८ मार्चला महिलांचा भव्य ‘रक्तदान उत्सव माहीमच्या शितला देवी आदिशक्तीच्या दरबारात घुमणार नारीशक्तीचा हुंकार. !!

८ मार्चला महिलांचा भव्य ‘रक्तदान उत्सव माहीमच्या शितला देवी आदिशक्तीच्या दरबारात घुमणार नारीशक्तीचा हुंकार. !!

प्रतिनिधी - निलेश कोकमकर 

      स्त्री ही केवळ मायेचा पाझ नसून ती समाजाला जीवदान देणारी 'शक्ती' सुद्धा आहे. याच आदिशक्तीचा जागर करण्यासाठी आणि जागतिक महिला दिनाचे औचित्य साधून, मुंबईतील ऐतिहासिक शितलादेवी मंदिर, माहीम येथे एक अनोखा आणि पवित्र संगम पाहायला मिळणार आहे. जीएसबी टेंपल ट्रस्ट आणि जीवनदाता सामाजिक संस्था (महिला परिवार) यांच्या संयुक्त विद्यमाने ‘आदिशक्तीच्या दरबारात नारीशक्तीच्या रक्तदानाचा उत्सव’ या उपक्रमा अंतर्गत महिलांसाठीच  विशेष रक्तदान शिबिराचे आयोजन सकाळी ९ ते दुपारी ४ या वेळेत करण्यात आले आहे.

        महिलांकडून, महिलांसाठी... एक आगळावेगळा पुढाकार असणार आहे. या शिबिराचे सर्वात मोठे वैशिष्ट्य म्हणजे हे संपूर्ण आयोजन महिलांच्या नेतृत्वाखाली पार पडत आहे. 

        आज महिला सर्वच क्षेत्रांत अग्रेसर आहेत. प्रशासन, उद्योग, क्रीडा, आरोग्य, शिक्षण अशा प्रत्येक क्षेत्रात त्यांनी आपली स्वतंत्र ओळख निर्माण केली आहे. मग रक्तदानासारख्या समाजोपयोगी आणि जीवनदायी कार्यातही महिलांनी पुढाकार घेऊन समाजापुढे नवा आदर्श ठेवावा, तसेच इतरांना रक्तदानासाठी प्रेरित करावे. रक्तदानाबाबत स्त्रियांच्या मनात असलेले भीतीचे मळभ दूर करून, त्यांच्यात 'होय, आम्ही सुद्धा जीवदान देऊ शकतो' हा आत्मविश्वास निर्माण करणे, हा या उपक्रमाचा मुख्य उद्देश आहे.

       "महिलांना जेव्हा योग्य संधी आणि व्यासपीठ मिळते, तेव्हा त्या प्रत्येक आव्हानावर मात करतात. गेल्या सात वर्षांपासून आमचा हाच अनुभव आहे की, स्त्रिया अतिशय अभिमानाने या कार्यात सहभागी होऊन रक्तदान करण्यास पुढे येतात," असे या विशेष रक्तदान शिबिराच्या संयोजिका सौ. वीणा आमडोसकर यांनी सांगितले.

         भीती नको, फक्त सहभाग हवा! अनेकदा हिमोग्लोबिन कमी असणे किंवा अशक्तपणा यांसारख्या शंकांमुळे महिला रक्तदानासाठी कचरतात. मात्र, या शिबिरात प्रथम तज्ज्ञ डॉक्टरांकडून पूर्ण तपासणी केली जाणार आहे. रक्तदानासाठी प्रकृती योग्य असेल तरच रक्त घेतले जाईल. त्यामुळे मुंबईतील माता-भगिनींनी किमान तपासणीसाठी तरी यावे, त्या निमित्ताने तुमचे हिमोग्लोबिनची तपासणी होईल. असे आवाहन करण्यात आले आहे.

        हे शिबिर श्री शितलादेवी मातेच्या पवित्र प्रांगणात होत असल्याने, येथील वातावरण आध्यात्मिक ऊर्जेने भरलेले असेल. जर एखाद्या भगिनीचे रक्तदान वैद्यकीय कारणास्तव शक्य झाले नाही, तरी आयोजकांच्या वतीने सन्मान तर होईलच व तिला मातेचे दर्शन आणि प्रसादाचा लाभ घेता येईल. ज्या महिलांचे रक्तदान झाले तर जीवनदान आणि न झाले तर देवदर्शन' असा हा दुहेरी आनंदाचा सोहळा असणार आहे. याप्रसंगी रक्तदान करणाऱ्या प्रत्येक महिलेचा विशेष सत्कार केला जाईल. 

         या उपक्रमासोबतच महिलांसाठी अजून एक महत्त्वपूर्ण आरोग्य उपक्रम राबविण्यात येणार आहे. मुंबई (बॉम्बे)हॉस्पिटलचे प्रख्यात ऑर्थोपेडिक सर्जन डॉ. सुजित कोरडे हे स्वतः त्यांच्या तज्ज्ञ टीमसह उपस्थित राहून महिलांच्या अस्थीरोगासंबंधी तपासणी व मार्गदर्शन करणार आहेत.

         याच उपक्रमात स्वर्गीय अजित दादा पवार यांच्या स्मरणार्थ श्रीमती सुनीता निवळे यांच्या वतीने सामाजिक आणि रक्तदान क्षेत्रात मोलाचे योगदान देणाऱ्या रणरागिणींना  ‘आदीशक्ती पुरस्कार २०२६’ देऊन गौरविण्यात येणार आहे. अधिक माहितीसाठी व नोंदणी साठी _

संपर्क: वीणा आमडोसकर: ९००४२३६०३६, जान्हवी नाईक: ७०३९४७५३१२

"चला, या जागतिक महिला दिनी केवळ शुभेच्छा न देता, आपल्या रक्ताने कोणाचे तरी प्राण वाचवूया आणि माणुसकीचा हा सोहळा साजरा करूया!" असे आवाहन जीवनदाता सामाजिक संस्थेच्या वतीने करण्यात आले आहे.