मुरबाड तालुक्यातील भोंडाई महोत्सव उत्साहात; जिल्हाधिकारी, पोलीस अधीक्षकांची उपस्थिती !!

मुरबाड तालुक्यातील भोंडाई महोत्सव उत्साहात; जिल्हाधिकारी, पोलीस अधीक्षकांची उपस्थिती !!

*कल्याण (संजय कांबळे) :* मुरबाड-शहापूर तालुक्याची सांस्कृतिक परंपरा जपणारा आणि आदिवासी संस्कृतीचे दर्शन घडवणारा भव्य 'भोंडाई महोत्सव' मुरबाड येथील वैशाखरे (पारधवाडी) झाडघर येथे मोठ्या उत्साहात संपन्न झाला.

मुरबाड विधानसभेचे आमदार किसन कथोरे यांच्या संकल्पनेतून आणि मार्गदर्शनाखाली आयोजित या महोत्सवाला जिल्हाधिकारी डॉ. श्रीकृष्ण पांचाळ आणि ठाणे ग्रामीणचे पोलीस अधीक्षक डॉ. विनयकुमार राठोड प्रमुख पाहुणे म्हणून उपस्थित होते.

भोंडाई हा आदिवासी समाजाचा पारंपरिक उत्सव असून निसर्ग, शेती आणि लोककलांचा अनोखा संगम आहे. कडक उन्हातही आदिवासी महिलांनी या महोत्सवाला उत्स्फूर्त प्रतिसाद दिला.

या महोत्सवात आदिवासी बांधवांचे पारंपरिक नृत्य, गीत व वाद्यांचे सादरीकरण, आदिवासी हस्तकला, खाद्यपदार्थ व कृषी प्रदर्शन, स्थानिक कलाकारांचे सांस्कृतिक कार्यक्रम आणि आदिवासी संस्कृतीची माहिती देणारे स्टॉल्स ही वैशिष्ट्ये होती. पारंपरिक वेशभूषेत सजलेल्या आदिवासी बांधवांच्या नृत्याने उपस्थितांची मने जिंकली.

यावेळी जिल्हाधिकारी डॉ. पांचाळ म्हणाले, "भोंडाई महोत्सव ही केवळ परंपरा नाही, तर आदिवासी समाजाची ओळख आहे. अशा महोत्सवांमुळे स्थानिक कला, संस्कृती आणि परंपरांना प्रोत्साहन मिळते. प्रशासन नेहमीच अशा उपक्रमांना पाठिंबा देईल."

आमदार किसन कथोरे यांनी आदिवासी बांधवांसाठी राबवलेल्या विविध योजना आणि विकासकामांची माहिती दिली.

यावेळी जि. प. माजी उपाध्यक्ष सुभाष पवार, ठाणे-पालघर जिल्हा मध्यवर्ती बँकेचे चेअरमन अरुण पाटील, कल्याण कृषी उत्पन्न बाजार समितीचे सभापती रविंद्र घोडविंदे, तहसीलदार अभिजित देशमुख, कामगार उपायुक्त सौ. क्षीरसागर, गटविकास अधिकारी लता गायकवाड, डीवायएसपी अनिल लाड यांच्यासह पदाधिकारी, विविध विभागांचे अधिकारी, कलाकार आणि हजारो आदिवासी बंधू-भगिनी उपस्थित होते.