क्रांतीकारक गोमाजी पाटील यांच्या घराच्या जागी स्मारक उभारण्यासाठी नातसुनेची धडपड. !!
मुरबाड (मंगल डोंगरे) : भारतीय स्वातंत्र्य लढ्यात ज्यानी आपल्या घरादाराची राखरांगोळी केली. अनेक वीरांनी आपल्या सुखी संसारावर तुळशीपत्र ठेवले. पण स्वातंत्र्य मिळाल्यानंतर माञ त्या क्रांतीकारक आणि हुतात्मा वीरांच्या आठवणी पुसट होत आहेत. उद्याच्या पिढीला हा देदीप्यमान इतिहास समजावा यासाठी क्रांतीकारक च्या घरातील मंडळीना पुढाकार घ्यावा लागत आहे. याचे उदाहरण म्हणजे स्वातंत्र्य सैनिक गोमाजी पाटील यांच्या मानस नातसून अनुसया गोपाल जामघरे सध्या हुतात्म्यांचया स्मृती तेवत ठेवण्यासाठी धडपडत आहेत.
कर्जत मानीवली येथील गोमाजी पाटील व हिराजी पाटील भाई कोतवाल यांच्या खांद्याला खादा लावून आझाद दस्ता ह्या चळवळीत लढले. २ जानेवारी १९४३ ला मुरबाड तालुक्यातील सिद्धगड येथे फितुरीने घात होऊन भाई कोतवाल आणि हिराजी पाटील यांना वीरगती लाभली होती. ज्या दिवशी मुलगा शहिद झाला त्याच दिवशी गोमाजी पाटील अटक झाले. १९४७ ला भारत स्वातंत्र्य झाला आणि गोमाजी पाटील यांची सुटका झाली. गोमाजी पाटील घरी आल्यावर पत्नी ठकाबाई व सून जानकीबाई सह मानीवलीला काबाडकष्ट करून पोट भरत होते. गोमाजी पाटील यांच्या नातेवाईकांनी त्यांच्याकडे पाठ फिरवल्याने भविष्याचा विचार करून गोमाजी पाटील यांनी बिरदोले येथील आपल्या नात्यातल्या दहा वर्षाच्या मुलाला गोपाल जामघरे याला आपल्या घरी कायमचा संभालणयासाठी घेऊन आले. १९५४ साली त्यांनी खाडेपाडा येथील अनुसया नावाच्या मुलीबरोबर गोपाळ चे लग्न लावून दिले. ह्या जामघरे दाम्पत्याने गोमाजी पाटील आणि जानकीबाई पाटील यांची सेवा केली. १९६१ साली गोमाजी व १९६७ साली जानकीबाई यांचे निधन झाले. त्यानंतर जामघरे दांपत्य गोमाजी पाटील यांच्या घरातून निघून जनावरांच्या गोठ्यात राहू लागले. काही वर्षांपूर्वी गोमाजी पाटील ह्यात असताना त्यानी आपल्या मालकीची काही जमीन गोपाल जामघरे याना बक्षिस पञ करून दिली होती.
१९७३ साली गोपाल जामघरे याचे अपघातात निधन झाले. त्यानंतर अनुसया गोपाल जामघरे आपल्या मुलीसह मानीवलीलाच त्या गोठ्यात राहून काबाडकष्ट करू लागल्या. आज मितीस गोमाजी पाटील यांच्या पुतण्यानी गोमाजी पाटील यांचे घर पाडले आहे. ते घर पुन्हा उभे करून आणि आपल्या घराच्या जागी स्वातंत्र्य सैनिक गोमाजी पाटील व जानकीबाई हिराजी पाटील यांचे स्मारक उभारण्यासाठी अनुसया बाई वयाच्या ८३ व्या वर्षी एकाकी लढा देत आहेत.
ज्या घरात हुतात्मा हिराजी पाटील यांचा जन्म झाला. त्या घरात जानकीबाई पाटील यांनी संसार केला ते घर आज अस्तित्वात नाही. त्याच्य ठिकाणी स्मारक उभे राहिले तर उद्याच्या पिढीला हा ऐतिहासिक लढा उमजेल अशी अपेक्षा अनुसया बाई करीत आहेत.
No comments:
Post a Comment