बाजीप्रभू चौकातील निवासी बस थांब्यावर वाढीव शेडची मागणी; नागरिकांकडून केडीएमटीचे आभार !

बाजीप्रभू चौकातील निवासी बस थांब्यावर वाढीव शेडची मागणी; नागरिकांकडून केडीएमटीचे आभार !

*डोंबिवली, राजू नलावडे :* डोंबिवलीतील बाजीप्रभू चौकातील निवासी बस थांब्याजवळ अनधिकृत टपऱ्या आणि फेरीवाल्यांनी अतिक्रमण केले होते. याबाबत केडीएमसी अतिक्रमण विभागाला पत्र देऊन कारवाई करण्यास भाग पाडण्यात आले. या कारवाईबद्दल स्थानिक नागरिकांनी केडीएमटीचे आभार मानले आहेत.

या बस थांब्यावर दिवसभर प्रवाशांची मोठी गर्दी आणि लांबच लांब रांग असते. सध्याच्या शेडची जागा अपुरी असल्याने प्रवाशांची रांग नेहमी शेडबाहेर, थेट रस्त्यावर येते. त्यामुळे नागरिकांना भर उन्हात आणि पावसात रस्त्यावर उभे राहावे लागते. तसेच तेथे वाहतुकीची मोठी वर्दळ असल्याने अपघाताचा धोकाही निर्माण झाला आहे.

आता महापालिकेने अनधिकृत टपऱ्यांवर कारवाई केल्याने परिसर मोकळा झाला आहे. या मोकळ्या झालेल्या जागेवर प्रवाशांसाठी रांग लावण्याकरिता अतिरिक्त शेड उभारून बस थांबा पुढे वाढवावा, अशी मागणी नागरिक करत आहेत. असे केल्यास प्रवाशांना दिलासा मिळेल आणि पुन्हा अनधिकृत टपऱ्या उभ्या राहण्यास आळा बसेल, असे नागरिकांचे म्हणणे आहे.

सोनारपाडा साईबाबा मंदिराजवळ सतत पुन्हा पुन्हा दुरुस्ती करूनही पाण्याची गळती !!

सोनारपाडा साईबाबा मंदिराजवळ सतत पुन्हा पुन्हा दुरुस्ती करूनही पाण्याची गळती !!

डोंबिवली, राजू नलावडे:

             डोंबिवली एमआयडीसी, कल्याण शीळ रस्त्यावरील सोनारपाडा साईबाबा मंदिर जवळ एमआयडीसीच्या पाइपलाइन व्हॉल्व वर सतत पाण्याची गळती होण्याचे प्रकार होत आहेत. काल रविवारी सुटीच्या दिवशी या पाइपलाइन व्हॉल्व मधून पाण्याचे फवारे उंच उडत होते. याची तक्रार स्थानिक नागरिकांनी केल्यावर एमआयडीसीने येऊन दुरुस्ती करून पाणी गळती थांबवली होती. परंतु आज सोमवार सकाळपासून पुन्हा यावर पाण्याची गळती सुरू झाल्याने पुन्हा आम्ही एमआयडीसीला कळविले असता त्यांच्या कर्मचाऱ्यांनी येऊन पाण्याची ही गळती थांबवली. ही सतत गळती कशामुळे होत आहे. तांत्रिक कारणामुळे की कोणी या पाइपलाइन व्हॉल्ववर छेडछेड करीत तर नाही ना, हे एमआयडीसीने स्पष्ट करून तशी कार्यवाही करावी.

         गेले अनेक महिने अशाच प्रकारच्या पाण्याच्या गळत्या अनेक ठिकाणी चालू आहेत. गेल्या शुक्रवारी एमआयडीसीने शट डाऊन घेऊन २४ तासाकरिता पाणी पुरवठा बंद असताना एमआयडीसी मधील सर्व पाण्याच्या गळत्या या दुरूस्ती करून घेतल्या असल्याचे एमआयडीसी तर्फे सांगण्यात आले होते. परंतु हा दावा सोनारपाडा, साईबाबा मंदिराजवळील कालच्या व आजच्या गळतीमुळे खोटा ठरला असल्याचे दिसत आहे. 

