सत्ता स्थापनेच्या हालचालीना वेग, झेड सुरक्षेत एकनाथ शिंदे सागर बंगल्याकडे रवाना; मंगल प्रभात लोढा, अळवणी आणि चव्हाण सोबत ! " एकनाथ शिंदे राज्याचे नवे मुख्यमंत्री " - देवेंद्र फडणवीस
भिवंडी, दिं,३०, अरुण पाटील (कोपर) :
महाराष्ट्रात आज होणारी फ्लोअर टेस्ट मुख्यमंत्री उद्धव ठाकरे यांच्या राजीनाम्यानंतर टळलेली आहे. यानंतर नव्याने सत्तास्थापनेच्या हालचाली सुरू आहेत. शिंदे गटाचा मुक्काम गोव्यात आहे. तर गटाचे नेते एकनाथ शिंदे हे मुंबईच्या दिशेने सत्तास्थापनेच्या वाटाघाटींसाठी रवाना झाले आहेत. दुसरीकडे, भाजप नेतेही आज दुपारी ३ वाजता राजभवनावर पोहोचले आहेत.
शिवसेनेचा गटनेता म्हणून ५० आमदारांनी माझी निवड केली आहे. मतदार संघातले काही प्रश्न होते. बाळासाहेबांच्या हिंदुत्वाचा विचार पुढे घेऊन जाऊ या, अशी आमची मागणी होती. यावर त्वरित निर्णय घेतला असता, तर ही वेळ आली नसती. आमच्या मनात उद्धव ठाकरे यांच्याबद्दल कालही आदर होता. आजही आदर आहे. मी मुंबईला राज्यपालांना भेटण्यासाठी जातोय. त्यानंतर आमची पुढली रणनीती ठरवण्यात येईल, असे प्रतिपादन एकनाथ शिंदे यांनी माध्यमांशी बोलताना केले.
एकनाथ शिंदे यांनी माध्यमांना दिलेल्या माहितीनुसार, ते आजच राज्यपालांना भेटणार आहेत. याशिवाय आजच ते देवेंद्र फडणवीस यांच्याशी चर्चा करणार आहेत. मुंबईत दाखल झाल्यावर शिंदे बाळासाहेबांच्या स्मृतिस्थळी जाणार असल्याची माहिती समोर आली आहे. या ठिकाणी कोणताही अनुचित प्रकार होऊ नये यासाठी तगडा पोलिस बंदोबस्त ठेवण्यात आला आहे.
एकनाथ शिंदे दुपारी अडीचच्या सुमारास मुंबई विमानतळावर दाखल झाले. शिंदे यांना केंद्राकडून झेड दर्जाची सुरक्षा पुरवण्यात आली आहे.
शिंदे यांचे विमानतळावर भाजप आमदार रवींद्र चव्हाण यांनी स्वागत केले. मुंबई विमानतळावर पोलिसांचा मोठा बंदोबस्त तैनात होता. एकनाथ शिंदे यांनी हात उंचावून सर्वांना अभिवादन केले, यावेळी शिंदे समर्थकांनीही रस्त्याच्या दुतर्फा गर्दी केली होती.
सूत्रांच्या माहिती नुसार, एकनाथ शिंदे आणि फडणवीस हे आज राज्यपालांना भेटून सत्तास्थापनेचा दावा दाखल करू शकतात.एकनाथ शिंदे सागर बंगल्याकडे जाताना त्यांच्यासोबत भाजपचे नेते मंगल प्रभात लोढा, पराग अळवणी आणि रवींद्र चव्हाण सोबत होते.
भाजपसोबत कोणती आणि किती मंत्रीपदे याबाबत अद्याप कोणतीही चर्चा झाली नसून अफवांवर विश्वास ठेवू नये, असे आवाहन मंत्री एकनाथ शिंदे यांनी केले आहे. तसेच मतदार संघातील विकास कामे हाच आमचा फोकस असल्याचे त्यांनी म्हटले. या संदर्भात त्यांनी सलग दोन ट्विट केले. बंडखोर आमदारांचं नेतृत्व करणाऱ्या एकनाथ शिंदे सोबत घेऊन भाजपा सरकार स्थापन करणार असल्याचे सांगितले जात आहे.
ट्विटमध्ये त्यांनी म्हटले की, वंदनीय हिंदुहृदयसम्राट शिवसेनाप्रमुख बाळासाहेब ठाकरे यांचा हिंदुत्वाचा विचार, धर्मवीर आनंद दिघे साहेबांची शिकवण, महाराष्ट्राचा सर्वांगिण विकास आणि आमदारांच्या मतदारसंघातील विकास कामे हाच आमचा फोकस आहे.
No comments:
Post a Comment