Saturday, 31 October 2026

मास्टर मरीन मेहर यार्ड कंपनीविरोधातील गेट बंद आंदोलन स्थगित; मागण्या मान्य !!

मास्टर मरीन मेहर यार्ड कंपनीविरोधातील गेट बंद आंदोलन स्थगित; मागण्या मान्य !!

*अजित कृष्णा म्हात्रे यांच्या नेतृत्वाखालील आंदोलनाला यश; १९ प्रकल्पग्रस्तांना टप्प्याटप्प्याने नोकरी देण्याचे आश्वासन*

*उरण, दि. ३१ (विठ्ठल ममताबादे) :* उरण तालुक्यातील खोपटे येथील मास्टर मरीन मेहर यार्ड कंपनीविरोधात स्थानिक बेरोजगारांना रोजगार आणि प्रकल्पग्रस्त शेतकऱ्यांना व्यवसायाच्या संधी मिळाव्यात, या मागणीसाठी दि. २९ ऑक्टोबर २०२६ पासून सुरू असलेले गेट बंद आंदोलन अखेर स्थगित करण्यात आले आहे.

दि. ३१ ऑक्टोबर रोजी आंदोलनाचा तिसरा दिवस होता. लोकशाही, कायदेशीर आणि शांततेच्या मार्गाने आक्रमकपणे करण्यात आलेल्या या आंदोलनाला यश आले आहे. कंपनी प्रशासनाने बेरोजगार प्रकल्पग्रस्त शेतकऱ्यांच्या मागण्या मान्य केल्या आहेत.

१९ स्थानिक बेरोजगार प्रकल्पग्रस्त शेतकऱ्यांपैकी १० जणांना दोन दिवसांत आणि उर्वरित ९ जणांना पुढील महिन्यात म्हणजेच नोव्हेंबरमध्ये कामावर घेण्याचे कंपनी प्रशासनाने मान्य केले आहे. त्यामुळे स्थानिक प्रकल्पग्रस्तांमध्ये आनंदाचे वातावरण असून जल्लोष करण्यात आला.

मोठेखार (वरचा भाग) प्रकल्पग्रस्त शेतकरी संघटना, खोपटे-बांधपाडा यांच्या माध्यमातून सामाजिक कार्यकर्ते अजित कृष्णा म्हात्रे यांच्या नेतृत्वाखाली हे आंदोलन सुरू करण्यात आले होते. मात्र सर्व प्रकल्पग्रस्त शेतकऱ्यांना प्रत्यक्षात कामावर घेतले नाही, तर पुन्हा उग्र आंदोलन छेडण्याचा इशारा संघटनेने दिला आहे.

*सर्वपक्षीय पाठिंबा*

या आंदोलनाला सर्वच राजकीय पक्षांनी पाठिंबा दिला होता. आमदार महेश बालदी, माजी आमदार मनोहरशेठ भोईर, भाजपा युवा नेते प्रशांत ठाकूर, शिवसेना नेते बी. एन. डाकी, उरण नगरपरिषदेच्या नगराध्यक्षा भावनाताई घाणेकर, पंचायत समिती सदस्य दीपक भोईर, कविता रुपेश पाटील, कामगार नेते रवी घरत, मनसेचे तालुकाध्यक्ष सत्यवान भगत, महेंद्र पाटील, काँग्रेस तालुकाध्यक्ष विनोद म्हात्रे, सभापती राजेंद्र म्हात्रे, पोलीस पाटील रंगनाथ पाटील, माजी सरपंच विशाखा ठाकूर, प्रीती पाटील, अविनाश ठाकूर, भाजपा नेते किरण म्हात्रे, विश्वास पाटील, उद्योजक देवेंद्र पाटील, बबन ठाकूर, सुधाकर पाटील, संतोष पाटील, अलंकार पाटील, कुमार ठाकूर, हसूराम घरत यांच्यासह सर्वपक्षीय नेते, पदाधिकारी आणि ग्रामस्थांनी आंदोलन यशस्वी करण्यासाठी मेहनत घेतली.

या आंदोलनात सहभागी झालेल्या सर्व राजकीय पक्षांचे नेते, सामाजिक संस्था, कार्यकर्ते, ग्रामस्थ आणि ग्रामपंचायत बांधपाडा (खोपटे) यांचे मोठेखार प्रकल्पग्रस्त शेतकरी संघटनेने आभार मानले आहेत.

माणगावच्या अन्नत्याग आंदोलनाची खासदार सुप्रियाताई सुळे यांनी घेतली दखल; भावनाताई घाणेकर यांच्या माध्यमातून आंदोलकांशी संवाद !!

माणगावच्या अन्नत्याग आंदोलनाची खासदार सुप्रियाताई सुळे यांनी घेतली दखल; भावनाताई घाणेकर यांच्या माध्यमातून आंदोलकांशी संवाद !!

उरण दि ३१, (विठ्ठल ममताबादे) : रायगड जिल्ह्यातील सर्व १४ तालुके दुष्काळग्रस्त जाहीर करावेत, शेतकऱ्यांना हेक्टरी १ लाख रुपये व शेतमजुरांना २५ हजार रुपये आर्थिक मदत द्यावी, रोजगार हमीची कामे सुरू करावीत आणि शेतकऱ्यांच्या मुलांचे शैक्षणिक शुल्क माफ करावे, या मागण्यांसाठी माणगाव तहसील कार्यालयासमोर राष्ट्रवादी काँग्रेस पार्टी शरदचंद्र पवार पक्षाचे तालुकाध्यक्ष  राजू मोहन रोडेकर व विधानसभा अध्यक्ष  संताजी पवार यांच्या नेतृत्वाखाली सुरू असलेल्या जाहीर अन्नत्याग आंदोलनाला उरणच्या नगराध्यक्ष भावनाताई घाणेकर यांनी भेट देऊन आंदोलकांशी संवाद साधला.

यावेळी भावनाताईंनी माणगावचे तहसीलदार  विपिन लोकारे यांच्याशी चर्चा केली. तसेच खासदार सुप्रियाताई सुळे यांच्याशी दूरध्वनीद्वारे संपर्क साधून आंदोलकांच्या मागण्या व व्यथा त्यांच्यापर्यंत पोहोचवल्या. भावनाताईंच्या पुढाकारातून सुप्रियाताईंनी थेट आंदोलनकर्त्यांशी संवाद साधत संबंधित अधिकाऱ्यांशी चर्चा केली आणि आंदोलकांच्या मागण्या जिल्हाधिकारी व शासनापर्यंत तातडीने पोहोचविण्याचे निर्देश दिले.

आज आंदोलनाचा चौथा दिवस असूनही शासनाकडून ठोस निर्णय झालेला नाही. शेतकरी व शेतमजुरांच्या न्याय्य हक्कांसाठी सुरू असलेल्या या लढ्याला भावनाताई घाणेकर यांनी ठाम पाठिंबा दर्शविला असून, मागण्यांना न्याय मिळेपर्यंत या संघर्षात खंबीरपणे सोबत राहण्याची भूमिका घेतली आहे

दिवाळीनिमित्त सुवर्णसंधी! आर्या फाऊंडेशन व लक्ष्मण कृष्णा पावशे सामाजिक संस्था च्या वतीने स्वयंरोजगार मेळावा; फक्त ५१ हजारात टुरिस्ट कार !!

दिवाळीनिमित्त सुवर्णसंधी! आर्या फाऊंडेशन व लक्ष्मण कृष्णा पावशे सामाजिक संस्था च्या वतीने स्वयंरोजगार मेळावा; फक्त ५१ हजारात टुरिस्ट कार !!

*कल्याण डोंबिवली, दीपक इंगळे : *

*कोपरगाव, दिनांक : ३१ ऑक्टोबर* दिवाळी सणाचे औचित्य साधून आर्या फाऊंडेशन आणि कै. लक्ष्मण कृष्णा पावशे सामाजिक संस्था (रजि.) यांच्या संयुक्त विद्यमाने दिवाळीत महिला व पुरुष स्वयंरोजगार मेळाव्याचे दोन दिवसीय आयोजन करण्यात आले आहे. या मेळाव्यातून बेरोजगार तरुण-तरुणींना स्वतःच्या पायावर उभे राहण्याची मोठी संधी मिळणार. त्यात पहिल्या दिवशी १७० बेरोजगार तरुण-तरुणींनी उपस्थिती दर्शवली त्यापैकी १६ जणांनी ५१,००० हजार रुपयांची रक्कम भरून स्वतःचा व्यसायाचा शुभारंभ केला. 

*मेळाव्याचे वैशिष्ट्य -*

या मेळाव्यात फक्त ५१,००० हजार रुपयांमध्ये टुरिस्ट कार उपलब्ध करून दिली जाणार आहे. इच्छुकांना वाहन खरेदीसाठी शासकीय योजनांचा लाभ मिळवून दिला जाणार आहे.

- *PMEGP / CMEGP योजनेअंतर्गत ३५% सबसिडी*

महिलांसाठी 'आई योजना' अंतर्गत १५ लाख रुपयांपर्यंतच्या कर्जाला ०% व्याजदर, १००% रोजगाराची गॅरंटी अधिकृत बँकेकडून कर्ज सहाय्य, हा मेळावा आज दिनांक ३१ ऑक्टोबर २०२६ ते उद्या ०१ नोव्हेंबर २०२६ या दोन दिवस आयोजित करण्यात आला आहे.

या उपक्रमाचे आयोजक शिवसेना शाखा *कोपरगाव चे कार्यसम्राट मा. नगरसेवक, संजय लक्ष्मण पावशे (S.E.O. - उपशहर प्रमुख व सभापती परिवहन समिती क.डो.म.पा.)* आणि *सौ. अपर्णा संजय पावशे (S.E.O. शाखा संघटिका)* आहेत.

स्वयंरोजगाराची इच्छा असलेल्या महिला व पुरुषांनी या संधीचा लाभ घ्यावा, असे आवाहन आयोजकांकडून करण्यात आले आहे.

*स्थळ: गावदेवी मित्र मंडळ, गावदेवी मैदान, कोपरगाव*
*संपर्क: ७३०४५५७१९१ / ७२६२८५१४५५ / ९८७०३६३८८५*

धक्कादायक ! कल्याण तालुक्यातील १७४ एकर सरकारी गुरचरण जमीन बिल्डरांनी हडपली; महसूल मंत्री, जिल्हाधिकारी आणि MMRDA कडे तक्रार !!

धक्कादायक ! कल्याण तालुक्यातील १७४ एकर सरकारी गुरचरण जमीन बिल्डरांनी हडपली; महसूल मंत्री, जिल्हाधिकारी आणि MMRDA कडे तक्रार !!

*मौजे माणगाव, कोळे, काटई, घारीवली, संदप, उसरघर मधील घोटाळा; जुपिटर हॉस्पिटल, लोढा-रुणवाल बिल्डरला बेकायदेशीर विक्री केल्याचा भालचंद्र पाटील यांचा आरोप; चौकशीची मागणी*

*कल्याण डोंबिवली, दीपक इंगळे :*

*डोंबिवली, दिनांक : ३१ ऑक्टोबर* कल्याण तालुक्यातील ६ गावांमधील तब्बल १७४ एकर २२ गुंठे सरकारी गुरचरण जमीन काही विकासकांनी संगनमताने हडप करून शासनाची कोट्यवधींची फसवणूक केल्याचा धक्कादायक प्रकार समोर आला आहे.

या प्रकरणी सामाजिक कार्यकर्त्यांनी महसूल मंत्री चंद्रशेखर बावनकुळे, ठाणे जिल्हाधिकारी आणि MMRDA, बांद्रा यांच्याकडे लेखी तक्रार दाखल करत सखोल चौकशीची मागणी केली आहे. पत्रावर काँग्रेस नेते नाना पटोले यांचा संदर्भ क्रमांक SKL/921/2026 देखील नमूद आहे.

*काय आहे प्रकरण?*

 मौजे माणगाव (सर्व्हे क्र. ७१, ७६/१, ७५), मौजे कोळे (७६/२, ७७), मौजे काटई (क्र. ९९), मौजे घारीवली (५५, ४३, ४२/१), मौजे संदप (२१/१ व २१/२) आणि मौजे उसरघर (९५, ९३, १०९) येथील ही जमीन मुळात सरकारी गुरचरण म्हणून नोंद होती. ती त्या-त्या गावच्या ग्रामपंचायतीकडे सार्वजनिक कामासाठी काही अटी-शर्तींवर दिली होती.

