भिवंडीसाठी एकत्रित बस सेवा सुरू करण्याचा राज्य सरकारचा निर्णय !!

भिवंडीसाठी एकत्रित बस सेवा  सुरू करण्याचा राज्य सरकारचा निर्णय !!

भिवंडी, (कोपर), दिं,१६, अरुण पाटील :

        भिवंडी-निजामपूर शहर पालिका, कल्याण -डोंबिवली महानगर पालिका, उल्हास नगर नगर पालिका, अंबरनाथ नगर परिषद आणि कुळगाव-बदलापूर नगर परिषद यांची एकत्रीत  वाहतूक सेवा स्थापन करण्याचा निर्णय राज्य सरकारने बुधवारी घेतला.

        एकत्रीत (संयुक्त) परिवहन सेवेच्या माध्यमातून मुंबई महानगर क्षेत्रासाठी आणखी एक सक्षम सार्वजनिक वाहतुकीचा पर्याय उपलब्ध होणार असल्याने नागरिकांना दिलासा मिळेल, असा विश्वास मुख्यमंत्री एकनाथ शिंदे यांनी व्यक्त केला. या भागातील लोकांच्या गरजा लक्षात घेऊन हा निर्णय घेण्यात आला आहे.

        एकत्रित परिवहन सेवेमुळे प्रवाशांना रास्त भाड्यात परिवहन सेवा मिळणार आहे. तसेच या भागातील सार्वजनिक वाहतूक व्यवस्था सुधारल्यास वाहतूक कोंडीची समस्या कमी होण्यास मदत होईल, असा सरकारचा दावा आहे.

        भिवंडी निजामपूर शहर महानगर पालिका क्षेत्रापासून जवळच असलेल्या कल्याण - डोंबिवली महापालिका, उल्हासनगर महापालिका, अंबरनाथ महापालिका आणि कुळगाव बदलापूर महापालिका या स्थानिक स्वराज्य संस्थांच्या परिवहन सेवा पूर्ण क्षमतेने कार्यरत नसल्याचे नागरिकांना अनेक समस्यांना सामोरे जावे लागते. त्यामुळे कल्याण-डोंबिवली महापालिकेच्या परिवहन उपक्रमातून या भागात बससेवा सुरू करावी, अशी मागणी नागरिकांकडून सातत्याने होत होती.

        संयुक्त परिवहन सेवेसाठी कल्याण-डोंबिवली महापालिका क्षेत्रातील शहाड येथील संयुक्त परिवहन उपक्रमाच्या प्रशासकीय कार्यालयासाठी परिवहन इमारत बांधण्याचा निर्णय घेण्यात आला आहे.

        इलेक्ट्रिक बस प्रदूषण नियंत्रण आणि पर्यावरण संरक्षणावर सरकार भर देत आहे. या परिवहन सेवेत नवीन इलेक्ट्रिक बसेसचा समावेश होणार असल्याने शहरातील वायू प्रदूषणाची पातळी नियंत्रित करणे किंवा कमी करणे शक्य होणार आहे.