भिवंडी लोकसभा मतदारसंघात काँग्रेसचे अजून ही तळ्यात मळ्यात !!

भिवंडी लोकसभा मतदारसंघात काँग्रेसचे अजून ही तळ्यात मळ्यात !!

भिवंडी, प्रतिनिधी : भिवंडी लोकसभा मतदारसंघ हा परंपरागत कॉंग्रेसचा मतदारसंघ असून आजपर्यंत झालेल्या सर्व निवडणुकीत २०१४ व २०१९ चा अपवाद वगळता कॉंग्रेस विजयी झाली आहे.

यावेळी सुध्दा महाविकास आघाडीत हा मतदारसंघ कॉग्रेसला जाणार असे नक्की झाले असताना, स्वतः प्रदेशाध्यक्ष नाना पाटोले यांनी हा मतदारसंघ भिवंडी येथील पत्रकार परिषदेत काँग्रेसला मिळाला आहे व‌ जिल्हाध्यक्ष दयानंद चोरगे यांना उमेदवारी मिळण्याची शक्यता वर्तवली होती.

हा मतदारसंघ काँग्रेसला जाणार म्हणून जिजाऊ शैक्षणिक व सामाजिक संस्थेचे अध्यक्ष निलेश सांबरे यांचे या संपूर्ण मतदारसंघात (ग्रामीण व शहरी भागात) असलेले कार्य यामुळे त्यांनी सुध्दा कॉंग्रेस पक्षाकडे उमेदवारी मागितली होती.

मतदारसंघात स्थानिक खासदारांची निष्क्रियता तसेच त्यांच्या विषयी असलेली नाराजी यामुळे महाविकास आघाडीचा विजय सोपा झाला होता पण अचानक हा मतदारसंघ महाविकास आघाडीतील राष्ट्रवादी काँग्रेस (शरदचंद्र पवार) यांना गेला त्यामुळे कॉंग्रेसचे माजी खासदार सुरेश टावरे व जिल्हाध्यक्ष दयानंद चोरगे यांची नाराजी, कॉंग्रेसची या मतदारसंघात असलेली ताकद अशातच निलेश सांबरे यांनी अपक्ष उमेदवार म्हणून उभे रहाण्याचा केलेला निर्धार यामुळे महाविकास आघाडीला सोपा वाटणारा विजय कठीण होऊन ही निवडणूक अत्यंत चुरशीची होणार असे दिसते.

राष्ट्रवादी काँग्रेस (शरदचंद्र पवार) यांचे उमेदवार सुरेश म्हात्रे (बाळ्या मामा) यांचा निवडणूक जवळ आली असताना सुद्धा बराचसा वेळ नाराजी दूर करण्यातच जात असल्याने प्रचारात पाहिजे तसा जोर दिसत नाही याव्यतिरिक्त महायुतीचे उमेदवार कपिल पाटील व जिजाऊ संस्थेचे अध्यक्ष अपक्ष उमेदवार निलेश सांबरे यांनी प्रचारात आघाडी घेतली आहे. समाजवादी पक्षाने पाठिंबा दिला आहे पण कॉंग्रेसची साथ नाही मिळाली तर सुरेश म्हात्रे (बाळ्या मामा) यांना मोठा फटका बसण्याची शक्यता नाकारता येत नाही.