 १९६३ मध्ये प्रिमियर कंपनी लिमिटेड, कुर्ला यांनी तत्कालीन सरपंच यांच्याकडून ही सरकारी जमीन विकत घेतल्याचे फेरफार क्र. ६९५, ३७०, ३९८, २०६, ८२, ४९३ मध्ये दाखवण्यात आले. सरपंचाला सरकारी जमीन विकण्याचा कोणताही अधिकार नसताना हा व्यवहार करण्यात आला. नंतर हीच जमीन प्रिमियर ऑटोमोबाईल लिमिटेडच्या नावावर करण्यात आली.

त्यानंतर २००७ मध्ये तहसीलदार कल्याण यांच्याकडील RTS दावा क्र. ५/०७ आणि नंतर उपजिल्हाधिकारी उल्हासनगर यांच्या आदेशाने या जमिनीवर ULC Act कलम २० व २१ अन्वये गृहबांधणी म्हणून शेरा मारण्यात आला, जो कायद्याने लागू होत नाही.

त्यानंतर जिल्हाधिकाऱ्यांच्या आदेशाचा (क्र. महसूल कक्ष-१/टे-७/ मौजे माणगाव, कोळे, घारीवली, काटई /वर्ग-१ रूपांतरण) १०% रकमेवर भोगवटदार-२ चा शेरा घेऊन, काही विकासकांनी संदर्भिय दस्त क्र. ९५७०/२०२२ नुसार

१) जुपिटर लाईफ लाईन हॉस्पिटल तर्फे हर्षद पुराणी
२) होरायझन प्रोजेक्ट प्रा. लि. तर्फे डायरेक्टर संदीप सुभाष रुणवाल
३) सुंदर निवास LLP तर्फे उमेशकुमार उपाध्याय

यांना बेकायदेशीर विक्री केल्याचा आरोप आहे.

सध्या या मोकळ्या जमिनीवर जुपिटर हॉस्पिटल उभारले असून, त्यातील पोलिसांची वसाहत, लोढा-मायक्रोटेक कंपनीने अनधिकृत सेल्स ऑफिस, निवासी व व्यावसायिक सदनिका बांधून लाखो रुपयांना विकल्याचा आणि काही भाग मेट्रो मार्गिकेसाठी भूसंपादित करून त्याचा मोबदला बिल्डरांनी लाटल्याचा गंभीर आरोप तक्रारीत करण्यात आला आहे.

मौजे संदप व उसरघर येथे देखील सुंदर निवास प्रॉपर्टी व रुणवाल बिल्डरने अशाच प्रकारे सदनिका बांधून विक्री केल्याचे म्हटले आहे.

त्यामुळे हा संपूर्ण व्यवहार बेकायदेशीर असून सर्व सरकारी गुरचरण जमीन पुन्हा शासनाच्या नावे करून सार्वजनिक हितासाठी मोकळी करावी, अशी मागणी राष्ट्रवादी काँग्रेस पक्ष शरदचंद्र पवार गटाचे शहराध्यक्ष भालचंद्र पाटील यांनी केली आहे.

बंधारा आणि अवकाळी पावसातून वाचलेल्या भाताच्या झोडणीसाठी वयोवृद्ध आजीची खळे करण्यासाठी धडपड !!

बंधारा आणि अवकाळी पावसातून वाचलेल्या भाताच्या झोडणीसाठी वयोवृद्ध आजीची खळे करण्यासाठी धडपड !!

*कल्याण (संजय कांबळे) :* चुकीच्या ठिकाणी विनापरवानगी शाई नदीवर बंधारा बांधल्याने शहापूर तालुक्यातील खरांगण गावातील वयोवृद्ध महिला शेतकरी सोनूबाई वाळकू हरड यांची भातशेती वाहून गेली. त्यातून वाचलेल्या थोड्याफार पिकाची काल झालेल्या अवकाळी पावसाने दाणादाण उडवली. तरीही खचून न जाता उरलेले पीक घरी यावे म्हणून ही आजी अंगणात शेणकाला टाकून झोडणीसाठी खळे तयार करण्याची धडपड करत आहे. शेतकऱ्याला आपली शेती किती महत्त्वाची असते, हेच यातून दिसून येते.

खरांगण येथील सोनूबाई हरड या भात, उडीद, भुईमूग, नागली आदी पिके घेऊन कुटुंबाचा उदरनिर्वाह करतात. पतीच्या निधनानंतर त्यांचे संपूर्ण जीवन शेतीवरच अवलंबून असल्याने त्या शेतीकडे विशेष लक्ष देत होत्या.

सुमारे ५ ते ६ महिन्यांपूर्वी त्यांच्या शेतीलगत जलसंधारण विभागाने ठेकेदार किरण गायकवाड यांच्या माध्यमातून सुमारे ९८ लाख रुपये खर्च करून शाई नदीवर बंधारा बांधला. कागदोपत्री हा बंधारा सावरोली-खरपत येथे दाखवण्यात आला असला, तरी प्रत्यक्षात तो खरांगण गावाजवळ बांधण्यात आला आहे, असा आरोप आहे.

या बंधाऱ्यामुळे नदीच्या पाण्याचा फुगवटा निर्माण होऊन नदीने प्रवाह बदलल्याने हरड यांची भातशेती पूर्णपणे वाहून गेली. हा बंधारा एका वनपालाच्या मुलाने बांधल्याने आणि त्याचे सर्वत्र आर्थिक हितसंबंध असल्याने तक्रारी करूनही उपयोग होत नसल्याचे सांगण्यात येते.

मात्र ही महिला शेतकरी जिद्दीला पेटली असून, जीव गेला तरी लढाई सुरूच ठेवणार असल्याचे तिने सांगितले. सर्व संकटातून वाचलेले भात घरी यावे म्हणून तिने अंगणाची साफसफाई करून, गवत काढून शेणकाला मारून खळे तयार करण्यास सुरुवात केली आहे. एखाद्या तरुणीला लाजवेल असे कष्ट ही आजी करत आहे.

या अन्यायकारक बंधारा आणि भ्रष्ट अधिकारी, ठेकेदार यांच्या विरोधात शहापूर तहसील कार्यालयासमोर आमरण उपोषण करणार असल्याचे वयोवृद्ध शेतकरी सोनूबाई हरड यांनी सांगितले आहे.

Friday, 30 October 2026

मास्टर मरीन मेहर यार्ड कंपनीविरोधात गेट बंद आंदोलन सुरू; मागण्या अमान्य केल्याने आंदोलन तीव्र !!

मास्टर मरीन मेहर यार्ड कंपनीविरोधात गेट बंद आंदोलन सुरू; मागण्या अमान्य केल्याने आंदोलन तीव्र !!

*स्थानिकांना रोजगार आणि प्रकल्पग्रस्तांना संधी द्यावी, या मागणीसाठी अजित म्हात्रे यांच्या नेतृत्वाखाली आंदोलन*

*उरण, दि. २९ (विठ्ठल ममताबादे) :* उरण तालुक्यातील खोपटे येथील मास्टर मरीन मेहर यार्ड कंपनीविरोधात स्थानिक बेरोजगारांना रोजगार द्यावा आणि प्रकल्पग्रस्त शेतकऱ्यांना नोकरी व व्यवसायात सामावून घ्यावे, या मागणीसाठी गुरुवारी, दि. २९ ऑक्टोबर २०२६ रोजी सकाळी ११ वाजल्यापासून गेट बंद आंदोलन सुरू करण्यात आले आहे.

दुपारी ११.३० वाजता कंपनीत स्थानिक बेरोजगार, प्रकल्पग्रस्त शेतकरी आणि कंपनी प्रशासन यांच्यात महत्त्वाची बैठक झाली. या बैठकीत सामाजिक कार्यकर्ते अजित म्हात्रे, शिवसेना नेते बी. एन. डाकी, भाजपा युवा नेते प्रशांत ठाकूर, पंचायत समिती सदस्या कविता रुपेश पाटील, कामगार नेते रवी घरत, मोठेखार (वरचा भाग) प्रकल्पग्रस्त शेतकरी संघटना, खोपटे-बांधपाडाचे पदाधिकारी उपस्थित होते. त्यांनी १९ बेरोजगार प्रकल्पग्रस्त शेतकऱ्यांना त्वरित कामावर रुजू करून घ्यावे, अशी आक्रमक मागणी मांडली.

यावेळी कंपनीचे अधिकारी आणि ठेकेदार उपस्थित होते. प्रशासनाने सध्या १० जणांना कामावर घेतो, ३ महिन्यांनी उर्वरित ९ जणांना घेतो, असे आश्वासन दिले. मात्र हा निर्णय प्रकल्पग्रस्तांना मान्य झाला नाही. सर्व १९ जणांना एकाच वेळी कामावर घ्यावे, टप्प्याटप्प्याने नको, अशी ठाम भूमिका शिष्टमंडळाने घेतली. कंपनीने ही मागणी अमान्य केल्याने आंदोलक आक्रमक झाले.

मागण्या अमान्य झाल्याने कंपनीच्या गेटसमोरच बेमुदत आंदोलन करण्याचा निर्णय घेण्यात आला.

*स्थानिकांवर अन्याय होत असल्याचा आरोप*

मेहर यार्ड कंपनीत पेण, अलिबाग, पनवेल तालुक्यातील ७० हून अधिक कामगार काम करत आहेत. मात्र ज्या शेतकऱ्यांच्या जमिनी कंपनीसाठी संपादित झाल्या, त्यांनाच कामावर घेतले जात नसल्याचा आरोप शिवसेना नेते बी. एन. डाकी यांनी केला. स्थानिकांना प्राधान्य देण्याऐवजी परप्रांतीय आणि उरणबाहेरील लोकांची भरती सुरू असून, यामुळे स्थानिक तरुणांवर अन्याय होत असल्याचे त्यांनी सांगितले.

लोकल लेबर, सर्व्हेअर, हाऊसकीपिंगसह इतर कामांसाठी स्थानिक तरुणांना संधी द्यावी, अशी मागणी आंदोलनाचे नेतृत्व करणारे अजित कृष्णा म्हात्रे यांनी केली. शासनाचा जीआर असतानाही कंपनी आणि ठेकेदार त्याचे उल्लंघन करत असून त्यांच्यावर गुन्हे दाखल झाले पाहिजेत, जोपर्यंत सर्व मागण्या मान्य होत नाहीत तोपर्यंत आंदोलन सुरूच राहील, अशी भूमिका त्यांनी मांडली.

७/१२ धारक प्रकल्पग्रस्त शेतकऱ्यांना कंपनीतील रोजगार आणि व्यवसायाच्या संधींमध्ये योग्य स्थान द्यावे, अशी मागणी सामाजिक कार्यकर्ते रुपेश पाटील यांनी केली.

मोठेखार (वरचा भाग) प्रकल्पग्रस्त शेतकरी संघटना, खोपटे-बांधपाडा यांच्या माध्यमातून हे आंदोलन सुरू करण्यात आले आहे.

*यावेळी* भाजपा युवा नेते प्रशांत ठाकूर, शिवसेना नेते बी. एन. डाकी, पंचायत समिती सदस्य दीपक भोईर, कविता रुपेश पाटील, रवी घरत, मनसे तालुकाध्यक्ष सत्यवान भगत, सभापती राजेंद्र म्हात्रे, पोलीस पाटील रंगनाथ पाटील, माजी सरपंच विशाखा ठाकूर, प्रीती पाटील, अविनाश ठाकूर, भाजपा नेते किरण म्हात्रे, विश्वास पाटील, उद्योजक देवेंद्र पाटील, कुमार ठाकूर, बबन ठाकूर, संतोष पाटील आदी उपस्थित होते.

राष्ट्रीय रिपब्लिकन पक्षाच्या नाशिक जिल्हाध्यक्ष (तृतीयपंथी आघाडी) पदी विनोद (आईसाहेब) वाघचौरे यांची निवड !!

राष्ट्रीय रिपब्लिकन पक्षाच्या नाशिक जिल्हाध्यक्ष (तृतीयपंथी आघाडी) पदी विनोद (आईसाहेब) वाघचौरे यांची निवड !!

नाशिक, गणेश ननगरे (प्रतिनिधी):- राष्ट्रीय रिपब्लिकन पक्ष अतिशय जोमाने संपूर्ण महाराष्ट्रात रिपब्लिकन चळवळ गतिमान करण्यासाठी राष्ट्रीय अध्यक्ष अण्णासाहेब कटारे यांच्या नेतृत्वाखाली काम करीत आहे.

