'माझ्यावरील आरोप खोटे आणि निराधार, हे राजकीय षडयंत्र' - माजी आमदार नरेंद्र पवार यांचे स्पष्टीकरण
*कल्याण, प्रतिनिधी :* बलात्काराचा गुन्हा दाखल झाल्यानंतर माजी आमदार नरेंद्र पवार यांनी आपल्यावरील सर्व आरोप फेटाळून लावत त्यामागे सामाजिक आणि राजकीय षडयंत्र असल्याचा संशय व्यक्त केला आहे.
"माझ्यावरील आरोप पूर्णपणे खोटे आणि निराधार असून सत्य लवकरच समोर येईल. माझा भारतीय संविधान, कायदा आणि न्यायव्यवस्थेवर पूर्ण विश्वास आहे," असे पवार यांनी म्हटले आहे.
आपली प्रतिक्रिया देताना पवार म्हणाले, "मी तपास यंत्रणांना संपूर्ण सहकार्य करणार आहे. निष्पक्ष आणि सखोल तपासातून सत्य निश्चितपणे समोर येईल."
गेल्या काही दिवसांतील घटनाक्रमाकडे लक्ष वेधत त्यांनी सांगितले की, "मी ज्या भू-माफियाविरोधात आंदोलन करून आवाज उठवला होता, त्याच्याशी संबंधित व्यक्ती काल विरोधी पक्षातील लोकांसोबत पोलीस ठाण्यात उपस्थित असल्याचे माझ्या निदर्शनास आले. त्यानंतर घडलेला घटनाक्रम पाहता माझ्या मनात गंभीर प्रश्न निर्माण झाले आहेत."
"मी कोणावरही तथ्यहीन आरोप करू इच्छित नाही आणि तपास सुरू असताना अंतिम निष्कर्षही काढत नाही. मात्र, गेल्या काही दिवसांतील घडामोडी, त्यात सहभागी असलेल्या व्यक्ती आणि त्यानंतर माझ्याविरोधात दाखल झालेले प्रकरण या सर्व बाबींची स्वतंत्रपणे आणि निष्पक्षपणे चौकशी व्हावी," अशी मागणी त्यांनी केली.
"झालेले आरोप गंभीर असून माझ्यासाठी आणि माझ्या कुटुंबासाठी अत्यंत वेदनादायी आहेत. निष्पक्ष तपासातून संपूर्ण वस्तुस्थिती जनतेसमोर स्पष्ट होईल, असा विश्वास आहे," असेही पवार यांनी स्पष्ट केले.
No comments:
Post a Comment