            सद्या पाण्याची टंचाई निर्माण झाली असताना अशा गळत्या आपल्याला परवडणार नाही. एमआयडीसी या गळतीकडे गांभीर्याने घेत नसल्याचे दिसत आहे. लोकांनी तक्रार केल्यावरच ते तात्पुरती दुरुस्ती करीत असल्याचे दिसत आहे. यापुढे अशा गळत्या पुन्हा झाल्या तर जबाबदार अधिकाऱ्यांवर कारवाई करण्यात यावी अशी मागणी नागरिकांतर्फे करण्यात येत आहे. 

*मैत्री माणुसकी प्रतिष्ठान आणि उत्तम क्लिनिकचे पहिले मोफत आरोग्य तपासणी शिबिर यशस्वी‌ !

*मैत्री माणुसकी प्रतिष्ठान आणि उत्तम क्लिनिकचे पहिले मोफत आरोग्य तपासणी शिबिर यशस्वी*

घाटकोपर येथे ६० जणांनी घेतला आरोग्य तपासणीचा लाभ; २५ महिलांची संपूर्ण रक्त तपासणी मोफत

मुंबई प्रतिनिधी (निलेश कोलमकर) : मैत्री माणुसकी प्रतिष्ठान, मुंबई आणि उत्तम क्लिनिक (डॉ. राहुल कोल्हे) यांच्या संयुक्त विद्यमाने, बोझ नहीं मैं फाउंडेशन यांच्या सहकार्याने नवरात्रोत्सवानिमित्त घाटकोपर येथे मोफत आरोग्य तपासणी शिबिराचे आयोजन करण्यात आले होते. या शिबिराला नागरिकांचा उत्स्फूर्त प्रतिसाद मिळाला असून एकूण ६० व्यक्तींनी आरोग्य तपासणीचा लाभ घेतला. यामध्ये २५ महिलांची संपूर्ण रक्त तपासणी मोफत करण्यात आली.

सध्याच्या धावपळीच्या जीवनशैलीत अनेक नागरिक विविध आजारांनी त्रस्त आहेत. मात्र, आर्थिक अडचणींमुळे अनेकांना वेळेवर आरोग्य तपासणी करणे आणि आवश्यक वैद्यकीय चाचण्यांचे अहवाल मिळवणे परवडत नाही. विशेषतः महिलांच्या आरोग्याच्या दृष्टीने नियमित तपासणी आणि आजारांचे वेळीच निदान होणे अत्यंत महत्त्वाचे आहे. ही गरज लक्षात घेऊन नागरिकांना मोफत आरोग्यसेवा उपलब्ध करून देण्याच्या उद्देशाने या शिबिराचे आयोजन करण्यात आले.

विशेष म्हणजे, अवघ्या एका आठवड्याच्या कालावधीत या उपक्रमाचे नियोजन आणि तयारी पूर्ण करून शिबिर यशस्वीरीत्या पार पाडण्यात आले. सामाजिक बांधिलकी जपत आरोग्यविषयक जनजागृती करण्याचा प्रतिष्ठानचा हा पहिलाच उपक्रम असून त्याला मिळालेला प्रतिसाद उत्साहवर्धक ठरला.

हे शिबिर यशस्वी करण्यासाठी मैत्री माणुसकी प्रतिष्ठानचे अध्यक्ष निलेश कोकमकर, खजिनदार अनामिका राजेश हळदणकर, सदस्य दीपाली संदीप तांबे व त्यांचे कुटुंबीय, तसेच उत्तम क्लिनिकचे डॉ. राहुल कोल्हे यांनी विशेष मेहनत घेतली.

या शिबिरादरम्यान समाजसेवक सुरेश रेवणकर, श्री स्वामी समर्थ असल्फा मठाचे मठाधीश धैर्यशील शितोळे महाराज आणि अभिनेत्री सायली पाचपुते यांनी उपस्थिती लावून उपक्रमाला शुभेच्छा दिल्या.

शिबिरासाठी श्री डायग्नोस्टिक सेंटरचे अमोल टिकेकर आणि प्रशांत पाटील, लाईफ प्लस फार्माचे सलीम सय्यद, राजेश हळदणकर व परिवार, संतोष पारकर व परिवार आणि वैशाली बनसोडे यांनी मोलाचे सहकार्य केले.

