महाविद्यालयीन विद्यार्थ्यांना निर्माल्यापासून कंपोस्ट खत निर्मितीचे प्रात्यक्षिक प्रशिक्षण !!
*डोंबिवली, दि. ६ सप्टेंबर २०२६, (राजू नलावडे)*
येणाऱ्या गणेशोत्सव आणि नवरात्र उत्सव काळात मोठ्या प्रमाणात जमा होणाऱ्या निर्माल्याबाबत जनजागृती व्हावी आणि महाविद्यालयीन विद्यार्थ्यांना निर्माल्यापासून कंपोस्ट खत कसे तयार होते याचे प्रात्यक्षिकासह प्रशिक्षण देण्यासाठी एका कार्यक्रमाचे आयोजन करण्यात आले होते.
हा कार्यक्रम आज रविवारी सकाळी ९.०० ते ११.३० या वेळेत श्री गणेश निर्माल्य खत प्रकल्प, एमआयडीसी, डोंबिवली येथे आयोजित करण्यात आला होता.
या प्रसंगी उपायुक्त (घनकचरा व्यवस्थापन, केडीएमसी) श्री रामदास कोकरे, निर्मल युथ फाउंडेशनच्या अध्यक्षा कु. अक्षता औटी, श्री गणेश मंदिर संस्थानचे सचिव व विश्वस्त प्रवीण दुधे, पर्यावरण तज्ज्ञ विजय घोडेकर, पर्यावरण प्रेमी राजीव तायशेटे, राजू नलावडे, राजू काळे, सचिन म्हात्रे आदी उपस्थित होते. प्रगती कॉलेज आणि एस.आय.ए. कॉलेजमधील एनएसएस स्वयंसेवक विद्यार्थी मोठ्या संख्येने सहभागी झाले होते.
या सर्व स्वयंसेवक विद्यार्थ्यांना प्रात्यक्षिकासह प्रशिक्षण देण्यात आले. येणाऱ्या गणेशोत्सवात विसर्जनस्थळी जमा होणारे निर्माल्य हे स्वयंसेवक विद्यार्थी गोळा करून प्लास्टिकविरहित स्वरूपात श्री गणेश निर्माल्य खत प्रकल्पात पोहोचवणार आहेत. यानिमित्ताने उपायुक्त श्री रामदास कोकरे यांनी नागरिकांनी निर्माल्य कसे द्यावे याबाबत जनतेला संदेश दिला.
सदर कार्यक्रमादरम्यान श्री गणेश निर्माल्य खत प्रकल्पाच्या आवारात श्री रामदास कोकरे यांच्या हस्ते वृक्षारोपण करण्यात आले.
या उपक्रमाचे आयोजन श्री गणेश मंदिर संस्थान, निर्मल युथ फाउंडेशन, कल्याण-डोंबिवली महानगरपालिका आणि सुमित एल्को (Sumeet ELCO) यांच्या संयुक्त विद्यमाने करण्यात आले होते.
No comments:
Post a Comment