तीन महिन्यापासून पगार "न "मिळाल्यामुळे सफाई कामगारांचे ठाणे महानगरपालिका मुख्यालयासामोर अर्धनग्न आंदोलन !!

तीन महिन्यापासून पगार "न "मिळाल्यामुळे सफाई कामगारांचे ठाणे महानगरपालिका मुख्यालयासामोर  अर्धनग्न आंदोलन !!

भिवंडी, दिं,२३, अरुण पाटील (कोपर) :

           ठाणे येथील वागळे इस्टेट भागातील सी पी तलाव परिसरातील कचराभूमीवर काम करणाऱ्या सफाई कामगारांना ठेकेदाराने गेल्या तीन महिन्यांपासून पगार "न " दिल्यामुळे त्याच्या  निषेधार्थ म्युनिसिपल लेबर युनीयनच्या माध्यमातून कामगारांनी बुधवारी सी पी तलाव ते महापालिका मुख्यालय असा अर्धनग्न अवस्थेत मोर्चा काढला होता. महापालिका मुख्यालयासमोर येताच कामगारांनी धरणे धरत जोरदार घोषणाबाजी केली. किमान वेतन तसेच इतर सोयीसुविधा देत नसल्याचा आरोप कामगारांनी केला. येत्या गुढीपाडव्यापर्यंत थकीत वेतन आणि बोनसची रक्कम अदा करण्याचे निर्देश संबंधीत कंत्राटदारास द्यावेत, अशी मागणी कामगारांनी पालिका अधिकाऱ्यांकडे केली आहे.

           ठाणे महापालिका क्षेत्रात दररोज निर्माण होणाऱ्या कचऱा सी पी तलाव येथे नेला जातो आणि त्यानंतर कचऱ्याचे वर्गीकरण करून तो कचराभुमीवर नेला जातो. या कचरा वाहतूकीच्या कामासाठी पालिकेने मे. मेट्रो वेस्ट हॅण्डलिंग प्रा. लि. या कंपनीची नेमणूक केली असून २०१७ पासून ही कंपनी हे काम करीत आहे. हे काम १० वर्षाकरिता या कंपनीला देण्यात आले आहे. या ठेकेदारामार्फत सी.पी. तलाव येथे सुमारे ६१ कामगार काम करीत असून त्यात वाहन चालक, वाहन चालक सहाय्यक, सफाई कामगार आणि मेंटेनन्स कामगार यांचा समावेश आहे. या ठेकेदारावर प्रशासनाच्या संबंधीत विभागाचा अंकुश नसल्यामुळे त्याने गेल्यावर्षी दिवाळीत कामगारांना बोनस दिला नाही. ऐवढेच नव्हे तर मार्च महिना संपत आला तरीही कामगारांना जानेवारी आणि फेब्रुवारी महिन्याचे वेतन दिलेले नाही. ठेकेदाराच्या या आडमुठ्या धोरणामुळे या कामगारांवर व त्यांच्या कुटुंबियांवर उपासमारीची वेळ आली आहे, अशी माहिती म्युनिसिपल लेबर युनीयनचे सरचिटणीस बिरपाल भाल आणि चिटणीस चेतन आंबोणकर यांनी दिली.