आता राज्यातील सर्व दुकानांच्या पाट्या मराठीतच -- राज्यमंत्री मंडळाचा निर्णय.

आता राज्यातील सर्व दुकानांच्या पाट्या मराठीतच -- राज्यमंत्री मंडळाचा निर्णय.

भिवंडी, दिं,12, अरुण पाटील (कोपर) : मराठी भाषेविषयी राज्य मंत्रिमंडळाच्या बैठकीत एक महत्त्वाचा निर्णय घेण्यात आला आहे. राज्य मंत्रिमंडळाच्या बैठकीत राज्यातील सर्व दुकानांच्या पाट्या मराठीत मोठ्या अक्षरात असाव्यात या प्रस्तावाला मंजूरी देण्यात आली आहे. त्यामुळे राज्यातील सर्व दुकानाच्या पाट्या आता मराठीमध्येच दिसणार आहेत. मोठ्या अक्षरात या पाट्या असणे बंधनकारक असेल. दुकानात एक जरी व्यक्ती काम करत असली, तरी दुकानावर पाटी मराठीतच असेल.असा निर्णय  राज्य मंत्रिमंडळाच्या बैठकीत घेण्यात आला आहे. राज्याचे गृहनिर्माण मंत्री जितेंद्र आव्हाड यांनी याबाबतची माहिती दिली. 

मराठीतच दुकानांच्या पाट्या असण्याबाबत ‘महाराष्ट्र दुकाने व आस्थापना (नोकरीचे व सेवाशर्तीचे विनियमन) अधिनियम 2017 हा अधिनियम लागू होत असल्यामुळे दहापेक्षा कमी कामगार असलेल्या आस्थापना आणि दुकाने नियमातून पळवाट काढत असल्याचे आढळून आले होते. अशा प्रकारच्या अनेक तक्रारी राज्य सरकारकडे आल्या होत्या. तसेच त्यावर उपाययोजना करण्याची देखील मागणी होत होती. अखेर आज मंत्रीमंडळाने महाराष्ट्र दुकाने व आस्थापना ( नोकरीचे व सेवाशर्तीचे विनयमन) अधिनियम, 2017 यात सुधारणा करण्याचा आणि पळवाट बंद करण्याचा निर्णय घेतला. 

त्यामुळे आता मोठ्या प्रमाणेच छोट्या दुकानावरील पाट्याही मराठीत कराव्या लागतील. बहुसंख्य दुकाने आणि व्यापारी पेढ्यांमध्ये दहापेक्षा कमी कामगार असतात, हे लक्षात घेता यापुढे रस्त्यालगतच्या सर्वच दुकांनावरील पाट्या मराठीत लागलेल्या दिसतील. मराठीत-देवनागरी लिपितील अक्षरे दुसऱ्या (इंग्रजी किंवा अन्य) लिपीतील अक्षरांपेक्षा लहान ठेवता येणार नाहीत, अशीही दुरुस्ती मंजूर करण्यात आली. राज्याचे मराठी भाषा मंत्री सुभाष देसाई यांनी यासाठी मंत्रालयात संबंधितांची बैठक घेतली आणि कायदा सुधारण्याचा निर्णय घेतला.