नाशिक शहरात देखील पक्ष प्रवेश जोमाने सुरू आहे त्याच अनुषंगाने तृतीयपंथी यांच्या न्याय हक्कासाठी सर्वसामान्यांच्या न्याय हक्कासाठी विनोद आईसाहेब वाघचौरे यांची राष्ट्रीय रिपब्लिकन पक्षाच्या नाशिक जिल्हाध्यक्ष (तृतीयपंथी) आघाडीच्या अध्यक्ष पदी निवड राष्ट्रीय अध्यक्ष अण्णासाहेब कटारे यांनी जाहीर केली.

विनोद आईसाहेब वाघचौरे यांचा जनसंपर्क समस्त युवा/युवतींमध्ये दांडगा असून संपूर्ण नाशिक शहरात/जिल्ह्यात पक्ष मजबूत करून शाखा उदघाटन कार्यक्रम पार पडणार आहे. विनोद (आईसाहेब) वाघचौरे यांच्या निवडीने समस्त नाशिक शहरातील/जिल्ह्यातील यांच्या संपर्कातील नागरिकांमध्ये आनंदाचे उत्साहाचे वातावरण निर्माण झाले आहे. 

या निवडी प्रसंगी युवा नेतृत्व बिपीन कटारे, नाशिक युवा जिल्हाध्यक्ष जितू बागुल, रिपब्लिकन नेते आदेश पगारे, माया कांबळे, दीपक वाघचौरे, स्वप्नील साळवे आदी उपस्थितीत होते.

डाऊन सिंड्रोम असलेल्या पार्थची जिद्द, ७ वर्षीय आदीचा नवा विक्रम; सख्ख्या भावांची १८ किमीची समुद्री भरारी! !!

डाऊन सिंड्रोम असलेल्या पार्थची जिद्द, ७ वर्षीय आदीचा नवा विक्रम; सख्ख्या भावांची १८ किमीची समुद्री भरारी! !!

*उरण, विठ्ठल ममताबादे (दि. ३०) :* जिद्द, चिकाटी आणि मेहनतीच्या जोरावर अशक्य काहीच नसते, हे उरणमधील दोन सख्ख्या भावांनी सिद्ध केले आहे. एलिफंटा लेणी (घारापुरी) ते नागाव-पिरवाडी बीच (उरण) असे तब्बल १८ किलोमीटरचे समुद्री अंतर पोहून पार्थ निशांत पाटील आणि आदी निशांत पाटील या भावंडांनी इतिहास रचला आहे.

डाऊन सिंड्रोम असलेल्या १३ वर्षीय पार्थने ६ तास ५७ सेकंदात हे आव्हान पूर्ण करून प्रेरणा दिली, तर अवघ्या ७ वर्षीय आदीने ५ तास ५६ मिनिटांत हा टप्पा पार करून हा समुद्री मार्ग पूर्ण करणारा सर्वात लहान जलतरणपटू होण्याचा विक्रम केला आहे.

पार्थ हा सीबर्ड स्पेशल स्कूल, उरणचा विद्यार्थी असून आदी सेंट मेरी कॉन्व्हेंट स्कूलमध्ये इयत्ता तिसरीत शिकतो. शुक्रवार दि. ३० ऑक्टोबर रोजी पहाटे २.३० वाजता दोघांनी घारापुरीहून पोहण्यास सुरुवात केली आणि नागाव-पिरवाडी बीचवर यशस्वीरीत्या किनारा गाठला.

*पार्थची प्रेरणादायी कामगिरी*
डाऊन सिंड्रोम असलेल्या पार्थने सलग ६ तास ५७ सेकंदात समुद्रात पोहत १८ किमी अंतर पूर्ण केले. विशेष गरजा असलेल्या मुलांमध्येही अफाट क्षमता असते आणि योग्य संधी, प्रशिक्षण मिळाल्यास ते मोठे यश मिळवू शकतात, हा संदेश त्याने दिला. हा समुद्री मार्ग पूर्ण करणारा तो महाराष्ट्रातील पहिला डाऊन सिंड्रोम असलेला जलतरणपटू ठरला आहे.

*आदीचा विक्रम*
७ वर्षीय आदीने केवळ ५ तास ५६ मिनिटांत हा आव्हानात्मक मार्ग पूर्ण करत सर्वांचे लक्ष वेधून घेतले. या वयात इतका लांब समुद्री टप्पा पूर्ण करणे ही अत्यंत दुर्मिळ कामगिरी मानली जात आहे.

गेल्या चार वर्षांपासून दोघेही उरण म्युनिसिपल कौन्सिल आणि महाराष्ट्र राज्य अमॅच्युअर ॲक्वॅटिक असोसिएशनच्या स्पर्धांमध्ये पदके मिळवत आहेत.

या मोहिमेसाठी आंतरराष्ट्रीय सी-स्विमिंग कोच संतोष पाटील आणि स्विमिंग कोच विजय बेहेरा यांचे मार्गदर्शन लाभले. निरीक्षक म्हणून सुनील मयेकर आणि निल लब्दे, तर विंडसर्फिंग गोल्ड मेडलिस्ट राज पाटील आणि साई पाटील यांचे सहकार्य लाभले.

या यशामागे वडील निशांत पाटील आणि आई संपदा पाटील यांचा भक्कम पाठिंबा आहे. भविष्यात मोठ्या स्पर्धांमध्ये देशाचे नाव उज्ज्वल करण्याचे स्वप्न दोन्ही भावांनी बाळगले आहे.

ईगल फौंडेशनच्या वतीने पंढरपूर येथे वर्धापन दिनानिमित्त गुणगौरव सोहळ्याचे आयोजन !!

ईगल फौंडेशनच्या वतीने पंढरपूर येथे वर्धापन दिनानिमित्त गुणगौरव सोहळ्याचे आयोजन !!

पुणे, विलासराव कोळेकर सर

पंढरपूर येथे रविवार दि.१ नोव्हेंबर २०२६ रोजी ईगल फौंडेशनच्या वर्धापन दिनानिमित्त गुणगौरव सोहळ्याचे आयोजन करण्यात आल्याची माहिती अध्यक्ष विलासराव कोळेकर यांनी दिली. या निमित्ताने हिंगोलीचे खा.रामराव वडकुते, शिक्षक आमदार ज्ञानेश्वर म्हात्रे ,दै.आधुनिक केसरीचे संपादक डॉ. प्रभू गोरे व अखिल भारतीय मराठी परिषदेचे राष्ट्रीय अध्यक्ष श्री शिवराज काटकर यांना विशेष मानपत्र प्रदान करण्यात येणार आहे. याबरोबरच शैक्षणिक, सामाजिक, प्रशासकीय, उद्योग, कृषी, पत्रकारिता आदी क्षेत्रांतील कर्तृत्व संपन्न व्यक्तींना फौंडेशनचे पुरस्कार जाहीर करण्यात आले आहेत.त्यामध्ये सर्वश्री वैद्य विशाल उत्तम मोहिते व वैद्या सौ.पल्लवी विशाल मोहिते, सौ. रूपालीताई शिवाजीराव शिंदे, प्रा.राजकुमार बिराजदार, अनंत ज्ञानसागर अकॅडमी,पेठ वडगांव, राजुल अनिल लाईन्सवाला, श्रीमती शैला बैसाणे,सौ.वैशाली विक्रम पाटील, श्री अरविंद महाकाळ ,श्री शशांक पंकजा सचिन कुडाळकर, श्री सुनील श्रीरंग ढमाळ, श्री सचिन बैरागी, श्री राजेंद्र साईनकर, श्रीमती सुरेखा जनार्दन चिंधे ,प्रा.अमीर मुमताज सलीम इनामदार ,श्री सतिश राजाराम लाड, श्री बंडू ईश्वर मोरे , डॉ. सुरैय्यापरवीन सैय्यद जिलानीपशा जाहागिरदार, श्री दादासाहेब बाबुराव पांढरे , प्रा.डॉ.अलका पांडूरंग पाटील, डॉ.मोशिना शहानवाज मुल्ला, प्रा.सौ. वर्षा वैभव पाटील, श्री आण्णासाहेब बापूसो पिंगळे, सौ.विमल प्रकाश एडगे,श्री राजेश विश्वनाथ भोसले, सौ.वैष्णवी विनोद बोरगावकर , श्री संतोष प्रभाकर वाळींबे, इकबाल उसमान जमादार, महेश रावसाहेब पाटील, श्री उत्तम शिर्के, श्री संजय पाटील , डॉ.भगवान मोहिते, श्री हेमंत पोटे, प्रा.कोंडिबा शिंदे, श्री गंगाधर किसनराव उबाळे, श्री भिमराव मारुती ताटे, श्री विकास ज्ञानेश्वर गायकवाड , श्री बजरंग बबन पवार, श्री बाळकृष्ण तानीराम अमृतकर, श्री सचिन रामलाल सदावर्ते, श्री रविंद्र वसंतराव शिंगाडे यांचा समावेश आहे.सदर गुणगौरव सोहळा उत्कृष्टपणे पार पाडण्यासाठी प्रमुख पदाधिकारी श्री सागर पाटील,श्री दिनेश कांबळे,श्री बाबासाहेब राशिनकर,श्री प्रकाश वंजोळे, श्री दिपक पोतदार,श्री संजय गायकवाड, श्री अशोक शिंदे,श्री संपत जाधव,प्रा.महेश मोटे,श्री प्रशांत लाड,श्री शिरीष कुलकर्णी आदी परिश्रम घेत आहेत.

गटारे बनवण्याच्या नावाखाली मोठे झाड तोडले; दुसरे तोडण्यास रहिवाशांचा विरोध !!

गटारे बनवण्याच्या नावाखाली मोठे झाड तोडले; दुसरे तोडण्यास रहिवाशांचा विरोध !!

*डोंबिवली, राजू नलावडे :* राज्यात प्रकल्पांसाठी झाडे तोडण्यावरून वाद सुरू असताना डोंबिवली एमआयडीसी निवासी भागात विकासाच्या नावाखाली चांगली झाडे तोडली जात असल्याचा प्रकार समोर आला आहे.

एमआयडीसी निवासीमधील सर्व्हिस रोडवर भूखंड क्रमांक आरएम ३७ समोरील एक मोठे झाड दोन दिवसांपूर्वी काही अज्ञात व्यक्तींनी येऊन तोडून वाहनात भरून नेले होते. आज पुन्हा त्याच ठिकाणचे दुसरे झाड तोडण्यासाठी त्याच व्यक्ती आल्या असता स्थानिक रहिवाशांनी त्यांना जाब विचारला.

येथे मोठे नवीन गटार बनवायचे असल्याने हे झाड तोडावे लागेल, आम्ही एमआयडीसीच्या गटाराचे काम करणाऱ्या ठेकेदाराची माणसे आहोत, असे त्यांनी सांगितले. त्यावर रहिवाशांनी झाड तोडण्याची परवानगी दाखवण्यास सांगितले आणि विना परवानगी झाड तोडण्यास हरकत घेतल्यावर त्या व्यक्ती तेथून निघून गेल्या.

त्या व्यक्ती खरोखरच एमआयडीसी ठेकेदाराची माणसे होती की बेकायदेशीरपणे झाडे तोडणारी टोळी होती, याचा उलगडा झालेला नाही. याबाबत संबंधित उपअभियंता, एमआयडीसी यांच्याशी संपर्क साधला असता, त्यांनी भूखंड क्रमांक आरएम ३८ समोरील गुलमोहरचे फक्त एक झाड तोडण्यास वृक्ष प्राधिकरण, केडीएमसीकडून परवानगी मिळाल्याचे सांगितले आणि तसे परवानगी पत्रही पाठवले. त्यामुळे भूखंड आरएम ३७ समोरील दोन झाडे तोडायला आलेल्या व्यक्ती कोण होत्या, याबाबत एमआयडीसी अधिकारीही स्पष्ट उत्तर देऊ शकले नाहीत.

विशेष म्हणजे ज्या ठिकाणी झाड तोडण्यात आले, त्याच्या जवळच शैलगंगा मिलापनगर शहरी वन प्रकल्पासाठी (City Forest) एमआयडीसीकडून मिळालेल्या जागेत मागील पावसाळ्यात जंगली झाडे लावण्यात आली असून, काही वर्षांत तेथे जंगल तयार होणार आहे. म्हणजे एकीकडे संस्था आणि नागरिक झाडे लावत असताना दुसरीकडे प्रशासनाकडून विकासाच्या नावाखाली झाडे तोडली जात आहेत.

