शेत जमिनीच्या वादातून दोन सख्या भावांची निर्घृण हत्या करणाऱ्या आरोपीला अटक !!

शेत जमिनीच्या वादातून दोन सख्या भावांची निर्घृण हत्या करणाऱ्या आरोपीला अटक !!

भिवंडी, दीं,४,अरुण पाटील (कोपर) :

            सद्या ठाणे जिल्ह्यातील ग्रामीण भागात जमीन विकासक आल्यामुळे शेत जमिनीला सोन्याचा भाव येत असल्याने या परिसरात  जमिनीचे वाद नेहमी पाहायला मिळत आहेत .अशीच एक घटना शहापूर तालुक्यातील सरलांबे गावात घडली असून यात दोघा सख्या भावांच्या निर्घृण हत्त्ये  प्रकरणी शहापुर पोलिसांनी एका आरोपीला अटक केली आहे.

           सविस्तर हकीगत अशी की ,शहापूर पोलीस ठाण्याच्या  हद्दीतील सरलांबे गावात दुहेरी  हत्याकांड घडलं असून पोलिसांनी  त्या संदर्भात  गुन्हा दाखल केला आहे. मात्र या घटनेमुळे परिसरात खळबळ माजली असून सरलांबे गावातून एका हल्लेखोराला शहापूर पोलिसांनी मोठ्या शिताफीने अटक केली आहे. 

          सोमनाथ अधिकारी (रा. सरलांबे) असे दुहेरी हत्याकांडात अटक आरोपीचे नाव आहे. तर योगेश धर्मा अधिकारी ( वय ३०), आणि पुंडलिक धर्मा अधिकारी (वय ३५) असे निर्घृण हत्या झालेल्या दोघा सख्या भावांची नावे आहेत.मृतक योगेश धर्मा अधिकारी व पुंडलिक धर्मा अधिकारी हे दोघे भाऊ ठाणे जिल्ह्यातील शहापूर तालुक्यातील सरलांबे गावात कुटुंबासह राहत होते. 

          या घटनेत रविवारी रात्रीच्या सुमारास मृत दोघे भाऊ आणि आरोपी सोमनाथ अधिकारी हे तिघे आरोपी सोमनाथच्या शेतातील घरात दारू पीत बसले होते. दारूच्या नशेत असतानाच, त्याच सुमारास पूर्वीच्या शेतजमिनीच्या कारणावरून त्यांच्यात वाद झाला होता. मात्र हा वाद एवढा विकोपाला गेला की, आरोपी सोमनाथ याने या दोघा भावांच्या डोक्यात व मानेवर धार-धार शस्त्राचे घाव घालून त्यांना जागीच ठार करून घटना स्थळावरून पळून गेला.

          या घटनेची माहिती शहापूर पोलिसांना मिळताच पोलीस पथक घटनास्थळी दाखल होऊन पंचनामा करत दोघा भावांचे मृतदेह शव विच्छेदना साठी शहापूर उपजिल्हा ग्रामीण रुग्णालयात रवाना केले. दुहेरी हत्याकांच्या प्रकरणी मृतक भावांचे वडील धर्मा अधिकारी यांनी शहापूर पोलिसांत सोमवार (दीं,३) रोजी गुन्हा दाखल करून आरोपींचा शोध सुरू केला असता, काही तासातच आरोपी सोमनाथ अधिकारी याला पोलीस पथकाने सरलांबे गावातून अटक केली आहे.

           आता पोलिसांनी आरोपी सोमनाथ सोबत आणखी कोणी गुन्ह्यात आरोपींचा सहभाग आहे का ? या दिशेने तपास सुरू केल्याची माहिती पोलीस निरीक्षक राजकुमार उपासे यांनी दिली आहे. तसेच जमिनीच्या वादातूनच दुहेरी हत्याकांड झाल्याचा अंदाज पोलिसांनी वर्तवला आहे. या घटनेचा अधिक तपास शहापूर पोलीस करीत आहेत.