*माळशेज घाटातील रस्ता खचला; कल्याण-आहिल्यानगर महामार्ग वाहतुकीसाठी बंद, पर्यायी मार्गावर मोठी कोंडी !!

*माळशेज घाटातील रस्ता खचला; कल्याण-आहिल्यानगर महामार्ग वाहतुकीसाठी बंद, पर्यायी मार्गावर मोठी कोंडी !!

*कल्याण, प्रतिनिधी* : कल्याण-आहिल्यानगर महामार्गावरील माळशेज घाटातील रस्ता खचल्यामुळे हा महत्त्वाचा मार्ग सध्या वाहतुकीसाठी पूर्णपणे बंद करण्यात आला आहे. त्यामुळे पर्यायी मार्गावर मोठ्या प्रमाणात वाहतूक कोंडी होऊन हजारो प्रवासी आणि पर्यटक तासन्तास अडकून पडले आहेत.

*दुरुस्तीचे काम संथगतीने*  

खचलेल्या भागाच्या दुरुस्तीचे काम युद्धपातळीवर सुरू आहे. मात्र काम संथगतीने सुरू असल्याने वाहतूक पूर्ववत होण्यासाठी आणखी काही दिवसांचा कालावधी लागण्याची शक्यता आहे. तोपर्यंत सर्व प्रकारची वाहतूक पर्यायी मार्गाने वळवण्यात आली आहे.

*पर्यायी मार्गावर प्रचंड कोंडी*  

मात्र हा पर्यायी मार्ग अरुंद, एकेरी आणि काही ठिकाणी खराब अवस्थेत आहे. त्यामुळे वाहनचालकांना मोठ्या अडचणींचा सामना करावा लागत आहे. शनिवारी रात्रीपासूनच या मार्गावर मोठी वाहतूक कोंडी झाली. दोन हजारांहून अधिक पर्यटक आणि प्रवासी अनेक तास रस्त्यावर अडकून पडले होते. लांबच लांब लागलेल्या वाहनांच्या रांगांमुळे नागरिकांना मोठा मनस्ताप सहन करावा लागला.

*पर्यटकांसाठी महत्त्वाचा मार्ग*  

माळशेज घाट हा मुंबई, ठाणे, पुणे आणि आहिल्यानगरला जोडणारा प्रमुख मार्ग आहे. पावसाळ्यात निसर्गसौंदर्याचा आनंद घेण्यासाठी दर विकेंडला हजारो पर्यटक येथे येतात. त्यामुळे शनिवार-रविवारी या मार्गावरील वाहनांची संख्या मोठ्या प्रमाणात वाढते. सध्या पर्यायी मार्गाची मर्यादित क्षमता लक्षात घेता आजही मोठ्या वाहतूक कोंडीची शक्यता प्रशासनाने व्यक्त केली आहे.

*प्रशासनाचे आवाहन*  

या पार्श्वभूमीवर प्रशासनाने नागरिकांना अत्यावश्यक काम नसल्यास माळशेज घाट मार्गावरील प्रवास टाळण्याचे आवाहन केले आहे. प्रवास करणे आवश्यक असल्यास वाहतुकीची सद्यस्थिती जाणून घेऊनच घराबाहेर पडावे आणि पर्यायी मार्गांचा वापर करून नियोजनबद्ध प्रवास करावा, असे सांगण्यात आले आहे. 

दुरुस्तीचे काम पूर्ण होईपर्यंत वाहनचालकांनी संयम बाळगून प्रशासनाला सहकार्य करावे, असेही आवाहन करण्यात आले आहे.