ठाण्यात लाचलुचपत प्रतिबंधक विभागाची कारवाई; शाळा प्रवेशासाठी लाच घेताना दोघे जाळ्यात !!

ठाण्यात लाचलुचपत प्रतिबंधक विभागाची कारवाई; शाळा प्रवेशासाठी लाच घेताना दोघे जाळ्यात !!

*ठाणे, दि. २९ जून* : ठाण्यातील एका खासगी शाळेत इयत्ता सहावीच्या प्रवेशासाठी लाच मागून त्यातील रक्कम स्वीकारताना लाचलुचपत प्रतिबंधक विभागाने (एसीबी) दोन जणांना रंगेहाथ पकडले. या कारवाईमुळे खासगी शैक्षणिक प्रवेशातील गैरप्रकार पुन्हा चर्चेत आले आहेत.

एसीबीने दिलेल्या माहितीनुसार, राबोडी येथील तक्रारदार महिलेच्या मुलीचा घोडबंदर रोड परिसरातील खासगी शाळेत प्रवेश करून देण्यासाठी आरोपींनी १ लाख रुपयांची लाच मागितली होती. तक्रारीची पडताळणी केल्यानंतर एसीबीने सापळा रचला.

तडजोडीनंतर आरोपींनी लाचेच्या रकमेपैकी ७७ हजार ३०० रुपये स्वीकारताच एसीबीच्या पथकाने दोघांना ताब्यात घेतले. फातिमा अन्सारी (वय ३५, रा. राबोडी, ठाणे) आणि चैतन्य प्रदीप प्रधान (रा. ठाणे) अशी अटक केलेल्या आरोपींची नावे आहेत.

याप्रकरणी राबोडी पोलीस ठाण्यात गुन्हा दाखल करण्याची प्रक्रिया सुरू आहे. पोलीस अधीक्षक शिवराज पाटील, अपर पोलीस अधीक्षक सुधाकर शिंदे आणि उपअधीक्षक भगवत सोनवणे यांच्या मार्गदर्शनाखाली पोलीस निरीक्षक संतोष नावलगी यांच्या पथकाने ही कारवाई केली.