श्री.साईबाबांचे व्‍दारकामाई मंदिर पुर्वीप्रमाणे राहणार रात्रभर खुले; भाविकांसह शिर्डी ग्रामस्थांमध्ये आनंदाचे वातावरण !
भिवंडी, दिं,३, अरुण पाटील (कोपर) :
शिर्डीतील श्री.साई बाबांचे व्‍दारकामाई मंदिर पुर्वीप्रमाणे रात्रभर भाविकांना दर्शनासाठी खुले ठेवण्याचा महत्वाचा निर्णय साईबाबा संस्थानच्या तदर्थ समितीने घेतल्याची माहिती श्री. साईबाबा संस्थानचे प्रभारी मुख्य कार्यकारी अधिकारी राहुल जाधव यांनी दिली. श्री. साई बाबांचे द्वारकामाई मंदिर रात्रभर खुले राहणार असल्याने भाविकांमध्ये व ग्रामस्थांमध्ये आनंदाचे वातावरण पसरले आहे.
कोरोना काळात संसर्गाचा वाढता प्रादुर्भाव लक्षात घेता शासनाने सर्वच धार्मिक तीर्थक्षेत्र बंद ठेवण्याचे आदेश दिले होते. त्यानंतर कोरोनाचा प्रादुर्भाव जसा जसा कमी होत गेला, तसे निर्बंधही शिथिल होते गेले. पुन्हा इतर मंदिरांप्रमाणे श्री.साई मंदिराचे दरवाजे देखील भाविकांना दर्शनासाठी खुले झाले. मात्र श्री.साई बाबांचे व्‍दारकामाई मंदिर श्री. साईबाबा संस्थानच्या वतीने भाविकांना दर्शनासाठी दिवसभर खुले आणि रात्रभर बंद ठेवण्यात येत होते.
त्यामुळे अनेक भाविकांनी तसेच ग्रामस्थांनी श्री. साई बाबांची द्वारकामाई मंदिर पूर्वीप्रमाणे रात्रभर खुले करण्याची मागणी श्री.साई संस्थानकडे केली होती. भाविक आणि शिर्डी ग्रामस्थांच्या या मागणीकडे पाहाता श्री.साई संस्थांच्या तदर्थ समितीने पूर्वीप्रमाणे व्‍दारकामाई मंदिर रात्रभर खुले ठेवण्याचा निर्णय घेतल्याची माहिती श्री.साईबाबा संस्थानचे प्रभारी मुख्य कार्यकारी अधिकारी राहुल जाधव यांनी दिली आहे.
श्री.साई बाबांच्या समाधीच्या दर्शननंतर भाविक व्‍दारकामाई, चावडी व गुरुस्‍थान आदी ठिकाणी प्राधान्‍याने दर्शनासाठी जातात. शिर्डी ग्रामस्थ साई बाबांच्या समाधी मंदिरात दर्शनाला जाण्या अगोदर द्वारकामाईचे दर्शन घेतात. त्याचबरोबर श्री. साई बाबांच्या मंदिरात होणाऱ्या चारही आरती काही भाविक व्‍दारकामाईत बसून करतात. श्री.साईबाबा संस्थानने आजपासून पूर्वीप्रमाणे व्‍दारकामाई मंदिर खुले केल्याने भाविकांसह ग्रामस्थांनी साई संस्थानचे आभार मानले आहेत.
श्री.साई बाबांनी संपूर्ण जीवन याच व्‍दारकामाईत व्‍यतीत करुन जगाला सबका मालिक एकचा महामंत्र दिला. त्याचबरोबर श्री.साईबाबांनी अनेक भाविकांना अन्‍नदान, रुग्‍ण सेवा, ज्ञानदान या त्रिसुत्रीची शिकवण दिली. या व्‍दारकामाईत श्री. साई बाबांनी धुनी पेटवली आहे. त्यामुळे व्‍दारकामाईस अनन्‍य साधारण महत्‍व आहे. त्यामुळे श्री. साई बाबांच्या दर्शनासाठी शिर्डीत आलेला प्रत्येक भाविक श्री.साई बाबांच्या समाधीच्या दर्शनानंतर साईबाबांच्या व्‍दारकामाईत दर्शनासाठी जात असतो.
व्‍दारकामाई मंदिर पूर्वीप्रमाणे खुले करण्यात आले आहे. पहाटे ५ ते रात्री ९.३० यावेळेत व्‍दारकामाईतील गाभारा दर्शन सुरु राहणार असून व्‍दारकामाई सभामंडप श्री.साईभक्‍तांना दर्शनासाठी रात्रभर खुला ठेवण्यात येणार आहे. भाविकांनी या सुविधेचा लाभ घ्‍यावा, असे आवाहनही श्री.साईबाबा संस्थानचे प्रभारी मुख्य कार्यकारी अधिकारी राहूल जाधव यांनी केले आहे.
No comments:
Post a Comment