भिवंडीत बोगस डॉक्टरांवर कारवाईचा बडगा !!

भिवंडीत बोगस डॉक्टरांवर कारवाईचा बडगा !!

'डॉक्टर्स डे' निमित्त तीन क्लिनिकची तपासणी; संशयित डॉक्टरांवरही कारवाईचे आदेश

प्रतिनिधी भिवंडी 

दिनांक 01 जुलै 2026 

'डॉक्टर्स डे'चे औचित्य साधून भिवंडी निजामपूर शहर महानगरपालिकेने बोगस डॉक्टरांविरोधातील कारवाई अधिक तीव्र करत तीन खासगी क्लिनिकची तपासणी केली. या तपासणीत एका क्लिनिकमध्ये अॅलोपॅथी इंजेक्शन्स व औषधांचा साठा आढळून आल्याने संबंधिताविरुद्ध गुन्हा दाखल करून कायदेशीर कारवाईची प्रक्रिया सुरू करण्यात आली आहे.

महाराष्ट्राचे आरोग्यमंत्री यांच्या आदेशानुसार बुधवार, दि. १ जुलै २०२६ रोजी मुंबई मंडळ, ठाणे येथील उपसंचालक (आरोग्य सेवा) यांनी भिवंडी महानगरपालिका कार्यक्षेत्राला भेट देऊन वैद्यकीय आरोग्य अधिकाऱ्यांसह विविध क्लिनिकची पाहणी केली. यावेळी पटेलनगर येथील डॉ. शफिन खान यांचे क्लिनिक, गणेशनगर येथील आशापूरा क्लिनिक आणि पद्मानगर येथील गाजेंगी क्लिनिकची तपासणी करण्यात आली. गाजेंगी क्लिनिकमध्ये अॅलोपॅथी औषधे व इंजेक्शन्सचा साठा आढळल्याने संबंधिताविरुद्ध गुन्हा दाखल करून पुढील कायदेशीर कारवाई सुरू करण्यात आली आहे.

यानंतर महानगरपालिकेच्या वैद्यकीय आरोग्य विभागात उपसंचालकांच्या अध्यक्षतेखाली आढावा बैठक पार पडली. या बैठकीला वैद्यकीय आरोग्य अधिकारी, १ ते २० नागरी आरोग्य केंद्रांतील वैद्यकीय अधिकारी तसेच इंडियन मेडिकल असोसिएशनचे प्रतिनिधी उपस्थित होते.

बैठकीत भिवंडी शहरात अनधिकृत वैद्यकीय व्यवसाय करणाऱ्या ७८ बोगस डॉक्टरांविरुद्ध महाराष्ट्र मेडिकल प्रॅक्टिशनर्स अॅक्ट, १९६१ मधील कलम ३३ व ३६ तसेच भारतीय न्याय संहितेच्या कलम ३१८ (४) अंतर्गत संबंधित पोलीस ठाण्यांमध्ये गुन्हे दाखल करून करण्यात आलेल्या कारवाईचा आढावा घेण्यात आला.

याशिवाय, महानगरपालिका कार्यक्षेत्रातील सर्व वैद्यकीय व्यवसायिकांची माहिती संकलित करण्याचे आदेश देण्यात आले होते. त्यानुसार १ ते २० नागरी आरोग्य केंद्रांमार्फत एकूण ४५२ डॉक्टरांची यादी तयार करण्यात आली. या यादीतील ३३ डॉक्टरांच्या वैद्यकीय शैक्षणिक पात्रतेबाबत संशय निर्माण झाल्याने त्यांच्या कागदपत्रांची पडताळणी करून आवश्यक कायदेशीर कारवाई करण्याचे आदेश उपसंचालक (आरोग्य सेवा) यांनी दिले आहेत.

बैठकीत विविध शासकीय आरोग्य योजना प्रभावीपणे राबविणे, विशेषतः HPV लसीकरण मोहिमेला गती देण्याबाबतही सूचना देण्यात आल्या. तसेच शहरातील सर्व वैद्यकीय व्यवसायिकांनी महानगरपालिकेला सहकार्य करावे, असे आवाहन करण्यात आले.

भिवंडी महानगरपालिकेने बोगस डॉक्टरांविरोधातील मोहीम आगामी काळात आणखी तीव्र करण्यात येणार असल्याचे स्पष्ट केले असून नागरिकांच्या आरोग्याशी कोणतीही तडजोड केली जाणार नसल्याचा इशाराही प्रशासनाने दिला आहे.