याशिवाय प्रतिष्ठानचे पदाधिकारी नंदा गोरेगावकर, प्रकाश गोरेगावकर, सुनील सावंत, चंद्रकांत राणे, चैताली राणे, सुचिता सावंत, स्नेहा पारकर आणि प्रकाश मनतोडे यांचेही महत्त्वपूर्ण योगदान लाभले. तसेच सर्व देणगीदार आणि प्रत्यक्ष-अप्रत्यक्षरीत्या सहकार्य करणाऱ्या सर्वांचे आयोजकांच्या वतीने मनःपूर्वक आभार व्यक्त करण्यात आले.

आरोग्यसेवा ही केवळ उपचारांपुरती मर्यादित न राहता ती सर्वसामान्य नागरिकांपर्यंत पोहोचली पाहिजे, या भावनेतून आयोजित करण्यात आलेल्या या शिबिराने सामाजिक बांधिलकीचे दर्शन घडवले. भविष्यातही शैक्षणिक, आरोग्यविषयक आणि इतर सामाजिक उपक्रमांच्या माध्यमातून गरजू नागरिकांना मदतीचा हात देण्याचा संकल्प मैत्री माणुसकी प्रतिष्ठान, मुंबईने व्यक्त केला आहे.‌ नवरात्रोत्सवाच्या निमित्ताने आरोग्यसेवेचा जागर करत माणुसकीचा संदेश देणारे हे शिबिर यशस्वी ठरले.

📰 युवा राजे सार्वजनिक व्यायामशाळा, वालकस येथे सात लाखांच्या व्यायाम साहित्याचे लोकार्पण !

📰 युवा राजे सार्वजनिक व्यायामशाळा, वालकस येथे सात लाखांच्या व्यायाम साहित्याचे लोकार्पण !

आमदार किसनजी कथोरे साहेबांच्या आशीर्वादाने व मान्यवरांच्या सहकार्याने व्यायामशाळेचा भव्य उद्घाटन सोहळा संपन्न

वालकस (कल्याण) | दिनांक १८ ऑक्टोबर २०२६

ग्रामीण भागातील युवकांना सुदृढ आरोग्य, शारीरिक तंदुरुस्ती आणि क्रीडा क्षेत्रात प्रगती करण्याची संधी उपलब्ध व्हावी, या उद्देशाने वालकस (कल्याण) येथील युवा राजे सार्वजनिक व्यायामशाळेला महाराष्ट्र शासनाच्या क्रीडा विभागामार्फत सात लाख रुपयांचे व्यायामाचे साहित्य उपलब्ध झाले आहे. या व्यायामशाळेचा भव्य उद्घाटन सोहळा रविवार, दिनांक १८ ऑक्टोबर २०२६ रोजी उत्साहपूर्ण वातावरणात संपन्न झाला.

या उपक्रमाला आदरणीय आमदार श्री. किसनजी कथोरे साहेब आणि परमपूज्य राष्ट्रसंत नम्रमुनी महाराज यांचे आशीर्वाद लाभले. तसेच टी.डी.सी.सी. ठाणेचे अध्यक्ष श्री. अरुण पाटील, सार्वजनिक व्यायामशाळा संघ, ठाणे जिल्ह्याचे अध्यक्ष श्री. संजय हंडोरे पाटील आणि दिव्यांग संघटनेचे अध्यक्ष श्री. सुरेश राऊत यांच्या विशेष सहकार्यामुळे व्यायामाचे साहित्य मंजूर करण्यास योगदान लाभले

💐 युवकांच्या सर्वांगीण विकासासाठी महत्त्वपूर्ण पाऊल

आजच्या धावपळीच्या जीवनात युवकांनी शारीरिक आरोग्यासोबतच मानसिक आरोग्याचीही काळजी घेणे आवश्यक आहे. व्यायामामुळे शरीर सुदृढ राहते, आत्मविश्वास वाढतो आणि शिस्तीची भावना निर्माण होते. याच दृष्टिकोनातून युवा राजे सार्वजनिक व्यायामशाळेच्या माध्यमातून युवकांना आधुनिक व्यायाम साहित्याची सुविधा उपलब्ध करून देण्यात आली आहे.