एमआयडीसी निवासी भागात गेल्या वर्षापासून नवीन काँक्रीट रस्ते बनवल्यानंतर नवीन नाले, गटारे आणि भूमिगत सांडपाणी वाहिन्या टाकण्याचे काम सुरू झाले असून, यामुळेच अनेक झाडे तोडली गेली किंवा कोसळली आहेत. एमआयडीसीत प्रदूषण असल्याने स्थानिक सामाजिक आणि रहिवासी संघटनांनी अनेक वर्षांपूर्वी झाडे लावली होती. विकासाच्या नावाखाली ती तोडल्याने किंवा कोसळल्याने अंदाजे २० टक्के झाडे एमआयडीसीत कमी झाली आहेत.

यामुळे प्रदूषण वाढणार असून, काँक्रीट रस्ते आणि झाडांचे प्रमाण कमी झाल्याने तापमानातही वाढ झाली आहे. सध्या या वृक्षतोडीविरोधात कोणताही लोकप्रतिनिधी बोलत नसल्याने नागरिकांमध्ये नाराजी आहे.

Thursday, 29 October 2026

रिजेन्सी अनंतम् संकुलात झाडांवर विजेच्या माळांची रोषणाई ! न्यायालयाचा निर्णय धाब्यावर !!

रिजेन्सी अनंतम् संकुलात झाडांवर विजेच्या माळांची रोषणाई ! न्यायालयाचा निर्णय धाब्यावर !!

*डोंबिवली, राजू नलावडे:* शहरातील विको नाका, कल्याण-शीळ रोडवरील रिजेन्सी अनंतम् संकुलाच्या मुख्य प्रवेशद्वारापासून पुढे सुमारे एक किलोमीटर रस्त्यावरील दुभाजक आणि रस्त्याच्या दुतर्फा असलेल्या शेकडो मोठ्या व छोट्या झाडांवर, वेलींवर विजेच्या माळांची रोषणाई करण्यात आली आहे.

अशा प्रकारे झाडांवर रोषणाई करण्यास न्यायालयाने मनाई केली असतानाही रिजेन्सी ग्रुप बिल्डरकडून हा आदेश धाब्यावर बसवण्यात आला आहे. ही रोषणाई दसरा सणापासून करण्यात आली असून दिवाळीपर्यंत म्हणजे १२ नोव्हेंबरपर्यंत ठेवण्यात येणार असल्याचे समजते. अनेक नवीन प्रोजेक्ट्स लाँच केले असल्याने ग्राहकांना आकर्षित करण्यासाठी चुकीचे आणि नियमबाह्य मार्केटिंग तंत्र म्हणून ही रोषणाई करण्यात आल्याचा आरोप होत आहे.

झाडांवर विद्युत रोषणाई करणे पर्यावरणाच्या दृष्टीने घातक असून यामुळे झाडांचे नुकसान तर होतेच, पण त्यावरील जीवसृष्टीला धोका पोहोचू शकतो. याच कारणामुळे मुंबई उच्च न्यायालयाने एका याचिकेवर पर्यावरणप्रेमींच्या बाजूने निकाल देत झाडांवर अशा विजेच्या माळांची रोषणाई करण्यास बंदी घातली होती.

रिजेन्सी ग्रुपसारखे मोठे बिल्डर पैशाच्या आणि राजकीय पाठबळाच्या जोरावर असे प्रकार करत असल्याचे दिसून येत आहे. विशेष म्हणजे ही रोषणाई करून दहा दिवस उलटूनही रिजेन्सी अनंतम् मधील रहिवासी किंवा तेथे जाणाऱ्या नागरिकांनी यावर आक्षेप घेतला नसल्याने आश्चर्य व्यक्त होत आहे.

याच डोंबिवलीत मागील मार्च महिन्यात गुढीपाडव्याच्या मुहूर्तावर फडके रोड आणि गणेश मंदिर परिसरात अशाच प्रकारे काही झाडांवर रोषणाई करण्यात आली होती. तेव्हा प्रतिष्ठित नागरिकांनी एकत्र येऊन विरोध केल्यानंतर आणि प्रशासनाकडे तक्रार केल्यानंतर आयोजकांनी ती रोषणाई काढली होती.

या पार्श्वभूमीवर रिजेन्सी अनंतम् मधील झाडांवरील ही अवैध रोषणाई तात्काळ उतरवली गेलीच पाहिजे, अशी आग्रही मागणी पर्यावरणप्रेमी नागरिक राजू नलावडे, राजीव तायशेटे, माधव घुले, विवेक पंडित, माधव जोशी, अविनाश कुबल, डॉ. सुनील पुणतांबेकर, डॉ. प्रल्हाद देशपांडे, रुपाली शाईवाले, भालचंद्र म्हात्रे यांनी केली आहे.

याबाबत संबंधित यंत्रणा आणि प्रशासनाकडे तक्रार करण्यात आली आहे. रिजेन्सी ग्रुपने स्वतःहून झाडांवरील रोषणाई काढली नाही, तर न्यायालयात दाद मागावी लागेल, असा इशाराही पर्यावरणप्रेमींनी दिला आहे. तसेच महापालिका आयुक्तांनी याप्रकरणी कारवाई करावी आणि महापालिका क्षेत्रात अन्य ठिकाणी असे प्रकार होणार नाहीत याची काळजी घ्यावी, अशी मागणी करण्यात आली आहे.

चिपळूण तालुक्यातील कळंबट येथे ‘मिशन बंधारे अभियान २०२६-२७’ला उत्स्फूर्त प्रतिसाद !!

चिपळूण तालुक्यातील कळंबट येथे ‘मिशन बंधारे अभियान २०२६-२७’ला उत्स्फूर्त प्रतिसाद !!

*गडग्याच्या पऱ्यावर दोन बंधाऱ्यांची उभारणी; पाणीटंचाईवर मात करण्यासाठी ग्रामस्थ, शिक्षक व विद्यार्थ्यांचा पुढाकार*

प्रतिनिधी - निलेश कोकमकर 

   राज्यात पावसाने दडी मारल्याने कोरड्या दुष्काळाचे सावट निर्माण झाले असून, शेतीसह नद्या, पऱ्या आणि नाल्यांमधील पाणीसाठ्यावरही त्याचा परिणाम होण्याची शक्यता आहे. भविष्यातील पाणीटंचाईची तीव्रता कमी करण्यासाठी पावसाचे पाणी अडवून ते जमिनीत मुरविणे आणि उपलब्ध जलस्रोतांचे संवर्धन करणे आवश्यक आहे. याच उद्देशाने जिल्हा परिषद रत्नागिरी, पंचायत समिती चिपळूण आणि ग्रामपंचायतीच्या संयुक्त विद्यमाने राबविण्यात येत असलेल्या ‘मिशन बंधारे अभियान २०२६-२०२७’ अंतर्गत कळंबट गावात जलसंधारणाचे महत्त्वपूर्ण काम करण्यात आले.
       कळंबट येथील गडग्याचा पऱ्यावर वेगवेगळ्या ठिकाणी दोन बंधारे बांधण्यात आले. कुणबी शिक्षण संस्थेचे न्यू इंग्लिश स्कूल, कळंबट येथील विद्यार्थी व शिक्षक, ग्रुप ग्रामपंचायत कळंबट-केरे-घवाळेगावचे सदस्य, ग्रामसेवक, अंगणवाडी सेविका, ग्रामपंचायत कर्मचारी, आरोग्य सेविका आणि ग्रामस्थ यांच्या सहकार्याने हा उपक्रम उत्साहात पार पडला.
      पावसाचे पाणी वाहून जाण्याऐवजी ते अडवून ठेवणे, भूजलपातळी वाढविण्यास मदत करणे आणि परिसरातील पाण्याची उपलब्धता टिकवून ठेवणे, या दृष्टीने बंधाऱ्यांचे महत्त्व अनन्यसाधारण आहे. भविष्यात उद्भवणाऱ्या पाणीटंचाईवर मात करण्यासाठी अशा प्रकारचे लोकसहभागातून होणारे जलसंधारणाचे उपक्रम उपयुक्त ठरू शकतात.
    या अभियानात कळंबट हायस्कूलचे शिक्षक महेंद्र शिरकर सर, सतीश जाधव, संतोष बळकटे, रवींद्र कोकमकर, सौ. साळुंके मॅडम, प्रशांत पोवार, सीताराम बारगोडे, भुवड सर आणि कल्पेश कोकमकर यांच्यासह शाळेतील सर्व विद्यार्थ्यांनी, तसेच गावातील ग्रामस्थ बबन गमरे, सुधाकर केळकर, शरद शिरकर, ग्रामपंचायत कर्मचारी, अंगणवाडी सेविका मंजू कोकमकर, छाया घवाळे, अलका लिंगायत आणि आरोग्य सेविका यांनीही या उपक्रमात सहकार्य केले.
    शासनाच्या अभियानाला स्थानिक पातळीवर लोकसहभागाची जोड मिळाल्याने कळंबट गावात जलसंधारणाबाबत जनजागृती होण्यास मदत झाली आहे. विद्यार्थी, शिक्षक, लोकप्रतिनिधी आणि ग्रामस्थ यांनी एकत्र येऊन केलेला हा उपक्रम पर्यावरण संवर्धन आणि जलसाक्षरतेच्या दृष्टीने महत्त्वपूर्ण ठरत आहे.
‘पाणी अडवा, पाणी जिरवा’ हा संदेश प्रत्यक्ष कृतीतून देत कळंबट ग्रामस्थांनी जलसंवर्धनासाठी एकजुटीचे दर्शन घडविले. भविष्यातील पाणीटंचाईचा सामना करण्यासाठी अशा लोकसहभागातून राबविण्यात येणाऱ्या उपक्रमांची आवश्यकता अधोरेखित झाली आहे.

मुंबई लोकलमध्ये विद्यार्थी, गरोदर महिला व ज्येष्ठांसाठी स्वतंत्र डब्यांची मागणी, मंत्री आदिती तटकरे यांची सकारात्मक दखल !!

मुंबई लोकलमध्ये विद्यार्थी, गरोदर महिला व ज्येष्ठांसाठी स्वतंत्र डब्यांची मागणी, मंत्री आदिती तटकरे यांची सकारात्मक दखल !!

*हिवाळी अधिवेशनात तारांकित प्रश्न मांडणार*

प्रतिनिधी -  निलेश कोकमकर
*मुंबई :* मुंबई लोकलमधील वाढती गर्दी आणि प्रवाशांच्या सुरक्षिततेचा गंभीर प्रश्न लक्षात घेऊन शालेय विद्यार्थी, गरोदर महिला आणि ज्येष्ठ नागरिकांसाठी स्वतंत्र डबे सुरू करण्याची मागणी आता मंत्रालयापर्यंत पोहोचली आहे. कुणबी समाजोन्नती संघ, मुंबई संलग्न कुणबी महिला मंडळ आणि कुणबी युवा शिक्षण विभागाच्या शिष्टमंडळाने महिला व बालविकास मंत्री मा. आदितीताई तटकरे यांची मुंबईतील राष्ट्रवादी काँग्रेस पक्ष कार्यालयात आयोजित जनता दरबारात भेट घेऊन या महत्त्वपूर्ण प्रश्नाकडे त्यांचे लक्ष वेधले.
प्रवाशांच्या सुरक्षिततेशी संबंधित या प्रश्नाचे गांभीर्य लक्षात घेऊन मंत्री आदिती तटकरे यांनी सकारात्मक भूमिका घेत संबंधित आयुक्तांना या विषयात जातीने लक्ष घालण्याचे निर्देश दिले. तसेच, शालेय विद्यार्थी, गरोदर महिला आणि ज्येष्ठ नागरिकांसाठी मुंबई लोकलमध्ये स्वतंत्र किंवा विशेष डबे सुरू करण्याबाबत केंद्र सरकारच्या रेल्वे मंत्रालयाकडे तातडीने शिफारस करण्यासह सातत्यपूर्ण पाठपुरावा करण्याचे निर्देश दिल्याचे शिष्टमंडळाने सांगितले. याशिवाय, येत्या हिवाळी अधिवेशनात हा विषय तारांकित प्रश्नाच्या माध्यमातून सभागृहात उपस्थित करण्याच्या मागणीला त्यांनी सकारात्मक प्रतिसाद दिला.

