पालघर जिल्हातील पत्रकारांची परिचय केंद्राला भेट !
नवी दिल्ली, प्रतिनिधी : पालघर जिल्हातील पत्रकारांनी महाराष्ट्र परिचय केंद्राला आज भेट दिली. त्यांनी यावेळी महाराष्ट्र परिचय केंद्राच्या वैविद्यपूर्ण कार्याची माहिती जाणून घेतली.
दिल्ली अभ्यास दौ-यावर असणा-या 22 प्रिंट व इलेक्ट्रानिक माध्यमांतील पत्रकारांनी महाराष्ट्र परिचय केंद्राला भेट दिली. परिचय केंद्राचे प्रभारी उपसंचालक अमरज्योत कौर अरोरा यांनी महिला पत्रकार नीता चौरे यांना पुष्पगुच्छ देऊन प्रातिनिधिक स्वरुपात उपस्थितांचे स्वागत केले.
यावेळी औपचारिक वार्तालाप झाला. महाराष्ट्र शासनाच्या माहिती व जनसंपर्क महासंचालनालयाअंतर्गत दिल्लीत कार्यरत महाराष्ट्र परिचय केंद्राच्या कार्याची वैविद्यपूर्ण माहिती प्रभारी उपसंचालक अरोरा यांनी दिली. महाराष्ट्राबाहेरील मराठी मंडळांशी साधण्यात येणारा समन्वय, महाराष्ट्र सदनात कार्यरत खासदार कक्षाद्वारे साधण्यात येणारा समन्वय याबाबत त्यांनी माहिती दिली. तसेच, सर्व राज्यांची दिल्लीत असलेले माहिती कार्यालये, दिल्लीस्थित मराठी व अन्य प्रादेशिक, राष्ट्रीय प्रसारमाध्यमांशी साधण्यात येणारा समन्वय तसेच परिचय केंद्रातर्फे राबविण्यात येणारे विविध उपक्रम, शासनाचा जनसंपर्क साभांळताना घ्यावी लागणारी खबरदारी आदींची विस्तृत माहितीही श्रीमती अरोरा यांनी दिली.
महाराष्ट्र परिचय केंद्राची एसएमएस सेवा, कार्यालयाचे तीन भाषेतील अधिकृत ट्विटर हँडल, फेसबुक पेजेस, युटयुब चॅनेल, ब्लॉग, इंस्टाग्राम, व्हॉटसॲप ग्रुप आदीं समाज माध्यमातून शासनाची प्रभावीपणे करण्यात येणारे प्रसिध्दी विषयक कार्याची श्रीमती अरोरा यांनी माहिती दिली. सर्व पत्रकार सदस्यांना यावेळी लोकराज्य अकांच्या प्रती भेट स्वरुपात देण्यात आल्या.
No comments:
Post a Comment