डोंबिवली शास्त्रीनगर रुग्णालयातील डॉक्टर-सिस्टर मारहाण प्रकरण: नगरसेवक रमेश म्हात्रे यांच्या खटल्यात सरकारी पंच साक्षीदाराची साक्ष नोंद, पुढील सुनावणी आज !!
*कल्याण डोंबिवली : दीपक इंगळे*
*कल्याण, दिनांक : २० सप्टेंबर २०२६ -* डोंबिवली महानगरपालिकेच्या शास्त्रीनगर रुग्णालयातील डॉक्टर, सिस्टर आणि कर्मचाऱ्यांना मारहाण केल्याच्या गाजलेल्या प्रकरणात आरोपी असलेले शिवसेना नगरसेवक रमेश म्हात्रे यांच्या खटल्याची सुनावणी कल्याण जिल्हा सत्र जलदगती न्यायालयात वेगाने सुरू आहे. काल शनिवारी झालेल्या सुनावणी दरम्यान या प्रकरणातील एका महत्त्वाच्या सरकारी साक्षीदाराची साक्ष न्यायालयात नोंदवण्यात आली.
या प्रकरणाची पार्श्वभूमी अशी की, शास्त्रीनगर रुग्णालयात उपचाराच्या कारणावरून वाद होऊन नगरसेवक रमेश म्हात्रे यांनी डॉक्टर आणि कर्मचाऱ्यांना मारहाण केल्याचा आरोप आहे. या मारहाणीसाठी एका रजिस्टरचा वापर करण्यात आल्याचा आरोप फिर्यादीत करण्यात आला होता. या घटनेनंतर पोलिसांनी घटनास्थळावरून ते रजिस्टर जप्त केले होते आणि जप्तीची संपूर्ण कायदेशीर प्रक्रिया पार पाडून पंचनामा करण्यात आला होता.
काल झालेल्या सुनावणीत याच जप्ती पंचनाम्याशी संबंधित असलेल्या सरकारी पंच साक्षीदाराची साक्ष मा. न्यायालयासमोर नोंदवण्यात आली. सरकारी वकिलांनी या साक्षीदारामार्फत जप्तीची प्रक्रिया कशी पार पडली याबाबत न्यायालयात माहिती मांडली.
या सुनावणीच्या वेळी आरोपी नगरसेवक रमेश म्हात्रे स्वतः न्यायालयात हजर होते. मा. जिल्हा सत्र न्यायाधीश एन. पी. वासाडे यांच्या न्यायालयात ही संपूर्ण कार्यवाही पार पडली.
आरोपीच्या वतीने ज्येष्ठ विधिज्ञ अॅड. अनंत पत्की, अॅड. एम. के. काझी आणि अॅड. यू. झेड. काझी यांनी बाजू मांडली, तर सरकारी पक्षातर्फे सरकारी वकील प्रकाश साळसिंगीकर यांनी युक्तिवाद केला.
दरम्यान, या प्रकरणाकडे संपूर्ण डोंबिवलीतील वैद्यकीय क्षेत्राचे आणि राजकीय वर्तुळाचे लक्ष लागले आहे. या प्रकरणाची पुढील सुनावणी उद्या दिनांक २१ सप्टेंबर रोजी होणार असून पुढील सरकारी साक्षीदारांना न्यायालयात हजर केले जाणार असल्याची माहिती सूत्रांकडून मिळत आहे.
No comments:
Post a Comment