कोकण कन्या सृष्टी कुळ्ये चे 'यूपीएससी'त यश !!

कोकण कन्या सृष्टी कुळ्ये चे 'यूपीएससी'त यश !!

**** आई- वडील, माझे मार्गदर्शक शिक्षक, मला प्रोत्साहन देणारे हितचिंतक यांचे पाठबळ मिळाले. या सर्वांच्या प्रोत्साहनामुळे मी हे यश मिळवू शकले. - सृष्टी कुळ्ये

कोकण, (शांताराम गुडेकर) :

           सृष्टी कुळ्ये ही मूळची रत्नागिरी जिल्ह्यातील लांजा तालुक्यामधील शिरवली (पलीकडचीवाडी) येथील राहणारी, सध्या ती मुंबईत राहते. तिचे वडील सुरेश कुळ्ये हे मुंबईत एका प्रिंटिंग प्रेसमध्ये मशीन ऑपरेटर म्हणून काम करतात, तर आई गृहिणी आहे. सृष्टी हिला दोन भावंडे असून, ती या सर्वात मोठी आहे. घरची परिस्थिती बेताची आहे, तरीही सृष्टी हिने केवळ जिद्द, चिकाटी आणि प्रचंड मेहनत या त्रिसूत्रीच्या जोरावर सृष्टी हिने यूपीएससीमध्ये यश संपादन करत देशात ८३१ रँक मिळवली.

            लेकीने (सृष्टी) मिळविलेल्या यशानंतर आई-वडिलांच्या डोळ्यांतून आनंदाश्रू वाहू लागले. महाराष्ट्र दिनाचे औचित्य साधून कु. सृष्टी कुळये हिचे तिच्या मानखुर्द येथे राहत्या घरी जाऊन लांजा तालुक्यातील भांबेड गावातील श्री वाघजाई तरुण विकास मंडळ- नार्डेकरवाडी यांच्याकडून पुष्पगुछ, शाल आणि भारताचे संविधान देऊन सत्कार करण्यात आला. तसेच तिच्याशी आणि तिच्या परिवाराशी सुसंवाद साधण्यात आला. तिच्या UPSC स्पर्धा परीक्षेबद्दलचा प्रवास, तिने केलेली मेहनत इ. गोष्टीची माहिती घेऊन उपस्थित सभासदांनी तिला मंडळातर्फे अभिनंदन आणि शुभेच्छा व्यक्त केल्या. हा कार्यक्रम श्री. संतोष नार्डेकर यांच्या माध्यमातून पार पडला. त्यामुळे मंडळातर्फे आणि उपस्थित सभासद यांचे यानिमित्ताने आभार व्यक्त करण्यात आले. श्री वाघजाई माता तिला यश, कीर्ती आणि दीर्घ आयुष्य देवो हीच प्रार्थनाही या सत्कार दरम्यान करण्यात आली.

              सध्या सृष्टी मुंबईतील मानखुर्द शिवनेरीनगर येथील झोपडपट्टीत राहत असल्याने या ठिकाणी तिचा अभ्यास होत नव्हता. त्यामुळे तिने सन २०२२ मध्ये गोवंडी येथील एम.पॉवर लायब्ररीत प्रवेश घेतला. घरात कोणत्याही प्रकारचे शैक्षणिक वातावरण नाही. घरच्या बेताच्या परिस्थितीमुळे कोणतीही शिकवणी नाही. अशा परिस्थितीतही सृष्टी हिने केवळ इच्छाशक्ती आणि अभ्यासाच्या जोरावर गरुडझेप घेतली. तिने मिळविलेल्या या यशानंतर शिरवली युवक मंडळ आणि कुळ्ये परिवारातर्फेही तिचा सत्कार करण्यात आला.

            लांजा तालुक्यातील भांबेड गावातील नार्डेकर वाडी श्री वाघजाई तरुण विकास मंडळ मुंबईचे श्री.संतोष नार्डेकर, पांडुरंग दैत, सुनील नार्डेकर, यशवंत जाधव, पंढरीनाथ शिगम, मनोहर दैत, राजाराम दैत, नरेश दैत, नागेश नार्डेकर, अनिल नार्डेकर आणि सिध्दी नार्डेकर तसेच अन्य पदाधिकारी आणि वाडकरी उपस्थित होते.

            घरच्या परिस्थितीची कल्पना होती.आई-वडिलांचे कष्ट पाहत होते. त्यामुळे चांगले शिकायचे आणि मोठे व्हायचे हे मनाशी ठरविले होते. त्यासाठी आई- वडील, माझे मार्गदर्शक शिक्षक, मला प्रोत्साहन देणारे हितचिंतक यांचे पाठबळ मिळाले. या सर्वांच्या प्रोत्साहनामुळे मी हे यश मिळवू शकले असे सृष्टी कुळ्ये यांनी सत्कारला उत्तर देताना स्पष्ट केले. या यशा बद्दल लांजा तालुका मधील अनेक मंडळ, समाज शाखा यांच्या तर्फे सृष्टी यांना अनेकांकडून शुभेच्छा देण्यात आल्या आहेत.