संगीतमय सुरसंगमात महापुरुषांना मानवंदना; कल्याणात प्रबोधनाचा जागर, समाजभूषण पुरस्काराने मान्यवरांचा गौरव !!
*कल्याण, दि. 1 जुलै 2026*
कल्याण येथील आचार्य अत्रे नाट्यगृहात "महापुरुषांना संगीतमय मानवंदना" आणि "समाजभूषण पुरस्कार" वितरण सोहळा मंगळवार दि. 30 जून रोजी उत्साहात संपन्न झाला. समाजप्रबोधन आणि मनोरंजनाचा अनोखा संगम यावेळी अनुभवायला मिळाला.
*महापुरुषांच्या विचारांचा जागर*
विविध क्षेत्रातील मान्यवर, कलाकार, प्रशासकीय अधिकारी, सामाजिक व राजकीय कार्यकर्ते, पत्रकार तसेच नागरिकांच्या उपस्थितीत कार्यक्रम दिमाखात पार पडला. गीत, संगीत, निवेदन आणि प्रेरणादायी सादरीकरणाच्या माध्यमातून छत्रपती शिवाजी महाराज, महामानव डॉ. बाबासाहेब आंबेडकर, भगवान गौतम बुद्ध, महात्मा ज्योतिराव फुले, क्रांतीज्योती सावित्रीबाई फुले, संत तुकाराम महाराज यांच्यासह विविध महापुरुषांच्या कार्याला अभिवादन करण्यात आले. संपूर्ण सभागृह देशभक्ती, सामाजिक जाणीव आणि प्रेरणादायी वातावरणाने भारावून गेले.
*समाजभूषण पुरस्कार वितरण*
यावेळी विविध क्षेत्रात उल्लेखनीय कार्य करणाऱ्या मान्यवरांना "समाजभूषण पुरस्कार" देऊन गौरविण्यात आले.
*सन्मानित मान्यवर*: ज्येष्ठ पत्रकार व अन्याय विरुद्ध संघर्ष समिती संस्थापक अध्यक्ष दिलीप मालवणकर, प्रशासकीय अधिकारी प्रशांत मानकर, राजेंद्र साळुंखे, नगरसेवक महेश गायकवाड, समाजसेवक रामजीत जीतू गुप्ता, सुरेश सोनवणे, पुष्पा कांबळे, लताताई एस पडघान.
*व्हॉईस ऑफ मीडिया पुरस्कार*: पत्रकारिता आणि सामाजिक क्षेत्रातील योगदानाबद्दल सचिन बुटाला, सुरेश जगताप, सलीम मन्सूरी, गौतम गवई, संदीप शेंडगे, प्रशांत ढोणे यांचा मान्यवरांच्या हस्ते सन्मान करण्यात आला. उपस्थितांनी त्यांचे अभिनंदन करून पुढील वाटचालीस शुभेच्छा दिल्या.
*विशेष उपस्थिती*
कार्यक्रमाला बिग बॉस मराठी फेम लोकप्रिय कलाकार संतोष चौधरी उर्फ दादूस यांची विशेष उपस्थिती लाभली. तसेच संघर्षयोद्धा निलेशदादा येलवे, अतुल भोईर यांच्यासह अनेक मान्यवरांनी कार्यक्रमाची शोभा वाढवली.
मनोरंजनासोबतच सामाजिक बांधिलकी आणि महापुरुषांचे विचार देणारा हा कार्यक्रम उपस्थितांच्या मनात कायमस्वरूपी ठसा उमटवून गेला. सामाजिक जाणीव जागृत ठेवत महापुरुषांच्या विचारांचा वारसा पुढील पिढीपर्यंत पोहोचवण्याचा हा उपक्रम प्रेरणादायी ठरल्याची भावना उपस्थितांनी व्यक्त केली.
No comments:
Post a Comment