डोंबिवली येथे शिवसेना (उद्धव बाळासाहेब ठाकरे) आणि दिपेश म्हात्रे फाउंडेशन यांच्या संयुक्त विद्यमाने श्री. रतन टाटा आणि कै. कैकई घारडा (घारडा केमिकल्स) यांना भावपूर्ण श्रद्धांजली !!
डोंबिवली, सचिन बुटाला : भारतातील एक उत्तुंग व्यक्तिमत्व तसेच जागतिक पातळीवरील सन्मानिय उद्योगपती माननीय श्री रतन टाटा व डोंबिवली शहरातील उद्योजक माननीय कै. कैकई घारडा (घारडा केमिकल्स) यांना १६ ऑक्टोबर २०२४ रोजी, सायंकाळी ६ वाजता, सर्वेश हॉल, डोंबिवली (पूर्व) येथे शिवसेना (उद्धव बाळासाहेब ठाकरे) आणि दिपेश म्हात्रे फाउंडेशन यांच्या संयुक्त विद्यमाने श्रद्धांजली अर्पण करण्याचा विशेष कार्यक्रम आयोजित करण्यात आला. या कार्यक्रमात डोंबिवलीतील विविध मान्यवरांची उपस्थिती होती आणि सर्वांनी एकत्र येऊन या दोन महान व्यक्तिमत्त्वांच्या कार्याचा गौरव केला.
कार्यक्रमाचे आयोजन सर्वेश हॉल, डोंबिवली (पूर्व) येथे करण्यात आले. श्री. दिपेश म्हात्रे, माजी स्थायी समिती अध्यक्ष, डोंबिवली, आणि श्री. माधव जोशी, जे टाटा टेलीसर्व्हिसेसचे माजी अध्यक्ष होते, यांनी आपले विचार मांडले आणि टाटा जी आणि घारडा जी यांच्या जीवनातील घटनांचा उल्लेख करत त्यांना आदरांजली वाहिली.
दिपेश म्हात्रे यांनी आपल्या भाषणात म्हटले, "रतन टाटा जी हे एक असामान्य व्यक्तिमत्त्व होते, ज्यांनी महानता आणि व्यावसायिक कौशल्य यांचे आदर्श उदाहरण प्रस्थापित केले. त्यांच्या दूरदृष्टीने केवळ औद्योगिक प्रगतीच नव्हे, तर समाजसेवा, शिक्षण, आरोग्य, आणि गरिबांच्या सेवेतही मोलाचे योगदान दिले आहे. त्यांच्या नेतृत्वामुळे लाखो लोकांचे जीवन सुधारले आहे. श्री. रतन टाटा यांनी दाखवले की व्यावसायिक यश आणि मानवतेची सेवा हे एकाच वेळी साध्य करता येते."
त्यानंतर, श्री. माधव जोशी यांनी टाटा जी यांच्याशी संबंधित अनेक आठवणी सांगितल्या, ज्यांनी उपस्थित सर्वांना भावूक केले. जोशी म्हणाले, "टाटा जी यांच्यासोबत काम करताना त्यांच्या नेतृत्वगुणांचा आणि साधेपणाचा जवळून अनुभव घेण्याची संधी मिळाली. टाटा टेलीसर्व्हिसेसमध्ये काम करताना मला त्यांच्यासोबत घालवलेले अनेक क्षण अविस्मरणीय होते."
कार्यक्रमाच्या शेवटी, उपस्थित सर्वांनी श्री. रतन टाटा यांना भारत रत्न सन्मान प्रदान करण्यात यावा, अशी एकमुखी मागणी केली. टाटा जींचे देशासाठी केलेले अद्वितीय योगदान पाहता, हा सर्वोच्च नागरी सन्मान त्यांना मिळावा, असा आग्रह सर्वांनी व्यक्त केला.
या कार्यक्रमाला आयोजक श्री. दिपेश म्हात्रे (माजी स्थायी समिती अध्यक्ष) तसेच श्री. माधव जोशी (माजी अध्यक्ष, टाटा टेलीसर्व्हिसेस), KAMA संघटना आणि MIDC उद्योजकांचे प्रतिनिधी, शिवसेना (उद्धव बाळासाहेब ठाकरे) पक्षाचे स्थानिक पदाधिकारी आणि कार्यकर्ते, डोंबिवलीतील समाजसेवक व उद्योगपती उपस्थित होते.
या कार्यक्रमाच्या माध्यमातून टाटा जी आणि घारडा जी यांच्या कार्याचे महत्त्व आणि त्यांचे योगदान लक्षात घेऊन त्यांना आदरांजली अर्पण करण्यात आली.
No comments:
Post a Comment