*डोंबिवली (एमआयडीसी निवासी) :* मिलापनगर तलावाची दिवाळीनंतर झालेल्या दुर्दशेबाबत 'बातमीदार माझा' मध्ये बातमी प्रसिद्ध होताच केडीएमसी प्रशासन खडबडून जागे झाले. प्रशासनाने आज तलावावर तातडीने सफाई कर्मचारी पाठवून निर्माल्य, प्लास्टिक, फटाक्यांचे अवशेष, देवदेवतांचे व दिवंगत माता-पित्यांचे फोटो-मूर्ती, पणत्या, नारळ इत्यादी कचरा उचलून गाडीत भरला. तसेच तलाव परिसराची संपूर्ण साफसफाई करण्यात आली.
यामुळे तलाव परिसर आता स्वच्छ आणि कचरामुक्त पाहायला मिळत आहे. विशेष म्हणजे पुढील काही दिवसांकरिता तलावावर देखरेखीसाठी दिवसा एका सफाई कर्मचाऱ्याची नेमणूक करण्यात आली आहे.
*बातमी आली कीच प्रशासन जागे होते - नागरिकांची खंत*
मिलापनगर तलावाची दुर्दशा होऊन माध्यमांत बातमी आली कीच प्रशासन जागे होते, हा यापूर्वीचा अनुभव आहे. त्यामुळे अशी तात्पुरती साफसफाई नको, तर कायमस्वरूपी उपाययोजना कराव्यात, अशी येथील नागरिकांची मागणी आहे.
*नागरिकांच्या प्रमुख मागण्या :*
*१)* तलावावर देखरेखीसाठी कायमस्वरूपी फक्त दिवसा एक कंत्राटी कामगार ठेवावा.
*२)* तलाव परिसरात सीसीटीव्ही कॅमेरे बसवावेत.
*३)* पंपाद्वारे पाणी हवेत उपसा करून पुन्हा तलावात सोडावे किंवा तलावात मधोमध कारंजे बसवावे. यामुळे पाण्याचे एरिएशन (Water Aeration) होऊन ऑक्सिजनचे प्रमाण वाढेल, दुर्गंधी जाईल आणि पाणी स्वच्छ होईल.
*४)* तलावाच्या तळाशी असलेला गाळ स्लज पंपाद्वारे काढावा.
*५)* पाणी टंचाईच्या काळात तलावातील पाणी पंपाद्वारे पाइपलाइन टाकून जवळच असलेल्या वंदेमातरम् उद्यान व शैलगंगा मिलापनगर शहरी वन प्रकल्पासाठी तसेच जवळच्या इमारतींना द्यावे. यामुळे पिण्याच्या पाण्याची बचत होईल.
*६)* तलावाची देखरेख मिलापनगर रेसिडेंट्स वेलफेअर असोसिएशन / रोटरी क्लब यांसारख्या संस्थांकडे द्यावी.
स्थानिक नागरिकांनी केडीएमसी प्रशासन आणि 'बातमीदार माझा' यांचे आभार व्यक्त केले आहेत.
सौजन्य/वृत्त - राजू नलावडे (डोंबिवली)
