"चिरंजीवी संघटनेच्या राष्ट्रीय अध्यक्षा सलोनी (अवली) तोडकरी ह्याचे "बालपण वाचवा मानवता वाचवा" यासाठी विक्रमगड येथे ३ दिवसीय लाक्षणिक उपोषण !!

"चिरंजीवी संघटनेच्या राष्ट्रीय अध्यक्षा सलोनी (अवली) तोडकरी ह्याचे "बालपण वाचवा मानवता वाचवा" यासाठी विक्रमगड येथे ३ दिवसीय लाक्षणिक उपोषण !!

विक्रमगड, प्रतिनिधी : चिरंजीवी संघटना ही जिज्ञासू बालकांची मानवतावादी संघटना असून, गेल्या १२ वर्षांपासून बालमजुरी, बालविवाह, बालभिकारी आणि बालशोषण यांसारख्या गंभीर समस्यांवर काम करत आहे. "बालपण वाचवा, मानवता वाचवा" या मोहिमेच्या अंतर्गत संघटनेने विविध जनजागृती उपक्रमांद्वारे समाजात सकारात्मक बदल घडवण्याचा प्रयत्न केला आहे.

२४ ते २६ डिसेंबरदरम्यान विक्रमगड तालुक्यातील महादेव मंदिरासमोर या मोहिमेचे तीन दिवसीय उपोषण पार पडले. हे उपोषण संघटनेच्या राष्ट्रीय अध्यक्षा सलोनी (अवली) तोडकरी यांच्या नेतृत्वाखाली आयोजित करण्यात आले. उद्घाटन विक्रमगड उपनगराध्यक्ष महेंद्र पाटील यांच्या हस्ते झाले, तर समारोप विक्रमगडचे आमदार हरिश्चंद्र भोये आणि कुणबी सेनेचे प्रमुख विश्वनाथ पाटील यांच्या हस्ते करण्यात आला, अशी माहिती संघटनेच्या राज्यअध्यक्षा नेहा भोसले यांनी दिली.

उपाध्यक्ष राहुल बनसोडे यांच्या मार्गदर्शनाखाली विविध जनजागृती उपक्रम राबवले गेले. विक्रमगडमधील कातकरी पाडा आणि जिल्हा परिषदेच्या शाळांमध्ये बालमजुरी आणि बालविवाह यांसारख्या समस्यांवर शॉर्ट फिल्म्सच्या माध्यमातून जागृती निर्माण करण्यात आली. कै. उल्हासराव प्राथमिक माध्यमिक आश्रम शाळेत विद्यार्थ्यांसोबत खेळ, गाणी, तसेच "उबंटू" चित्रपट सादर करून त्यांना प्रेरणा दिली. विक्रमगडच्या मुख्य भागात घोषणाबाजीसह रॅली काढून अधिक लोकांपर्यंत संदेश पोहोचवण्याचा प्रयत्न करण्यात आला.

या कार्यक्रमाला पाठींबा देण्यासाठी छात्रशक्ती संस्थेच्या सचिव स्मिता साळुंखे, मैत्रकुल संचालक आशिष गायकवाड, विद्यार्थी भारतीच्या राष्ट्रीय अध्यक्षा ऍड. मंजिरी धुरी, पालघरचे कृषी सभापती संदीप पावडे, भाजपचे जव्हार सरचिटणीस सुधाकर गावित, नडगे मॅडम, आणि पोलिस निरीक्षक पारखे सर आदी मान्यवर उपस्थित होते, असे  राष्ट्रीय सचिव श्वेता पाटील यांनी सांगितले.

राष्ट्रीय संघटक चेतन कांबळे यांनी चिरंजीवी संघटनेच्या सातत्यपूर्ण प्रयत्नांचे कौतुक केले आणि बालमजुरी, बालविवाह, व बालशोषणमुक्त भारतासाठी समाजाने एकत्र येण्याचे आवाहन केले. खजिनदार प्रगती कांबळे यांनीही या मोहिमेचे महत्त्व अधोरेखित करत समाजातील प्रत्येक व्यक्तीने या उपक्रमाला पाठिंबा देण्याचे आवाहन केले.

राष्ट्रीय अध्यक्षा सलोनी तोडकरी यांनी जनतेला उद्देशून सांगितले की, "बालकांचे हक्क व त्यांचे भविष्य सुरक्षित करण्यासाठी प्रत्येकाने योगदान देणे गरजेचे आहे." त्यांच्या नेतृत्वाखालील या मोहिमेने समाजात सकारात्मक बदल घडवण्याचा प्रेरणादायी संदेश दिला आहे.