महाराष्ट्र शासनाच्या क्रीडा विभागामार्फत मिळालेल्या सात लाख रुपयांच्या व्यायाम साहित्यामुळे परिसरातील युवकांना नियमित व्यायाम करण्यासाठी प्रोत्साहन मिळणार असून, त्यांच्या शारीरिक क्षमतेचा विकास होण्यास मदत होणार आहे. तसेच नवोदित खेळाडूंना क्रीडा क्षेत्रात आपली गुणवत्ता सिद्ध करण्यासाठी या व्यायामशाळेचा उपयोग होणार आहे.

🤝 मान्यवरांच्या सहकार्यामुळे उपक्रमाला यश

या व्यायामशाळेसाठी व्यायामाचे साहित्य मंजूर  करून देण्यासाठी विविध मान्यवरांनी सहकार्य केले. विशेषतः श्री. अरुण पाटील, श्री. संजय हंडोरे पाटील आणि श्री. सुरेश राऊत यांच्या प्रयत्नांमुळे तसेच युवा राजे सार्वजनिक व्यायामशाळा, वालकस येथील पदाधिकारी व कार्यकर्त्यांच्या पुढाकारामुळे हा उपक्रम साकार झाला.

ग्रामीण भागातील युवकांना व्यायामाच्या सुविधा उपलब्ध करून देणे, व्यसनांपासून दूर ठेवणे आणि त्यांना आरोग्यदायी जीवनशैलीकडे वळवणे, या दृष्टीने हा उपक्रम निश्चितच प्रेरणादायी ठरणार आहे.

🌟 आरोग्यदायी आणि सशक्त समाजनिर्मितीचा संकल्प

युवा राजे सार्वजनिक व्यायामशाळा, वालकस येथे सुरू झालेल्या या सुविधेमुळे परिसरातील युवकांना व्यायामाची योग्य संधी मिळणार आहे. शासनाच्या क्रीडा विभागाच्या सहकार्याने आणि स्थानिक पदाधिकारी व कार्यकर्त्यांच्या प्रयत्नातून साकारलेला हा उपक्रम ग्रामीण भागातील क्रीडा विकासाला चालना देणारा ठरेल.

“सुदृढ युवक, सशक्त समाज आणि निरोगी भारत” या संकल्पनेला बळ देणाऱ्या या उपक्रमाचे सर्व स्तरांतून स्वागत होत आहे

श्री छत्रपती शिवाजी महाराज सामाजिक संस्थेतर्फे नवरात्रौत्सवानिमित्त कर्तृत्ववान महिलांचा सन्मान !!

श्री छत्रपती शिवाजी महाराज सामाजिक संस्थेतर्फे नवरात्रौत्सवानिमित्त कर्तृत्ववान महिलांचा सन्मान !!

विविध क्षेत्रांत उल्लेखनीय कार्य करणाऱ्या नऊ महिलांचा गौरव ; महिलांचा उत्स्फूर्त प्रतिसाद.

उरण दि. १८ (विठ्ठल ममताबादे) : नवरात्रौत्सवाचे औचित्य साधून श्री छत्रपती शिवाजी महाराज सामाजिक संस्थेतर्फे दरवर्षीप्रमाणे यंदाही विविध क्षेत्रांत उल्लेखनीय कार्य करणाऱ्या कर्तृत्ववान महिलांचा सन्मान सोहळा रविवार, दि. १८ ऑक्टोबर २०२६ रोजी सकाळी ११ वाजता आयोजित करण्यात आला होता. उरण मधील कोप्रोली चौक येथे  शिक्षक प्रतिक मुंबईकर यांच्या रँकऑन अकॅडेमी क्लासेसच्या ठिकाणी हा कार्यक्रम मोठ्या उत्साहात संपन्न झाला. या सोहळ्याला महिलांचा उत्स्फूर्त प्रतिसाद लाभला.

