दुकानदारांना बनावट UPI पेमेंटचा सापळा; 'Payment Successful' दाखवून फसवणुकीचा प्रयत्न !!
*प्रतिनिधी* : ऑनलाईन पेमेंटच्या नावाखाली दुकानदारांची फसवणूक करणाऱ्या नव्या प्रकाराला आळा घालण्यासाठी जनजागृतीचा व्हिडिओ सोशल मीडियावर व्हायरल होत आहे. बनावट UPI अॅपच्या मदतीने 'Payment Successful' चा खोटा स्क्रीन दाखवून दुकानदारांना कसे टोपी घातली जाते, हे या व्हिडिओत प्रत्यक्ष दाखवण्यात आले आहे.
*काय आहे फसवणुकीचा प्रकार?*
व्हिडिओमध्ये दाखविल्याप्रमाणे, फसवणूक करणारा ग्राहक खरेदी केल्यानंतर दुकानदाराला बनावट UPI अॅपवर तयार केलेला "Payment Successful" चा स्क्रीनशॉट किंवा फेक नोटिफिकेशन दाखवतो. बऱ्याचदा गडबडीत दुकानदार खात्यात पैसे आले आहेत का याची खात्री न करता माल देतात. प्रत्यक्षात मात्र रक्कम दुकानदाराच्या खात्यात जमा झालेली नसते.
*पोलिस आणि तज्ज्ञांचा सल्ला*
या वाढत्या सायबर फसवणुकीबाबत दुकानदारांना सतर्क करण्यासाठी हा जनजागृतीपर व्हिडिओ प्रसारित करण्यात आला आहे.
व्हिडिओच्या माध्यमातून दुकानदारांना पुढील सूचना देण्यात आल्या आहेत:
- *खात्री केल्याशिवाय माल देऊ नका* : ग्राहकाने दाखवलेल्या स्क्रीनशॉटवर किंवा मेसेजवर विश्वास ठेवू नका. तुमच्या बँक खात्यात किंवा अधिकृत UPI अॅपमध्ये रक्कम जमा झाल्याची SMS/अॅप नोटिफिकेशन स्वतः तपासूनच माल द्या.
- *नेटवर्क आणि साऊंड ऑन ठेवा* : पेमेंटचे खरे नोटिफिकेशन येण्यासाठी मोबाईलचा इंटरनेट आणि आवाज सुरू ठेवा.
- *संशयास्पद व्यवहार* : काही संशयास्पद वाटल्यास त्वरित 1930 या राष्ट्रीय सायबर हेल्पलाइन क्रमांकावर तक्रार नोंदवा.
छोट्या-मोठ्या दुकानदारांनी या नवीन फसवणुकीच्या प्रकाराबत जागरूक राहून व्यवहारात अधिक सावधगिरी बाळगावी, असे आवाहन करण्यात आले आहे.
No comments:
Post a Comment