खरांगण येथील वयोवृद्ध महिला शेतकऱ्यांची खासदार सुप्रिया सुळे यांच्याकडे तक्रार; लक्ष घालण्याचे आश्वासन !
*कल्याण (संजय कांबळे) :* शहापूर तालुक्यातील शेवटचे गाव असलेल्या खरांगण (सोगाव) येथील वयोवृद्ध महिला शेतकरी सोनूबाई वाळकू हरड यांनी गावालगत शाई नदीवर बांधलेल्या बंधाऱ्यामुळे आपली संपूर्ण भातशेती वाहून गेल्याची तक्रार खासदार सुप्रिया सुळे यांच्याकडे केली आहे.
सोनूबाई हरड यांची 6 ते 7 एकर शेती शाई नदीलगत असून त्यात त्या भात, भुईमूग, उडीद, मूग, नागली आदी पिके घेत होत्या. मात्र 5-6 महिन्यांपूर्वी कोणालाही न विचारता सुमारे 98 लाख रुपये खर्चून बंधारा बांधण्यात आला. कागदोपत्री ठेकेदार शशिकांत गायकवाड असला तरी प्रत्यक्ष काम एका वनपालाच्या मुलाने केल्याचा आरोप आहे. या बंधाऱ्यामुळे भातशेती वाहून जाऊन जमीन नापीक बनल्याने उपासमारीची वेळ आल्याचे हरड यांनी सांगितले.
याबाबत त्यांनी जिल्हाधिकारी, वनविभाग आणि जलसंधारण विभागाकडे तक्रारी केल्या होत्या. दबाव वाढल्याने संबंधित ठेकेदार प्रत्येक कार्यालयात जाऊन "आमचं मिटलंय" असे सांगत असल्याचा आणि काही अधिकाऱ्यांकडून त्याला वाचवण्याचा प्रयत्न होत असल्याचा आरोपही त्यांनी केला.
या पार्श्वभूमीवर सोनूबाई हरड यांनी थेट राष्ट्रवादी काँग्रेस शरदचंद्र पवार पक्षाच्या राष्ट्रीय कार्याध्यक्षा खासदार सुप्रिया सुळे यांची भेट घेऊन निवेदन दिले. यावेळी त्यांच्यासोबत भारती हरड, निता हरड, कल्याणी हरड, भूमिका हरड, ललिता हरड, छाया हरड, दुर्गा हरड, करुणा हरड, संजना हरड आणि आकांक्षा हरड आदी महिला उपस्थित होत्या.
खासदार सुळे यांनी संपूर्ण माहिती घेऊन या प्रकरणात लक्ष घालून संबंधित अधिकाऱ्यांवर कारवाई करायला भाग पाडू, असे आश्वासन दिले.
No comments:
Post a Comment