मुंबईची लोकल सेवा ही लाखो प्रवाशांच्या दैनंदिन जीवनाचा अविभाज्य भाग आहे. मात्र, प्रचंड गर्दी, गाडीत चढण्या-उतरण्याची धावपळ आणि लोकलमधून प्रवास करताना निर्माण होणारे धोके यांमुळे प्रवाशांच्या सुरक्षिततेचा प्रश्न सातत्याने ऐरणीवर येत आहे. विशेषतः शाळेत जाणारे विद्यार्थी, त्यांच्यासोबत प्रवास करणारे पालक, गरोदर महिला आणि ज्येष्ठ नागरिक यांना गर्दीचा मोठा त्रास सहन करावा लागतो.

*मुंबई लोकल अपघातांचे भीषण वास्तव:*  या आंदोलनाचे नेतृत्व करणाऱ्या कुणबी महिला मंडळ आणि कुणबी युवा शिक्षण विभागाच्या पदाधिकाऱ्यांनी रेल्वे प्रशासन आणि रेल्वे पोलिसांच्या (GRP) अधिकृत आकडेवारीचा दाखला देत अपघातांचे भीषण वास्तव खालीलप्रमाणे मंत्र्यांसमोर मांडले:  

*वार्षिक जीवघेणे अपघात:* मुंबई लोकलच्या संपूर्ण जाळ्यावर प्रत्येक वर्षी सरासरी २,२०० ते २,५०० प्रवाशांचा अपघातात मृत्यू होतो, म्हणजेच दररोज ६ ते ७ प्रवाशांना आपला जीव गमवावा लागतो.  

*अमानुष गर्दीचा फटका:* एकूण अपघातांपैकी रेल्वे रुळ ओलांडताना होणारे अपघात सोडल्यास, दरवर्षी ५०० ते ६०० प्रवाशांचा मृत्यू हा केवळ सकाळी आणि संध्याकाळी कार्यालयीन वेळेत (Peak Hours) चालत्या लोकलधून खाली पडून किंवा लोकल पकडण्याच्या गडबडीत होतो.  

*महिला व बालकांचे मोठे प्रमाण:* मुंबई लोकलच्या एकूण प्रवाशांमध्ये महिलांचे प्रमाण २५% आहे. रेल्वे अपघातांमध्ये दरवर्षी सरासरी २०० ते २५० महिला प्रवाशांचा मृत्यू होतो, ज्यातील ६०% पेक्षा जास्त अपघात हे गर्दीमुळे गाडीतून बाहेर फेकले गेल्याने किंवा लोकल पकडताना होतात.  

*विद्यार्थ्यांचे धोक्यात आलेले बालपण:* शाळा भरण्याच्या आणि सुटण्याच्या वेळा नोकरदारांच्या कार्यालयीन वेळेत येत असल्याने, पाठीवर जड दप्तर घेऊन प्रवास करणाऱ्या १०० ते १५० लहान मुलांचा व शालेय विद्यार्थ्यांचा दरवर्षी या गर्दीत बळी जातो. मुंबईत विद्यार्थ्यांच्या रेल्वे अपघाताचे प्रमाण ११% आहे, जे देशाच्या राष्ट्रीय सरासरीपेक्षा दुप्पट आहे.

शालेय विद्यार्थ्यांना पाठीवर जड दप्तर घेऊन गर्दीच्या लोकलमधून प्रवास करावा लागतो. शाळा भरण्याच्या आणि सुटण्याच्या वेळा अनेकदा कार्यालयीन वेळांशी जुळत असल्याने विद्यार्थ्यांना मोठ्या गर्दीचा सामना करावा लागतो. त्याचप्रमाणे, गरोदर महिला आणि ज्येष्ठ नागरिकांसाठीही गर्दीतून सुरक्षितपणे प्रवास करणे आव्हानात्मक ठरते.या पार्श्वभूमीवर स्वतंत्र डब्यांची व्यवस्था केल्यास संबंधित प्रवाशांना अधिक सुरक्षितपणे प्रवास करता येईल आणि गर्दीचे योग्य विभाजन होण्यास मदत मिळेल. 

आजचे शालेय विद्यार्थी हे देशाचे उद्याचे जबाबदार नागरिक आहेत, तर ज्येष्ठ नागरिकांनी देशाच्या उभारणीत मोलाचे योगदान दिले आहे. गरोदर महिलांच्या सुरक्षिततेचाही विचार होणे आवश्यक आहे. या सर्व घटकांचा प्रवास सुरक्षित करणे हे आपले सामाजिक कर्तव्य आहे. स्वतंत्र डब्यांची व्यवस्था झाल्यास गर्दीचे विभाजन होऊन अपघातांचा धोका कमी करण्यास मदत होऊ शकते, अशी भूमिका कुणबी महिला मंडळाच्या अध्यक्षा सौ. दीपिका आग्रे आणि कुणबी युवा शिक्षण विभागाचे प्रमुख श्री. निलेश कुळये यांनी मांडली. या महत्त्वपूर्ण मागणीसाठी आयोजित भेटीदरम्यान कुणबी समाजोन्नती संघ, मुंबईचे खजिनदार श्री. महेश शिर्के, कुणबी महिला मंडळाच्या कायदेविषयक विभागप्रमुख ॲड. रूपाली खळे, कुणबी युवा मुंबई वैद्यकीय विभागप्रमुख श्री. निलेश कोकमकर, शाखा तालुका रत्नागिरीचे उपाध्यक्ष श्री. एकनाथ निंबरे, ॲड. संदीप आग्रे, युवा पदाधिकारी श्री. कैलास शिंदे यांच्यासह अन्य सदस्य उपस्थित होते. मंत्र्यांच्या सकारात्मक प्रतिसादामुळे या लढ्याला मोठे बळ मिळाले असून, आता लवकरच लोकल प्रवाशांना दिलासा मिळेल, अशी आशा संघटनेने व्यक्त केली आहे.

मुंबईच्या रंगांची उधळण चित्रकलेतून करा; MTDC तर्फे शालेय विद्यार्थ्यांसाठी राज्यस्तरीय स्पर्धेचे आयोजन !!

मुंबईच्या रंगांची उधळण चित्रकलेतून करा; MTDC तर्फे शालेय विद्यार्थ्यांसाठी राज्यस्तरीय स्पर्धेचे आयोजन !!

मुंबई प्रतिनिधी/ पंकज चव्हाण : 

मुंबईचा समृद्ध सांस्कृतिक वारसा, ऐतिहासिक वास्तू, प्रसिद्ध पर्यटनस्थळे, सण-उत्सव आणि आधुनिकतेचे विविध पैलू विद्यार्थ्यांच्या कुंचल्यातून साकारण्यासाठी महाराष्ट्र पर्यटन विकास महामंडळ (MTDC), पर्यटन विभाग, महाराष्ट्र शासन आणि जिल्हाधिकारी कार्यालय, मुंबई शहर यांच्या संयुक्त विद्यमाने शालेय विद्यार्थ्यांसाठी चित्रकला स्पर्धेचे आयोजन करण्यात आले आहे. ‘बहुरंगी मुंबईची रंगबेरंगी गोष्ट!’ ही संकल्पना असलेल्या या स्पर्धेतून विद्यार्थ्यांच्या कलागुणांना व्यासपीठ मिळणार असून, मुंबईच्या पर्यटनवैभवाची ओळखही अधिक दृढ होणार आहे.

या स्पर्धेसाठी विद्यार्थ्यांचे तीन गट करण्यात आले आहेत. गट अ मध्ये इयत्ता पहिली ते चौथीच्या विद्यार्थ्यांसाठी ‘मुंबईची प्रसिद्ध पर्यटनस्थळे’ हा विषय देण्यात आला आहे. गट ब मध्ये इयत्ता पाचवी ते सातवीच्या विद्यार्थ्यांना ‘मुंबईतील सण आणि उत्सव – विविधतेत एकता’ या विषयावर चित्र साकारायचे आहे. तर गट क मध्ये इयत्ता आठवी ते दहावीच्या विद्यार्थ्यांसाठी ‘मुंबई – वारसा आणि आधुनिकतेचा संगम’ हा विषय निश्चित करण्यात आला आहे.

प्रत्येक गटातील प्रथम, द्वितीय आणि तृतीय क्रमांकाच्या विजेत्यांना पारितोषिक व प्रमाणपत्र देऊन गौरविण्यात येणार आहे. स्पर्धेसाठी A3 आकाराचा कागद वापरणे बंधनकारक असून, केवळ हस्तचित्रित कलाकृती स्वीकारल्या जाणार आहेत. AI च्या साहाय्याने तयार केलेली चित्रे स्पर्धेसाठी ग्राह्य धरली जाणार नाहीत. चित्रकलेसाठी कोणतेही माध्यम वापरण्याची परवानगी आहे.

स्पर्धकांनी आपल्या चित्राची स्कॅन केलेली प्रत mumbaitourism@maharashtratourism.gov.in या ई-मेल पत्त्यावर पाठवायची आहे. ई-मेलमध्ये स्पर्धेचे नाव, शाळेचे नाव, इयत्ता आणि संपर्क क्रमांक नमूद करणे आवश्यक आहे. तसेच चित्राची मूळ प्रत महाराष्ट्र पर्यटन विकास महामंडळ, मुख्यालय, तिसरा मजला, ओरिएंटल बिल्डिंग, भारतीय आयुर्विमा महामंडळाच्या (LIC) इमारतीवर, आझाद मैदान, फोर्ट, मुंबई – ४००००१ या पत्त्यावर पाठवावी.

चित्रकृती पाठविण्याची अंतिम मुदत ३१ ऑक्टोबर २०२६ अशी असून, परीक्षकांचा निर्णय अंतिम राहणार आहे. अधिक माहितीसाठी ९४२५७१७५२९ या क्रमांकावर संपर्क साधण्याचे आवाहन आयोजकांनी केले आहे.

मुंबईच्या ऐतिहासिक वारशापासून आधुनिक महानगराच्या बदलत्या रूपापर्यंतचे विविध पैलू चित्रांतून मांडण्याची संधी या स्पर्धेमुळे विद्यार्थ्यांना मिळणार आहे. त्यामुळे शालेय विद्यार्थ्यांनी मोठ्या संख्येने सहभागी होऊन आपल्या कल्पनाशक्तीला रंग देत मुंबईच्या वैभवाची रंगबेरंगी गोष्ट साकारावी, असे आवाहन करण्यात आले आहे.

पूर्णेकर हत्याप्रकरणावरून राजकारण तापले; म्हस्केंच्या वक्तव्यावरून ठाकरे गट आणि भाजप आक्रमक !!

पूर्णेकर हत्याप्रकरणावरून राजकारण तापले; म्हस्केंच्या वक्तव्यावरून ठाकरे गट आणि भाजप आक्रमक !!

*कल्याण, प्रतिनिधी:* प्रदीप पूर्णेकर हत्याप्रकरणावरून खासदार नरेश म्हस्के यांनी विरोधकांना इशारा दिल्यानंतर राजकीय वातावरण तापले आहे.

"एकनाथ शिंदे यांच्याविषयी ठाण्यात येऊन अद्वातद्वा बोलला तर सुखासुखी परत जाऊ दिले जाणार नाही," असा इशारा म्हस्के यांनी दिला होता. त्यावर ठाकरे गटाचे कल्याणमधील उपनेते विजय उर्फ बंड्या साळवी यांनी "पोलीस संरक्षण काढून कुठे आणि कधी भेटायचे ते सांगा," असे खुले आव्हान देत म्हस्के यांच्यावर पलटवार केला.

दुसरीकडे युतीधर्म बाजूला ठेवत डोंबिवलीतील भाजप नगरसेवक दीपेश म्हात्रे यांनीही म्हस्केंना टोला लगावला आहे. "पूर्णेकर कुटुंबीय शोकसागरात असताना राजकारण करू नये, घटनेचे गांभीर्य ओळखून भान ठेवून बोलावे. अपघाताने झालेले खासदारांनी बोलण्यावर नियंत्रण ठेवावे," असे म्हात्रे यांनी समाजमाध्यमावर लिहिले आहे.

या प्रकरणाला आता राजकीय वळणासोबतच आगरी-कोळी असा जातीय रंगही येत असल्याने सत्ताधारी भाजपमधूनही म्हस्केंवर टीका होत आहे.