समाजाच्या जडणघडणीत महिलांचे योगदान अत्यंत महत्त्वाचे आहे. सामाजिक, वैद्यकीय, पत्रकारिता, कृषी, प्रशासकीय, शैक्षणिक तसेच इतर विविध क्षेत्रांत महिला आपल्या कार्यकर्तृत्वाच्या जोरावर समाजात महत्त्वपूर्ण योगदान देत आहेत. त्यांच्या कार्याची दखल घेऊन त्यांना प्रोत्साहन देण्याच्या उद्देशाने या सन्मान सोहळ्याचे आयोजन करण्यात आले होते.या कार्यक्रमाच्या व्यासपीठावर आदर्श शिक्षक सुधीर मुंबईकर, आदर्श शिक्षिका साधना मुंबईकर, पंचायत समिती सदस्य कविता पाटील आणि सामाजिक कार्यकर्ते महेश पाटील उपस्थित होते. मान्यवरांच्या उपस्थितीत विविध क्षेत्रांत उल्लेखनीय कार्य करणाऱ्या नऊ महिलांचा सन्मान व सत्कार करण्यात आला.

या सर्व महिलांचा मान्यवरांच्या हस्ते सन्मान करून त्यांच्या कार्याचा गौरव करण्यात आला.नवरात्रौत्सवाच्या निमित्ताने महिलांच्या कर्तृत्वाचा सन्मान करणारा हा उपक्रम उपस्थितांसाठी प्रेरणादायी ठरला.कार्यक्रमाच्या यशस्वितेसाठी श्री छत्रपती शिवाजी महाराज सामाजिक संस्थेच्या सर्व पदाधिकारी व सदस्यांनी विशेष मेहनत घेतली. महिलांच्या कार्याचा गौरव करून त्यांना प्रोत्साहन देणाऱ्या या उपक्रमाचे उपस्थितांकडून कौतुक करण्यात आले.सदर कार्यक्रमाचे उत्तम असे सूत्रसंचालन व आभार प्रदर्शन सुनील वर्तक व चेतन पाटील यांनी केले. उपस्थित मान्यवरांनी सदर उपक्रमाचे विशेष कौतुक केले.या कार्यक्रमाला आदर्श शिक्षक सुधीर मुंबईकर,आदर्श शिक्षिका साधना मुंबईकर, शिक्षक प्रतिक मुंबईकर यांचे विशेष सहकार्य लाभले.

कोट (चौकट ):- 

विविध क्षेत्रांतील नऊ कर्तृत्ववान महिलांचा गौरव करून या सन्मान सोहळ्यात महिलांचा त्यांच्या कार्यक्षेत्रातील योगदानाबद्दल गौरव करण्यात आला.

१. सौ. कविता रुपेश पाटील — सामाजिक क्षेत्र

२. श्रीमती चैताली केसरीनाथ घरत — वैद्यकीय क्षेत्र

३. श्रीमती सायली साळुंके — पत्रकारिता क्षेत्र

४. सौ. कुसुम भानुदास पाटील — शेतकरी क्षेत्र

५. सौ. जयश्री पवन म्हात्रे — प्रशासकीय क्षेत्र

६. सौ. संध्या पांडुरंग ठाकूर — अंगणवाडी सेविका

७. सौ. माधुरी शेलार — न्यायदान क्षेत्र (वकिली व्यवसाय)

८. सौ. ज्योती गणेश पाटील — शिक्षण क्षेत्र

९. सौ. रोहिणी प्रकाश जाधव — पोलीस प्रशासन.

कल्याण तालुक्यातील शेतकऱ्यांना हेक्टरी एक लाखाची मदत द्या; राष्ट्रवादीच्या तालुकाध्यक्षांची मागणी !!

कल्याण तालुक्यातील शेतकऱ्यांना हेक्टरी एक लाखाची मदत द्या; राष्ट्रवादीच्या तालुकाध्यक्षांची मागणी !!

*कल्याण (संजय कांबळे) :* हातातोंडाशी आलेले भात पीक डोळ्यादेखत करपत असल्याने बळीराजा संकटात सापडला आहे. त्यामुळे कल्याण तालुक्याचा दुष्काळी तालुक्यात समावेश करून शेतकऱ्यांना हेक्टरी एक लाख रुपयांची आर्थिक मदत द्यावी, अशी मागणी राष्ट्रवादी काँग्रेस (शरदचंद्र पवार) पक्षाचे तालुकाध्यक्ष सोमनाथ मिरकुटे यांनी केली आहे.

