन उरण नगरपरिषद अध्यक्षा भावना ताई घाणेकर यांच्या हस्ते होणार आहे.

अल-अनॉन म्हणजे काय  ?

अल-अनॉन ही एक जागतिक स्वयंसेवी संघटना आहे जी दारूच्या व्यसनामुळे प्रभावित झालेल्या कुटुंबीय आणि मित्रांना आधार देण्यासाठी कार्य करते. येथे सदस्य एकमेकांशी आपले अनुभव, ताकद आणि आशा शेअर करून मानसिक शांतता आणि सकारात्मक जीवनाचा मार्ग शोधण्यास मदत करतात. या बैठका पूर्णपणे गोपनीय, विनामूल्य आणि सर्वांसाठी खुल्या असतात.

उद्घाटन कार्यक्रमानंतर अल-अनॉन साधना ग्रुपच्या नियमित सभा प्रत्येक रविवारी सायंकाळी ७:०० ते ८:३० या वेळेत उरण नगर परिषद कन्या शाळा, पेन्शनर्स पार्क समोर,उरण शहर येथे आयोजित करण्यात येतील.

दारूच्या व्यसनामुळे प्रभावित झालेल्या सर्व कुटुंबीय व मित्रांनी या कार्यक्रमास उपस्थित राहून या उपक्रमाचा लाभ घ्यावा, असे आवाहन अल-अनॉन साधना ग्रुप, उरणच्या वतीने करण्यात आले आहे