*पूर्णेकर हत्याकांडात कुटुंबाला न्याय मिळालाच पाहिजे, पण शिंदेंना बदनाम केल्यास जशास तसे उत्तर देऊ - आमदार राजेश मोरे*

*पूर्णेकर हत्याकांडात कुटुंबाला न्याय मिळालाच पाहिजे, पण शिंदेंना बदनाम केल्यास जशास तसे उत्तर देऊ - आमदार राजेश मोरे*

*डोंबिवली, प्रतिनिधी :* ठाण्यातील बहुचर्चित पूर्णेकर हत्याकांड प्रकरणात पूर्णेकर कुटुंबीयांना प्रत्येक परिस्थितीत न्याय मिळालाच पाहिजे, मात्र या हत्याकांडाच्या निमित्ताने जर कोणी शिवसेना आणि उपमुख्यमंत्री एकनाथ शिंदे यांना बदनाम करण्याचा प्रयत्न केला तर शिवसेना रस्त्यावर उतरून जशास तसे उत्तर देईल, असा थेट इशारा कल्याण ग्रामीणचे आमदार राजेश मोरे यांनी विरोधकांना दिला.

डोंबिवलीतील शिवसेना मध्यवर्ती कार्यालयात आयोजित पत्रकार परिषदेत ते बोलत होते.

यावेळी आमदार मोरे म्हणाले, "पूर्णेकर हत्याकांडाच्या चौकशीसाठी विशेष तपास पथकाची (SIT) स्थापना करण्यात आली आहे. तपासात जो कोणी दोषी आढळेल त्याला शिक्षा होणारच आहे. मात्र या हत्याकांडाचा आधार घेऊन जर कोणी शिवसेनेचे प्रमुख नेते तथा उपमुख्यमंत्री एकनाथ शिंदे यांची बदनामी करण्याचा प्रयत्न केला, तर त्याला शिवसेनेच्या स्टाईलने उत्तर दिले जाईल."

"आम्ही शिवसेनाप्रमुख बाळासाहेब ठाकरे आणि धर्मवीर आनंद दिघे यांच्या विचारांवर चालणारे कार्यकर्ते आहोत. एकनाथ शिंदे हे आमच्यासाठी दैवत आहेत. आमच्या दैवताची बदनामी आणि त्यांच्यावर लावले जाणारे बिनबुडाचे आरोप अजिबात सहन केले जाणार नाहीत. आम्हाला आमदारकी किंवा नगरसेवक पदापेक्षा शिवसेना अधिक प्रिय आहे," असेही ते म्हणाले.

या पत्रकार परिषदेला उपजिल्हाप्रमुख राजेश कदम, कल्याण-डोंबिवली महानगरपालिकेतील शिवसेना गटनेते विश्वनाथ राणे, रवि पाटील, नगरसेवक विकास म्हात्रे यांच्यासह मोठ्या संख्येने शिवसेना पदाधिकारी उपस्थित होते.

Wednesday, 28 October 2026

२६ जिल्ह्यांतील १० हजारांहून अधिक वीज कंत्राटी कामगार आंदोलनात सहभागी !!

२६ जिल्ह्यांतील १० हजारांहून अधिक वीज कंत्राटी कामगार आंदोलनात सहभागी !!

उरण दि २८, (विठ्ठल ममताबादे) : महाराष्ट्र वीज कंत्राटी कामगार संघाच्या (भारतीय मजदूर संघ)वतीने मंगळवारी, २७ ऑक्टोबर २०२६ रोजी राज्यव्यापी आंदोलन करण्यात आले. राज्यातील २६ जिल्ह्यांतील १० हजारांहून अधिक वीज कंत्राटी कामगार आंदोलनात सहभागी झाले. वेतन, रोजगार सुरक्षा, कंत्राटदारांकडून होणारा अन्याय आणि प्रलंबित आर्थिक लाभ या मागण्यांसाठी आंदोलन करण्यात आले.

भारतीय मजदूर संघाशी संलग्न महाराष्ट्र वीज कंत्राटी कामगार संघ संघटनेच्या नेतृत्वाखाली सकाळी १० वाजता महावितरणच्या प्रकाशगड येथील मुख्य कार्यालयासमोर आंदोलन करण्यात आले. त्यानंतर दुपारी २ वाजता कामगार आयुक्त कार्यालयासमोर आंदोलनाचा दुसरा टप्पा पार पडला.

महावितरणचे मानव संसाधन संचालक राजेंद्र पवार यांच्या सूचनेनुसार मुख्य औद्योगिक संबंध अधिकारी संजय ढोके यांनी संघटनेच्या शिष्टमंडळाला चर्चेसाठी आमंत्रित केले. दुपारी झालेल्या बैठकीत संघटनेने मांडलेल्या मागण्यांवर चर्चा झाली.

पगारातून रिफंडच्या नावाखाली पैशांची मागणी करणे किंवा कामावरून कमी करण्याची धमकी देणे,अशा तक्रारी लेखी स्वरूपात प्राप्त झाल्यास चौकशी करून दोषी कंत्राटदारांवर कारवाई करण्यात येईल. आवश्यकतेनुसार संबंधित कंत्राटदारांचा काळ्या यादीत समावेश करण्याची भूमिका प्रशासनाने मांडली.

कंत्राटी कामगारांच्या वारंवार बदल्यांमुळे कामगारांच्या सुरक्षिततेवर आणि प्रलंबित वीज देयकांच्या वसुलीवर परिणाम होत असल्याचे संघटनेने सांगितले. या विषयावर दिवाळीनंतर संचालक स्तरावर बैठक घेण्याबाबत चर्चा झाली.

न्यायालयीन संरक्षित कामगारांची नावे स्थानिक पातळीवर संपर्क पोर्टलवरील नोंदी तपासाव्यात,असे आवाहन करण्यात आले.

कामगारांचे वेतन राष्ट्रीयीकृत बँक खात्यात जमा करण्याबाबत चर्चा झाली. स्टेट बँक ऑफ इंडिया (SBI) च्या सॅलरी अकाउंटसह विमा योजनेचा प्रस्ताव विचाराधीन असल्याची माहिती प्रशासनाने दिली.

हरियाणा पॅटर्न कंत्राटी कामगार व्यवस्थेचा अभ्यास करण्यासाठी महावितरण, महापारेषण आणि महानिर्मितीच्या वरिष्ठ अधिकाऱ्यांची समिती हरियाणा दौऱ्यावर पाठविण्याबाबत चर्चा झाली. एका विभागात एकच कंत्राटदार असावा, अशी मागणी संघटनेने केली.

क्रिस्टल आणि स्मार्ट कंपन्यांमार्फत कार्यरत कामगारांच्या वेतनाचा प्रश्न उपस्थित करण्यात आला. कामगार उपआयुक्त चेतन जगताप यांच्या आदेशानुसार पात्र कामगारांना २१ हजार रुपये वेतन, वेतनातील फरक आणि बोनस देण्याबाबत प्रशासनाने सकारात्मक भूमिका घेतल्याचे संघटनेने सांगितले. या निर्णयाच्या अंमलबजावणीवर संघटना लक्ष ठेवणार आहे.

कामगार आयुक्त कार्यालयात रोजगार आणि सुरक्षिततेच्या प्रश्नांवर चर्चा झाली कामगार उपआयुक्त चेतन जगताप यांच्यासोबत झालेल्या बैठकीत रोजगार संरक्षण, हरियाणा पॅटर्न, वेतन आणि सुरक्षिततेसंबंधी प्रश्न मांडण्यात आले.

हरियाणा पॅटर्नसंदर्भात मुख्यमंत्री कार्यालयाकडून सविस्तर सादरीकरण तयार ठेवण्याच्या सूचना मिळाल्याची माहिती देण्यात आल्याचे संघटनेने सांगितले.

कंत्राटदार बदलल्यास अनुभवी कामगारांचा रोजगार कायम ठेवण्यासाठी कायदेशीर संरक्षणाची मागणी संघटनेने केली. यासंदर्भात राज्य शासनाच्या स्तरावर प्रयत्न सुरू झाल्याची माहिती बैठकीत देण्यात आली

वीज क्षेत्रातील कामाचे जोखमीचे स्वरूप लक्षात घेऊन कंत्राटी कामगारांना योग्य वेतन, सामाजिक सुरक्षा, विमा संरक्षण आणि सुरक्षित कामाचे वातावरण मिळावे, अशी मागणी करण्यात आली. संबंधित कामगार कायद्यांची प्रभावी अंमलबजावणी करण्याची मागणीही करण्यात आली.


आंदोलनाचे नेतृत्व संघटनेचे प्रदेशाध्यक्ष निलेश खरात आणि सरचिटणीस सचिन मेंगाळे यांनी केले. राहुल बोडके, उमेश आणेराव, सागर पवार यांच्यासह विविध जिल्ह्यातील पदाधिकारी उपस्थित होते.

आंदोलनाला प्रतिसाद देणाऱ्या कामगारांचे, पदाधिकारी व कार्यकर्त्यांचे, महावितरण, पोलीस प्रशासन आणि कामगार आयुक्त कार्यालयाचे तसेच प्रसारमाध्यमांचे संघटनेने आभार मानले.

संघटनेने दिलेल्या माहितीनुसार, चर्चेत काही मागण्यांवर सकारात्मक भूमिका घेण्यात आली आहे. मात्र, मागण्यांची प्रत्यक्ष अंमलबजावणी होईपर्यंत आंदोलन सुरू ठेवण्याचा इशारा संघटनेने दिला आहे.

आंदोलनाच्या नोटिशीत नमूद केलेल्या आणि चर्चेदरम्यान मान्य केलेल्या मागण्यांबाबत निर्धारित मुदतीत लेखी आश्वासन द्यावे, अशी मागणी संघटनेने केली आहे. लेखी आश्वासन न मिळाल्यास ६ नोव्हेंबरपासून राज्यव्यापी निर्धारित कामबंद आंदोलन करण्यात येईल, असा इशारा प्रदेशाध्यक्ष निलेश खरात आणि सरचिटणीस सचिन मेंगाळे यांनी दिला.

प्रलंबित प्रश्नांची तातडीने सोडवणूक करण्याची मागणी संघटनेने शासन आणि प्रशासनाकडे केली आहे

कल्याण-डोंबिवली महापालिका कर्मचाऱ्यांची दिवाळी गोड! २१ हजार रुपयांचे सानुग्रह अनुदान जाहीर; आशा वर्कर्सनाही ६ हजारांची भेट !!

कल्याण-डोंबिवली महापालिका कर्मचाऱ्यांची दिवाळी गोड! २१ हजार रुपयांचे सानुग्रह अनुदान जाहीर; आशा वर्कर्सनाही ६ हजारांची भेट !!

*मागील वर्षीपेक्षा १००० रुपयांची वाढ; मुख्यालयाबाहेर कामगार सेनेचा फटाके फोडून जल्लोष*

*कल्याण, दि. २७ ऑक्टोबर (दीपक इंगळे) :* कल्याण-डोंबिवली महानगरपालिकेच्या अधिकारी-कर्मचाऱ्यांसाठी यंदाची दिवाळी गोड होणार आहे. महापालिका प्रशासनाने यंदा सानुग्रह अनुदानात वाढ करत २१ हजार रुपयांची दिवाळी भेट जाहीर केली आहे.

गेल्या वर्षी २०२५ मध्ये कर्मचाऱ्यांना २० हजार रुपये सानुग्रह अनुदान देण्यात आले होते. यंदा त्यात १ हजार रुपयांची वाढ करण्यात आली आहे. या निर्णयाचा फायदा महापालिकेच्या आस्थापनेवरील ५ हजारांहून अधिक अधिकारी-कर्मचाऱ्यांना होणार आहे. तसेच आरोग्य सेवेत महत्त्वाची भूमिका बजावणाऱ्या आशा वर्कर्ससाठीही ६ हजार रुपयांची दिवाळी भेट जाहीर करण्यात आली आहे.

*मुख्यालयाबाहेर कामगार सेनेचा जल्लोष -*

सानुग्रह अनुदान जाहीर होताच म्युनिसिपल कर्मचारी कामगार सेनेने महापालिका मुख्यालयाच्या प्रवेशद्वारावर जल्लोष केला. फटाक्यांची आतषबाजी करत पदाधिकारी आणि कर्मचाऱ्यांनी एकमेकांना पेढे भरवून आनंद साजरा केला.

म्युनिसिपल कर्मचारी कामगार सेनेने ८ ऑक्टोबर रोजी महापालिका आयुक्तांना पत्र देऊन २७ हजार रुपये सानुग्रह अनुदानाची मागणी केली होती. मात्र प्रशासनाने २१ हजार रुपये जाहीर केले आहेत.

