आमदार आपल्या भेटीला या कार्यक्रमाव्दारे नागरिकांच्या समस्यांना तात्काळ मार्गदर्शन आणि प्रतिसाद !!
डोंबिवली, प्रतिनिधी : कल्याण ग्रामीणचे नवनिर्वाचित आमदार राजेश मोरे यांच्या "आमदार आपल्या भेटीला" या कार्यक्रमाचे आयोजन डोंबिवली शहर शिवसेना शाखेच्या वतीने आयोजित केले होते. या कार्यक्रमाला विधानसभा क्षेत्रातील नागरिकांचा उत्स्फूर्त प्रतिसाद लाभला. सोमवार, दिनांक २३ डिसेंबर २०२४ रोजी, दुपारी १२:०० ते ३:०० वाजेपर्यंत हा कार्यक्रम डोंबिवली शहरातील मानपाडा पथावरील शिवसेनेच्या मध्यवर्ती शाखेत पार पडला.
कल्याण ग्रामीण विधानसभा मतदारसंघाचे नवनियुक्त आमदार श्री. राजेश गोवर्धन मोरे यांना भेटण्यासाठी १०० हून अधिक नागरिकांनी खाजगी तसेच सामाजिक समस्या मांडल्या. यावेळी डोंबिवली शहर, नेतीवली विभाग, एमआयडीसी विभाग, दिवा शहर, १४ गाव, २७ गाव, शिळफाटा विभाग या भागातील नागरिकांनी मोठ्या संख्येने उपस्थिती लावली.
सदर कार्यक्रमांमध्ये आलेल्या नागरिकांनी सार्वजनिक समस्यांमध्ये बससेवा, रखडलेली शासकीय कामे, आर्थिक मदत, वैद्यकीय सेवा, शैक्षणिक समस्या, आणि नोकरीसंबंधी प्रश्न मांडले तर खाजगी समस्यांमध्ये आर्थिक फसवणूक, शिफारसपत्र, शासकीय योजनांचा लाभ मिळवणे यांसारख्या प्रश्नांवर चर्चा झाली.
यावेळी नागरिकांच्या समस्यांना त्वरित प्रतिसाद देत आमदार श्री. राजेश मोरे यांनी संबंधित विभागातील अधिकाऱ्यांशी थेट संपर्क साधून अनेक समस्यांचे निराकरण केले. पोलीस विभाग, तहसील कार्यालय, महानगरपालिका, रेशनिंग कार्यालय, शैक्षणिक विभाग यांसह विविध शासकीय यंत्रणांशी संवाद साधून नागरिकांच्या कामांना गती दिली.
या कार्यक्रमाला शिवसेना, महिला आघाडी, युवा सेनेचे पदाधिकारी, नगरसेवक/नगरसेविका, बंधू भगिनी तसेच पत्रकार बांधव उपस्थित होते. नवनियुक्त आमदारांचे अभिनंदन आणि शुभेच्छा देण्यासाठी नागरिकांनीही गर्दी केली.
पहिल्याच कार्यक्रमात अनेक प्रश्न मार्गी लागल्याने नागरिकांमध्ये समाधान दिसून आले. आमदारांनी दाखवलेल्या तत्परतेने व संवेदनशीलतेने उपस्थित नागरिक, पदाधिकारी आणि कार्यकर्त्यांनी समाधान व्यक्त केले.
"आमदार आपल्या भेटीला" या कार्यक्रमामुळे नागरिकांच्या अपेक्षांना नवी दिशा मिळाली असून, आमदार श्री. राजेश मोरे यांचे कार्यक्षेत्रात सकारात्मक योगदान दिसून येत आहे.
सौजन्य - शिवसेना डोंबिवली शहर मध्यवर्ती शाखा.
No comments:
Post a Comment