कल्याण-मोहने परिसरात मध्यरात्री गोळीबार !!

कल्याण-मोहने परिसरात मध्यरात्री गोळीबार !!

तीन आरोपी अटकेत

कल्याण, संदीप शेंडगे : मोहने-अटाळी परिसरातील पाटील नगर येथे शुक्रवारी मध्यरात्री सुमारे १२ वाजण्याच्या सुमारास गोळीबाराची घटना घडल्याने परिसरात खळबळ उडाली आहे. या प्रकरणी पोलिसांनी तातडीने कारवाई करत तीन आरोपींना अटक केली असून पुढील तपास सुरू आहे.

पोलिसांनी दिलेल्या माहितीनुसार, अभिषेक उर्फ अभी पवार आणि त्याचे काही साथीदार पाटील नगर परिसरातून जात असताना मोनू फुलोरे यांच्यात जुन्या वादाच्या कारणावरून वाद झाला. त्यानंतर मोनू फुलोरे यांच्या दिशेने दोन राऊंड फायरिंग करण्यात आल्याचा आरोप करण्यात आला आहे. 

गोळीबारानंतर घाबरलेल्या मोनू फुलोरे यांनी तात्काळ खडकपाडा पोलिस ठाणे गाठून तक्रार दाखल केली. फिर्यादीच्या फुलोरे यांच्या म्हणण्यानुसार, अभि पवार यांनी आपल्यावर गुन्हा दाखल होऊ नये यासाठी  स्वतःवरच गोळी झाडून घेतल्याचा धक्कादायक दावा करण्यात आला आहे. या दाव्याची पोलिसांकडून पडताळणी करण्यात येत आहे. 

प्राथमिक तपासात व्हॉट्सॲप स्टेटसवरून सुरू झालेला वाद आणि पूर्वीचे मतभेद हे या घटनेमागील प्रमुख कारण असल्याचे समोर आले आहे. परिसरात काही काळ तणावाचे वातावरण निर्माण झाले होते.

या प्रकरणी पोलिसांनी तातडीने कारवाई करून तीन आरोपींना अटक केली आहे. घटनेचा अधिक तपास वरिष्ठ पोलीस निरीक्षक अमरनाथ वाघमोडे यांच्या मार्गदर्शनाखाली पोलीस निरीक्षक आंधळे करीत असून गोळीबारामागील नेमके कारण आणि इतर संबंधित बाबींचा सखोल तपास करण्यात येत आहे.

या घटनेमुळे मोहने-अटाळी परिसरात पुन्हा एकदा कायदा व सुव्यवस्थेचा प्रश्न ऐरणीवर आला असून नागरिकांनी अशा प्रकारच्या गुन्हेगारी प्रवृत्तींवर कठोर कारवाईची मागणी केली आहे.