गोवेली येथे आज आयोजित शेतकरी बैठकीत ते बोलत होते. या मागणीचे निवेदन लवकरच तहसीलदार, प्रांताधिकारी आणि जिल्हाधिकाऱ्यांना देण्यात येणार असल्याचे त्यांनी सांगितले.

राज्यातील अनेक भागांत दुष्काळ जाहीर करण्यात आला असताना कल्याण तालुक्यातील शेतकऱ्यांना मदतीपासून वंचित ठेवण्यात आले आहे. हा प्रश्न शासनासमोर गांभीर्याने मांडण्याची गरज असल्याचे बैठकीत सांगण्यात आले.

*बैठकीतील प्रमुख मागण्या :*

- कल्याण तालुक्याचा दुष्काळग्रस्त भागात समावेश करावा

- नुकसानग्रस्त शेतकऱ्यांना हेक्टरी १ लाख रुपये आर्थिक मदत द्यावी

- पंचनाम्याची वाट न पाहता तातडीने मदत खात्यावर जमा करावी

- खरीप पिकांच्या नुकसानीचे तातडीने पंचनामे करावेत

- रब्बी हंगामासाठी बियाणे व खते मोफत द्यावीत

- शेतकऱ्यांना पीक कर्जाबाबत दिलासा द्यावा

- जनावरांसाठी चारा, पशुखाद्य व पाण्याची व्यवस्था करावी

- सन २०२५-२६ चा धान बोनस तातडीने जाहीर करावा

दसरा-दिवाळी सण तोंडावर असताना शेतकरी आर्थिक संकटात असल्याने तातडीने मदत करावी, अशी मागणी यावेळी करण्यात आली.

यावेळी कुंडलिक रामा गायकर, गोपाल गायकर, शिवाजी रोहणे, हरिभाऊ शेलार, बुधाजी बुटेरे, दत्तू काथोडे रोहणे, गुरुनाथ रोहणे, जयराम बुटेरे, प्रभाकर मिरकुटे, तुकाराम बुटेरे, भालचंद्र मिरकुटे आदी शेतकरी उपस्थित होते.

*राज्यस्तरीय पोषण रसोई स्पर्धेत घाटकोपरच्या दीपाली तांबे, प्रतिभा भालेराव यांना प्रथम क्रमांक !!

*राज्यस्तरीय पोषण रसोई स्पर्धेत घाटकोपरच्या दीपाली तांबे, प्रतिभा भालेराव यांना प्रथम क्रमांक !!

प्रतिनिधी - निलेश कोकमकर 

      मुंबई : ‘सर्वांसाठी अन्न आणि पोषण’ या संकल्पनेतून पोषण माह २०२६ निमित्त के कॉर्प चॅरिटेबल फाउंडेशनतर्फे आयोजित राज्यस्तरीय पोषण रसोई स्पर्धेत घाटकोपर येथील अंगणवाडी माता दीपाली संदीप तांबे आणि अंगणवाडी सेविका प्रतिभा राहुल भालेराव यांनी प्रथम क्रमांक पटकावला.

