उरण हादरलं :चोरट्यांनी गुरांसोबत तरुणालाही गाडीत डांबले,सतर्क नागरिकांच्या धाडसाने चोरटे जेरबंद !
** जखमी उमेश कोळी व गाई गुरांची सुखरूप सुटका.
उरण दि २५, (विठ्ठल ममताबादे) :
उरण तालुक्यातील चाणजे परिसरात रविवारी पहाटे साडेतीनच्या सुमारास एखाद्या चित्रपटालाही मागे टाकेल असा थरार पाहायला मिळाला जनावरे चोरण्यासाठी आलेल्या टोळीने त्यांना हटकणाऱ्या तरुणाचे अपहरण करण्याचा प्रयत्न केला मात्र तरुणाची सतर्कता आणि गावकऱ्यांच्या धाडसामुळे चोरट्यांची गाडी उलटली आणि उरण पोलिसांनी तीन चोरट्यांना बेड्या ठोकल्या आहेत.
चाणजे ग्रुप ग्रामपंचायतचे सरपंच अजय म्हात्रे यांनी दिलेल्या माहितीनुसार रविवारी पहाटे साडेतीन च्या सुमारास उमेश महादेव कोळी हा तरुण कामावरून घरी परतत असताना त्याला काही अज्ञात व्यक्ती फोरविलर गाडीतून गुरे पळवताना दिसल्या. उमेशने त्यांना जाब विचारला असता चोरट्याने त्यालाच पकडून गाडी डांबले आणि गुरांसोबत बांधून पळवून नेण्याचा प्रयत्न केला.
गावकऱ्यांनी गाड्या काढून चोरट्यांच्या तवेरा गाडीचा पाठलाग सुरू केला. गावकऱ्यांची जिद्द पाहून चोरट्याने वेगाने गाडी पळवण्याचा प्रयत्न केला. मात्र या धावपळीथ चोरट्यांची गाडी रस्त्याच्या कडेला पलटी झाली. मोठा आवाज आणि आरडाओरडा झाल्याने परिसरातील नागरिक जागे झाले.
गुरांसोबत आपल्या गावातील तरुणालाही बांधून नेल्याचा राग आल्याने संतप्त झालेल्या नागरिकांनी चोरट्यांना घटनास्थळी चांगला चोप दिला. माहिती मिळताच उरण पोलिसांनी तातडीने घटनास्थळी धाव घेऊन तीन चोरट्यांना ताब्यात घेतले आणि त्यांची गाडी जप्त केली. पोलीस एफ आय आर क्रमांक ००३२, भारतीय न्याय संहिता
२०२३ कलम११८(१), ११५(२), १२७(२) ,३५२(१) ,१४०(१) ३(५) ,महाराष्ट्र पशु संरक्षण अधिनियम१९७६, नुसार कलम ५ ए, महाराष्ट्र पशु संरक्षण अधिनियम १९७६ कलम ९, आणि प्राण्यांचा छळ प्रतिबंधक अधिनियम १९६० ११(१) नुसार गुन्हा नोंदविण्यात आला असून या घटनेवर पोलिसांनी बारीक लक्ष ठेवले असून पुढील तपास चालू आहे.
उरण तालुक्यातील मागील अनेक दिवसांपासून तवेरा गाडीने गुरे चोरणाऱ्या टोळीने धुमाकूळ घातला आहे. आजच्या या घटनेमुळे ही मोठी टोळी उजेडात आली आहे. तरीही शेतकऱ्यांनी ,नागरिकांनी रात्रीच्या वेळी सतर्क रहावे असे आवाहन पोलीस प्रशासनाने केले आहे.
No comments:
Post a Comment