वरप-कांबा येथील राष्ट्रवादीचा महिला मेळावा प्रचंड यशस्वी; सुप्रिया सुळे यांचा सरकारवर हल्लाबोल !!
*कल्याण (संजय कांबळे) :* राष्ट्रवादी काँग्रेस शरदचंद्र पवार पक्षाच्या वतीने भरतभाऊ गोंधळे आयोजित कल्याण तालुक्यातील वरप-कांबा येथील महिला मेळाव्याला महिलांची तुफान गर्दी झाली. या मेळाव्यात पक्षाच्या राष्ट्रीय कार्याध्यक्षा आणि खासदार सुप्रिया सुळे यांनी केंद्रातील मोदी सरकार आणि महाराष्ट्र शासनावर चौफेर टीका केली.
व्यासपीठावर प्रदेशाध्यक्ष शशिकांत शिंदे, आमदार डॉ. जितेंद्र आव्हाड, प्रदेश प्रवक्ते महेश तपासे, महिला प्रदेशाध्यक्षा विद्याताई वेखंडे यांच्यासह उल्हासनगर, कल्याण, मुरबाड, शहापूर, भिवंडी तालुक्यातील प्रमुख पदाधिकारी उपस्थित होते.
पक्षाचे जिल्ह्यातील नेते भरतभाऊ गोंधळे यांनी नुकताच राष्ट्रवादी काँग्रेस शरदचंद्र पवार पक्षात प्रवेश केला असून त्यांच्या वतीने हा मेळावा आयोजित करण्यात आला होता. प्रास्ताविकात ते म्हणाले, "मी एक सामान्य कार्यकर्ता आहे. साहेबांना आणि ताईंना मानणारा मोठा वर्ग या परिसरात आहे, त्यांच्या आग्रहाने हा मेळावा घेतला."
याप्रसंगी बोलताना खासदार सुप्रिया सुळे म्हणाल्या, "या सरकारमधील आमदार-खासदार हे कॉपी करून पास झाले आहेत. महागाई इतकी वाढली की साध्या बिस्किटाचा आकार कमी झाला, पण किंमत वाढली. लाडक्या बहिणीचा मतासाठी वापर केला गेला. 2029 पर्यंत महिला आरक्षण लागू केले नाही तर आम्ही प्रचंड विरोध करू." महिलांची ही मोठी उपस्थिती भविष्यातील बदलाची नांदी असल्याचे भाकीतही त्यांनी केले.
प्रदेशाध्यक्ष शशिकांत शिंदे म्हणाले, "सरकारचा भोंगळ कारभार सुरू आहे. शेतकरी, कामगार, कष्टकऱ्यांचे प्रश्न गंभीर बनले आहेत. या सरकारला 2029 ला घालवायचे आहे." तर कल्याणमधून हजारो मतदारांची नावे गायब केल्याचा आरोप महेश तपासे यांनी केला.
या मेळाव्यात संगीत मैफलीने रंगत आणली. हा कार्यक्रम यशस्वी करण्यासाठी म्हारळ, वरप, कांबा परिसरातील कार्यकर्ते आणि पदाधिकाऱ्यांनी विशेष मेहनत घेतली.
No comments:
Post a Comment