                    या स्पर्धेत महाराष्ट्रातील पालघर, नंदुरबार, गडचिरोली, कर्जत आणि मुंबई या पाच प्रकल्प क्षेत्रांतील सुमारे ३५० सहभागी १७५ संघांच्या माध्यमातून सहभागी झाले होते. या स्पर्धेचा मुख्य उद्देश अंगणवाडी केंद्रांमधून दिल्या जाणाऱ्या पूरक पोषण आहाराचा (टीएचआर) योग्य वापर करून स्थानिक पातळीवर सहज उपलब्ध होणाऱ्या साहित्यापासून कमी खर्चात पौष्टिक आणि चविष्ट पदार्थ तयार करण्यास प्रोत्साहन देणे हा होता.घाटकोपरच्या दीपाली संदीप तांबे आणि प्रतिभा राहुल भालेराव यांनी टीएचआर खिचडी, टीएचआर पराठा, शेवग्याच्या पानांची चटणी, मिश्र भाज्यांचा चाट आणि टीएचआर लाडू यांचा समावेश असलेली पौष्टिक थाळी सादर केली. त्यांच्या अभिनव पाककृतीचे परीक्षकांनी कौतुक केले. या स्पर्धेत पालघरच्या यमुना सुरेश मिसाळ आणि प्रमिला सुभाष मिसाळ यांनी द्वितीय, तर गडचिरोलीच्या कविता रामू दुगा आणि पूजा रंजीत नारोटे यांनी तृतीय क्रमांक मिळविला.स्पर्धेच्या पहिल्या फेरीत अंगणवाडी सेविका, मदतनीस, आशा कार्यकर्त्या आणि समुदायातील मातांनी उत्स्फूर्त सहभाग नोंदविला. सहभागी महिलांनी टीएचआरचा वापर करून लाडू, पराठा, रवा वडी, लापशी, खिचडी, सुकडी आणि हलवा यांसारखे विविध पौष्टिक पदार्थ तयार केले. 

                  पदार्थांचे पोषणमूल्य, स्वच्छता, खर्च, टीएचआरचा योग्य वापर, कुटुंबातील सदस्यांना पदार्थांची स्वीकारार्हता आणि सादरीकरण अशा विविध निकषांवर परीक्षण करण्यात आले.या स्पर्धेमुळे स्थानिक खाद्यपदार्थांचा वापर करून पूरक पोषण आहारातून विविध पौष्टिक पदार्थ तयार करण्याच्या क्षमतेला प्रोत्साहन मिळाले. तसेच अंगणवाडी सेविका आणि समुदायातील मातांचा पोषणविषयक उपक्रमांमधील सहभाग वाढविण्यास मदत झाली.

                   या उपक्रमातून निवडक पाककृतींचे संकलन करून टीएचआर पाककृती पुस्तिका तयार करण्यात येणार आहे. ही पुस्तिका अंगणवाडी केंद्रांपर्यंत पोहोचविण्यात येणार असून, तिच्या माध्यमातून कुटुंबांना या पाककृती घरच्या घरी तयार करता येतील. मातांचे पोषण, पूरक पोषण आहाराचा नियमित वापर आणि स्थानिक खाद्यपदार्थांना प्रोत्साहन देणे या उद्दिष्टांसाठी हा उपक्रम महत्त्वपूर्ण ठरणार आहे. एकात्मिक बाल विकास सेवा योजना (आयसीडीएस) आणि आरोग्य विभागातील अधिकारी व कर्मचाऱ्यांनी प्रमुख पाहुणे आणि परीक्षक म्हणून सहभाग घेतला. गडचिरोली जिल्हा परिषदेचे उपमुख्य कार्यकारी अधिकारी, धानोरा येथील बाल विकास प्रकल्प अधिकारी व तालुका आरोग्य अधिकारी तसेच सायवन प्राथमिक आरोग्य केंद्राचे वैद्यकीय अधिकारी यांची उपस्थिती होती. या फेरीतील निवडक संघांना अंतिम फेरीत सहभागी होण्याची संधी मिळाली.

                        अंतिम फेरीच्या परीक्षक मंडळात ‘आयसीडीएस’ महाराष्ट्राच्या आयुक्त माधवी सरदेशमुख, पोषणतज्ज्ञ व शैक्षणिक सल्लागार डॉ. अनुराधा मित्रा आणि ट्रॅव्हल फूड सर्व्हिसेसचे कॉर्पोरेट शेफ राजेश शेट्टी यांचा समावेश होता.

                         या उपक्रमासाठी एकात्मिक बाल विकास सेवा योजना, आरोग्य विभाग, कृषी विज्ञान केंद्रे, ग्रामपंचायती तसेच अरोहन, बायफ, बाल रक्षा भारत, सीएचआरआय, सीआरवाय, सीवायडीए आणि युनायटेड वे ऑफ मुंबई या संस्थांचे सहकार्य लाभल्याबद्दल आभार व्यक्त केले आणि स्पर्धेचा समारोह केला.