या निर्णयानंतर म्युनिसिपल कर्मचारी कामगार सेनेचे अध्यक्ष बाळ हरदास, सरचिटणीस सचिन बासरे, उपाध्यक्ष सुनील पवार आणि सुरेश तेलावणे यांनी महापालिका आयुक्त आणि महापौरांचे आभार मानले आहेत.

शहरातील स्वच्छता, पाणीपुरवठा, आरोग्य, अग्निशमन यांसारख्या अत्यावश्यक सेवा सुरळीत ठेवणाऱ्या कर्मचाऱ्यांसाठी वाढत्या महागाईत हे अनुदान दिलासादायक ठरणार आहे.

महाराष्ट्र स्टेट केमिस्ट अँड ड्रगिस्ट असोसिएशन निवडणुकीत अप्पा शिंदे पॅनेलचा दणदणीत विजय !

महाराष्ट्र स्टेट केमिस्ट अँड ड्रगिस्ट असोसिएशन निवडणुकीत अप्पा शिंदे पॅनेलचा दणदणीत विजय !!

*शिर्डी, २५ ऑक्टोबर २०२६ :* महाराष्ट्र स्टेट केमिस्ट अँड ड्रगिस्ट असोसिएशनच्या सार्वत्रिक निवडणुकीत माजी आमदार तथा अखिल भारतीय केमिस्ट असोसिएशनचे अध्यक्ष जगन्नाथ उर्फ अप्पा शिंदे यांच्या नेतृत्वाखालील पॅनेलने दणदणीत विजय मिळवला आहे.

शिर्डी येथे झालेल्या या निवडणुकीत अप्पा शिंदे यांना 80 टक्क्यांहून अधिक मते मिळाली असून ते अध्यक्षपदी विजयी झाल्याचा दावा समर्थकांकडून करण्यात येत आहे. या विजयामुळे राज्यभरातील केमिस्ट व्यावसायिकांनी त्यांच्या नेतृत्वावर पुन्हा एकदा विश्वास व्यक्त केला आहे.

या निवडणुकीत अप्पा शिंदे यांच्यासह त्यांच्या पॅनेलमधील सर्व उमेदवार विजयी झाले आहेत.

*नवनिर्वाचित पदाधिकारी :*
*अध्यक्ष -* जगन्नाथ उर्फ अप्पा शिंदे
*उपाध्यक्ष -* रामदास भोसले आणि सुनील भांगळे
*सचिव -* अनिल नावंदर
*कोषाध्यक्ष -* वैजनाथ जागुष्टे
*सहसचिव -* सुनील छाजेड
*संघटन सचिव -* पंकज नानवाणी

राज्यातील औषध विक्रेते आणि केमिस्ट व्यावसायिकांचे प्रश्न सोडवणे, संघटनेची ताकद वाढवणे आणि आरोग्यसेवेतील योगदान अधिक प्रभावी करणे या दृष्टीने नव्या नेतृत्वाची भूमिका महत्त्वाची ठरणार आहे. या दणदणीत विजयाबद्दल कल्याणसह राज्यभरातील केमिस्ट व्यावसायिकांकडून अभिनंदनाचा वर्षाव होत आहे.

एमआयडीसीच्या हक्काच्या पाण्यावर बाहेरील नगरसेवकांचा डल्ला; बूस्टर पंप लावून पाणी पळवले, कर्मचाऱ्यांना मारहाण !!

एमआयडीसीच्या हक्काच्या पाण्यावर बाहेरील नगरसेवकांचा डल्ला; बूस्टर पंप लावून पाणी पळवले, कर्मचाऱ्यांना मारहाण !!

*डोंबिवली, विनोद गिरी :* एमआयडीसी विभागातील पाणीटंचाईचा प्रश्न गंभीर बनला असताना आज एमआयडीसीचे अधिकारी श्री. राऊत यांची भेट घेऊन मनसे पदाधिकाऱ्यांनी चर्चा केली.

एमआयडीसी रहिवाशांना सध्या अजिबात पाणी मिळत नसून, आले तरी अत्यंत कमी दाबाने येत असल्याची वस्तुस्थिती अधिकाऱ्यांच्या निदर्शनास आणून देण्यात आली.

यावर अधिकारी राऊत यांनी धक्कादायक माहिती दिली. बाहेरील विभागातील काही नगरसेवक आपापल्या प्रभागात पाणी वळवण्यासाठी प्रशासनावर दबाव आणत आहेत. पाहणीसाठी गेलेल्या कर्मचाऱ्यांना दमदाटी आणि मारहाणही केली जात आहे. तसेच काही ठिकाणी नियमबाह्य पद्धतीने बूस्टर पंप लावून हक्काचे पाणी जबरदस्तीने ओढले जात असल्याने जांभूळहून येणाऱ्या पाण्याचा दाब एमआयडीसी विभागापर्यंत पोहोचतच नाही, असे त्यांनी सांगितले.

हा केवळ तांत्रिक बिघाड नसून हक्कावर गदा असल्याचे सांगत, या गंभीर प्रकाराबाबत उद्या महानगरपालिकेचे अधिकारी श्री. कुलकर्णी यांची भेट घेऊन चर्चा करणार असल्याचे मनसेचे विभाग अध्यक्ष संजय चव्हाण यांनी सांगितले. जोपर्यंत एमआयडीसी रहिवाशांना त्यांच्या हक्काचे नियमित पाणी मिळत नाही, तोपर्यंत हा लढा सुरूच राहील, असा इशाराही त्यांनी दिला.

यावेळी भालचंद्र म्हात्रे, राजू नलावडे, विवेक देशपांडे, अजय घोरपडे, राहुल वाजपेयी आदी उपस्थित होते.

नवी मुंबईत ३ नोव्हेंबरला ‘नवी मुंबई करंडक २०२६’ची महाअंतिम फेरी; रंगभूमीचा भव्य उत्सव रंगणार !!

नवी मुंबईत ३ नोव्हेंबरला ‘नवी मुंबई करंडक २०२६’ची महाअंतिम फेरी; रंगभूमीचा भव्य उत्सव रंगणार !!

 *वाशी येथे महाअंतिम फेरी व पारितोषिक वितरण सोहळा; सात उत्कृष्ट एकांकिकांमध्ये रंगणार चुरस, रसिकांसाठी प्रवेश विनामूल्य!* 

नवी मुंबई, प्रतिनिधी : नवी मुंबईच्या सांस्कृतिक क्षेत्राला नवी दिशा देण्याबरोबरच मराठी रंगभूमीची समृद्ध परंपरा आणि सांस्कृतिक वारसा जपण्याच्या उद्देशाने विनोदी अभिनेते कै. विजय कदम आणि कै. प्रदीप पटवर्धन यांच्या स्मरणार्थ आयोजित करण्यात आलेल्या ‘नवी मुंबई करंडक २०२६’ एकांकिका स्पर्धेची महाअंतिम फेरी व पारितोषिक वितरण सोहळा सोमवार, ३ नोव्हेंबर रोजी वाशी येथील विष्णुदास भावे नाट्यगृहात उत्साहात पार पडणार आहे. सकाळी ९ ते सायंकाळी ७ वाजेपर्यंत रंगणाऱ्या या नाट्यसोहळ्यात नवी मुंबईतील रसिक प्रेक्षकांना दर्जेदार एकांकिकांचा आस्वाद घेता येणार असून, हा कार्यक्रम सर्वांसाठी विनामूल्य खुला आहे.

RG7 स्टुडिओज आणि आराध्या रूपाली फिल्म्स यांच्या वतीने या स्पर्धेचे आयोजन करण्यात आले आहे. या स्पर्धेत एकूण २१ नाट्यसंस्थांनी सहभाग नोंदविला होता. स्पर्धेच्या अंतिम फेरीतील सादरीकरणे २४ व २५ ऑक्टोबर रोजी कोपरखैरणे येथील DVS महाविद्यालयात पार पडली. या फेरीतून ‘राधा न बावरली’, ‘खोटं बोल नाऱ्या’, ‘नाडा’, ‘ओल्या भिंती’, ‘पहिली रात्र’, ‘पाटी’ आणि ‘मॅरेथॉन’ या सात एकांकिकांची महाअंतिम फेरीसाठी निवड झाली आहे. त्यामुळे या सात एकांकिकांमधील कलात्मक सादरीकरणे, अभिनय आणि दिग्दर्शन यांची चुरस रसिकांना अनुभवायला मिळणार आहे.

या स्पर्धेचे आयोजक रंगराव घागरे आणि मदन मुकादम असून, नवी मुंबईतील ज्येष्ठ रंगकर्मी श्रीहरी पवळे, रवी वाडकर, सुनील पगार, दत्ता करे, प्रशांत जोशी, रवी मोरे, रवी पाटील, सचिन पाटील आणि मिलिंद बनसोडे यांचे मोलाचे सहकार्य लाभले आहे. तसेच गंगोत्री फिल्म प्रोडक्शनचे निर्माते लक्ष्मीकांत पोपळे, सिद्धार्थ ठोकळे, विलास चव्हाण यांच्यासह नवी मुंबईतील रंगकर्मी, चित्रकर्मी, भावे कट्टा आणि शिवसाई थिएटर्स यांनीही या उपक्रमाला सहकार्य केले आहे.

स्पर्धेच्या प्राथमिक फेरीचे दीपप्रज्वलन प्रसिद्ध अभिनेते रमेश रोकडे आणि ज्येष्ठ समाजसेवक कृष्णा पाटील यांच्या शुभहस्ते करण्यात आले होते. प्राथमिक फेरीसाठी गीता घरत, प्रवीण जगन्नाथ आणि जगदीश शेळके यांनी परीक्षक म्हणून काम पाहिले.

मराठी रंगभूमीवरील नवोदित कलाकारांना हक्काचे व्यासपीठ उपलब्ध करून देणे, नाट्यसंस्थांना प्रोत्साहन देणे आणि नवी मुंबईच्या सांस्कृतिक चळवळीला बळकटी देणे, हा या स्पर्धेमागील प्रमुख उद्देश आहे. कै. विजय कदम आणि कै. प्रदीप पटवर्धन यांच्या स्मृतींना अभिवादन करत त्यांच्या विनोदी अभिनयाचा आणि रंगभूमीवरील योगदानाचा वारसा पुढे नेण्याचा हा उपक्रम ठरणार आहे.

या महाअंतिम फेरीला नवी मुंबईतील नाट्यरसिकांनी मोठ्या संख्येने उपस्थित राहून कलाकारांच्या कलागुणांना दाद द्यावी आणि या रंगोत्सवाचा आनंद घ्यावा, असे आवाहन आयोजकांच्या वतीने करण्यात आले आहे.

विशेष वृत्त - विश्वनाथ राऊत सर 

कल्याण तालुक्यात दुष्काळाच्या झळा तीव्र; शेतकऱ्याचा आत्महत्येचा प्रयत्न, तहसीलदार व प्रांताधिकाऱ्यांविरोधात रोष !!

कल्याण तालुक्यात दुष्काळाच्या झळा तीव्र; शेतकऱ्याचा आत्महत्येचा प्रयत्न, तहसीलदार व प्रांताधिकाऱ्यांविरोधात रोष !!

*कल्याण (संजय कांबळे) :* कल्याण तालुक्यात यावर्षी पाऊस उशिरा झाल्याने शेतीचे मोठ्या प्रमाणात नुकसान झाले असून, दुष्काळाच्या झळा तीव्र झाल्या आहेत. दुसरीकडे ७/१२ उताऱ्यावर चुकीच्या नोंदी झाल्याने न्याय न मिळाल्याने एका शेतकऱ्याने आत्महत्येचा प्रयत्न केल्याची धक्कादायक घटना घडली आहे.

कृषी विभागाच्या पीक पाहणी अहवालानुसार, तालुक्यातील एकूण ४ हजार ४५२ हेक्टर भात क्षेत्रापैकी ७५० हेक्टर क्षेत्राचे नुकसान झाले आहे. यामध्ये हळव्या भाताच्या २ हजार ११ हेक्टर क्षेत्रापैकी तब्बल ३४० हेक्टर क्षेत्राचे १०० टक्के नुकसान झाले आहे. तसेच निमगरव्या भाताचे ९४३ हेक्टर आणि नाचणीचे ७० हेक्टर क्षेत्र पूर्णपणे खराब झाले आहे.

.               पत्रकार संजय कांबळे वस्तुस्थितीची पाहणी करताना 

गोवेली, ठाकूरपाडा, आपटी, मांजर्ली, मानिवली, घोटसई, मामणोली, रायते आदी गावांमध्ये भातपीक जळून गेले आहे. ठाकूरपाडा येथील शेतकरी कै. गणपत लुखा हिंदोळे यांच्या शेतात तर पिकासोबत पेंडाही मिळेल की नाही, याची शाश्वती नाही, अशी परिस्थिती आहे.

कमी पाऊस, मोठ्या प्रमाणात वृक्षतोड आणि दुष्काळ अशा संकटात सापडलेल्या शेतकऱ्यांना शासकीय लालफितीचा कारभाराचाही फटका बसत आहे. बेलकरपाडा येथील शेतकरी भाऊ सावळाराम ताम्हाणे यांनी स्वतःच्या ७/१२ उताऱ्यावर चुकीच्या नोंदी घातल्याप्रकरणी कल्याण तहसीलदार आणि प्रांताधिकारी यांच्याकडे वारंवार तक्रारी करूनही न्याय न मिळाल्याने आत्महत्येचा प्रयत्न केला.

ते सध्या एका खाजगी रुग्णालयात उपचार घेत असून, त्यांची प्रकृती चिंताजनक असल्याची माहिती मिळत आहे. या घटनेमुळे आधीच दुष्काळाने होरपळलेल्या शेतकऱ्यांमध्ये तहसीलदार आणि प्रांताधिकारी यांच्या विरोधात तीव्र रोष व्यक्त होत आहे.

नवी मुंबईत ‘स्त्री कला गौरव २०२६’ सोहळा दिमाखात संपन्न !!!

नवी मुंबईत ‘स्त्री कला गौरव २०२६’ सोहळा दिमाखात संपन्न !!!

 *महाराष्ट्राच्या लावणी सम्राज्ञी अमिता कदम यांना ‘नवी मुंबई कलाभूषण पुरस्कार २०२६’ प्रदान* 

नवी मुंबई, प्रतिनिधी : श्री धनलक्ष्मी महिला मंडळ, वाशी यांच्या वतीने आयोजित करण्यात आलेला ‘स्त्री कला गौरव २०२६’ हा महिलांच्या कलागुणांचा आणि कर्तृत्वाचा गौरव करणारा भव्य सोहळा नुकताच उत्साहात संपन्न झाला. या सोहळ्याच्या माध्यमातून महिलांना कला, संस्कृती, उद्योजकता आणि विविध क्षेत्रांतील कौशल्ये सादर करण्यासाठी हक्काचे व्यासपीठ उपलब्ध करून देण्यात आले.

या कार्यक्रमात महिला उद्योजिका, नृत्य स्पर्धा, पारंपरिक लोकनृत्य, फॅशन शो, आदर्श शिक्षकांचा गौरव आणि पाककला स्पर्धा अशा विविध उपक्रमांचे आयोजन करण्यात आले होते. तसेच ‘चित्रांगणा’ या लघुपटाच्या प्रदर्शनाने उपस्थितांचे विशेष लक्ष वेधून घेतले.

या सोहळ्यास महाराष्ट्राच्या लावणी सम्राज्ञी आणि प्रसिद्ध नृत्यांगना मा. अमिता नितीन कदम यांना प्रमुख नृत्य परीक्षक म्हणून विशेष निमंत्रित करण्यात आले होते. विविध क्षेत्रांतील शेकडो महिलांनी आपल्या कलागुणांचे आणि कर्तृत्वाचे प्रभावी सादरीकरण केले. महिलांचा उत्साह, आत्मविश्वास आणि कलात्मकता पाहून अमिता कदम यांनी आनंद व्यक्त केला.

कार्यक्रमातील विशेष आकर्षण म्हणजे सांस्कृतिक क्षेत्रातील उल्लेखनीय योगदानाबद्दल अमिता कदम यांना श्री धनलक्ष्मी महिला मंडळाच्या वतीने ‘नवी मुंबई कलाभूषण पुरस्कार २०२६’ प्रदान करून गौरविण्यात आले. या सन्मानामुळे त्यांच्या सांस्कृतिक आणि कलाक्षेत्रातील कार्याचा गौरव झाला.

या सोहळ्याच्या यशस्वितेसाठी मंडळाच्या अध्यक्षा डॉ. वनिता गडदे, सचिव वैशाली धनावडे आणि खजिनदार सुप्रिया साळवे यांनी विशेष परिश्रम घेतले. ‘जी. एस. सिने एंटरटेनमेंट फिल्म्स टेलिव्हिजन अँड इव्हेंट्स ग्रुप’ यांचे सहप्रायोजक म्हणून सहकार्य लाभले, तर ‘सकाळ’ माध्यम पार्टनर म्हणून सहभागी झाले होते.

महिलांच्या सुप्त कलागुणांना वाव देणारा आणि त्यांच्या कर्तृत्वाला सन्मानित करणारा हा सोहळा उत्साहपूर्ण वातावरणात पार पडला. पुरस्काराने सन्मानित झाल्यानंतर अमिता कदम यांनी श्री धनलक्ष्मी महिला मंडळाचे पदाधिकारी, आयोजक आणि उपस्थितांचे मनःपूर्वक आभार मानले.

विशेष वृत्त - विश्वनाथ राऊत सर 

विरारमध्ये दिवाळीनिमित्त साड्यांचे भव्य विशेष प्रदर्शन !!

विरारमध्ये दिवाळीनिमित्त साड्यांचे भव्य विशेष प्रदर्शन !!

५०० रुपयांपासून ते २ लाख रुपयांपर्यंतच्या पैठणी साड्या उपलब्ध; महिलांसाठी खरेदीची पर्वणी

विरार प्रतिनिधी/ पंकज चव्हाण: 

दिवाळी सणाच्या पार्श्वभूमीवर महिलांच्या पारंपरिक आणि आकर्षक पेहरावाच्या खरेदीसाठी विरारमध्ये मनमोहक साड्यांच्या प्रदर्शनाचे आयोजन करण्यात आले आहे. केशरी पैठणी येवला यांच्या वतीने आयोजित करण्यात आलेले हे प्रदर्शन ३० व ३१ ऑक्टोबर तसेच १ नोव्हेंबर दरम्यान बालाजी बँक्वेट्स, विवा वेदगंगा कॉम्प्लेक्सजवळ, गोकुळ टाउनशिप, विरार पश्चिम येथे भरविण्यात येणार आहे.

या प्रदर्शनात येवला पैठणी, बनारसी, कांजीवरम, गढवाल, माहेश्वरी, फॅन्सी डिझायनर साड्या अशा विविध प्रकारच्या साड्यांचा आकर्षक संग्रह महिलांसाठी उपलब्ध करून देण्यात आला आहे. याशिवाय पैठणी ड्रेस, पर्स आणि इतर विविध वस्तूंचीही खरेदी करता येणार आहे.

विशेष म्हणजे, या प्रदर्शनात ५०० रुपयांपासून ते २ लाख रुपयांपर्यंतच्या विविध प्रकारच्या पैठणी साड्या उपलब्ध असणार आहेत. त्यामुळे आपल्या बजेटनुसार आणि आवडीनुसार साड्यांची निवड करण्याची संधी ग्राहकांना मिळणार आहे. सर्वसामान्य ग्राहकांपासून ते उच्च दर्जाच्या पारंपरिक साड्यांची आवड असलेल्या महिलांपर्यंत सर्वांसाठी या प्रदर्शनात खरेदीची संधी उपलब्ध होणार आहे.

दिवाळीच्या सणासाठी पारंपरिक साड्यांसह आधुनिक डिझाइन्सचीही मेजवानी या प्रदर्शनात मिळणार आहे. एकाच छताखाली विविध प्रकारच्या साड्या, आकर्षक रंगसंगती आणि वैविध्यपूर्ण डिझाइन्स उपलब्ध होणार असल्याने विरार आणि परिसरातील महिलांसाठी हे प्रदर्शन विशेष आकर्षण ठरणार आहे.

दिवाळीच्या खरेदीचा आनंद द्विगुणित करण्यासाठी आणि आपल्या आवडीच्या साड्यांची निवड करण्यासाठी महिलांनी या विशेष प्रदर्शनाला भेट द्यावी, असे आवाहन आयोजकांच्या वतीने करण्यात आले आहे.

संत गोन्सालो गार्सिया महाविद्यालयात वाचन प्रेरणा दिन उत्साहात साजरा !

संत गोन्सालो गार्सिया महाविद्यालयात वाचन प्रेरणा दिन उत्साहात साजरा !

वसई प्रतिनिधी/ पंकज चव्हाण

भारताचे माजी राष्ट्रपती, महान शास्त्रज्ञ आणि ‘मिसाईल मॅन’ डॉ. ए. पी. जे. अब्दुल कलाम यांच्या जयंतीनिमित्त संत गोन्सालो गार्सिया महाविद्यालय, वसई मध्ये ‘वाचन प्रेरणा दिन’ उत्साहात साजरा करण्यात आला. 

या कार्यक्रमाला महाविद्यालयाचे प्रशासक फादर डॉ.अनिल परेरा प्रमुख पाहुणे म्हणून उपस्थित होते. त्यांनी उपस्थितांना आशीर्वाद दिले तसेच ज्ञानार्जनासाठी पुस्तक वाचनाचे महत्त्व अधोरेखित केले. चांगली पुस्तके माणसाचे जीवन समृद्ध करतात असे ते म्हणाले. याप्रसंगी प्राचार्य डॉ. सोमनाथ विभुते, उप-प्राचार्या सरिथा कुरियन, हिंदी विभाग प्रमुख प्रा. डॉ. रामदास तोंडे, प्रा. सुजाता कुलकर्णी, डॉ. अजित कुमार यादव आणि प्रा. मॅकॅनोबल , प्रा. अँथनी डिमेलो यांच्यासह शिक्षकवृंद व विद्यार्थी मोठ्या संख्येने उपस्थित होते. 

कार्यक्रमाचे विशेष आकर्षण म्हणजे महाविद्यालयाच्या ग्रंथालयात आयोजित करण्यात आलेले ‘ शैक्षणिक वर्षात नव्याने आलेली पुस्तके’ या विषयावरील पुस्तक प्रदर्शन. विविध विषयांवरील नव्याने दाखल झालेल्या पुस्तकांना विद्यार्थ्यांचा उत्स्फूर्त प्रतिसाद मिळाला. विद्यार्थ्यांनी विविध पुस्तके पाहून त्यांची माहिती घेतली. 

यावेळी प्राचार्य डॉ. विभुते यांनी विद्यार्थ्यांना वाचनाची शपथ दिली. आपल्या मार्गदर्शनपर भाषणात त्यांनी नियमित वाचनामुळे ज्ञान, आकलनशक्ती, कल्पनाशक्ती, भाषिक कौशल्य आणि चिकित्सक विचारशक्ती विकसित होत असल्याचे सांगितले. विद्यार्थ्यांनी दररोज काही वेळ पुस्तक वाचनासाठी द्यावा, असे आवाहन त्यांनी केले.
वाचन कट्टा मधील विद्यार्थी, ग्रंथालय कर्मचारी यांनी कार्यक्रमाच्या आयोजनात सक्रिय सहभाग घेतला. त्यांच्या उत्स्फूर्त सहकार्यामुळे वाचन प्रेरणा दिनाचा कार्यक्रम यशस्वी आणि प्रेरणादायी ठरला. या उपक्रमातून विद्यार्थ्यांमध्ये ‘पुस्तकांशी मैत्री आणि वाचनातून प्रगती’ हा सकारात्मक संदेश रुजविण्यात आला.विद्यार्थ्यांमध्ये वाचनाची आवड निर्माण करणे, नियमित वाचनाची सवय विकसित करणे तसेच त्यांच्या ज्ञान, विचारशक्ती आणि व्यक्तिमत्त्व विकासाला चालना देणे हा या उपक्रमाचा मुख्य उद्देश्य होता.

पदोन्नतीतील आरक्षणाचा प्रलंबित प्रश्न सोडवा; मंत्रालयीन संघटनेची संसदीय समितीकडे मागणी !!

पदोन्नतीतील आरक्षणाचा प्रलंबित प्रश्न सोडवा; मंत्रालयीन संघटनेची संसदीय समितीकडे मागणी !! *मुंबई (महेंद्र उर्फ अण्णा पंडीत) :* म...