समेळपाडयात अनधिकृत बांधकामांच्या संख्येत दिवसेंदिवस वाढ..

समेळपाडयात अनधिकृत बांधकामांच्या संख्येत दिवसेंदिवस वाढ..

*सदनिका घेतल्याने सर्वसामान्य नागरिकांची फसवणूक*

नालासोपारा प्रतिनिधी – “अनधिकृत बांधकामांवर कारवाई करा’, असे राज्यसरकारचे आदेश असतानाही महापालिका  यांच्याकडून कोणतीच कारवाई होत नाही. त्यामुळे समेळपाड्यात अनधिकृत बांधकामांची संख्या वाढत असून, त्यामध्ये सदनिका घेतल्याने सर्वसामान्य नागरिकांची फसवणूक होत आहे.

अनधिकृत बांधकामांमुळे समेळपाडा बकाल होत आहे. अनधिकृत बांधकामांवर वेळीच उपाययोजना न केल्याने दिवसेंदिवस यामध्ये वाढ होताना दिसत आहे. या अनधिकृत बांधकाम करणाऱ्यांना ना कायद्याचे बंधन ना कुणाची भीती उरली नसल्याचे दिसून येत आहे.

अनधिकृत बांधकामांमध्ये पार्किंगची सुविधा नसते. तसेच, रस्त्यासाठी आवश्‍यक ती मोकळी जागा सोडलेली नसते. त्यामुळे वाहतुकीची समस्या निर्माण होते. अशा इमारतींन कडुन लाखो रुपये घेऊन महापालिकेकडून पाणीपुरवठा तसेच महावितरणकडून वीजेची जोडणी देण्यात येते. यावेळीही अधिकृत की अनधिकृत बांधकाम याची तपासणी संबंधित यंत्रणेकडून होताना दिसत नाही. कोणतीच यंत्रणा ही बाब गांभीर्याने पहात नसल्याने या अनधिकृत बांधकाम वाल्यांचे अधिक फावते.

अनधिकृत बांधकामे करताना नियम पायदळी, अनधिकृत बांधकामे करणाऱ्या व्यक्‍तींकडून कोणत्याच नियमांचे पालन केले जात नाही. 

आर्थिक फायद्यासाठी लोकांच्या जीवाशी खेळ, अनधिकृत बांधकाम करणारी व्यक्‍ती ही बांधकाम लवकर पूर्ण करून ते विकून मोकळे होण्याच्या मार्गावर असते. त्यामुळे बांधकामाची गुणवत्ता राखली जात नाही. पर्यायाने अशा अनधिकृत बांधकामांमध्ये राहणाऱ्या नागरिकांच्या जीवावर अपघाताची टांगती तलवार कायम राहाते.

 यापूर्वी अनधिकृत बांधकामे उभारतानाच पडल्याच्या घटना घडल्या आहेत. तसेच, इमारत पूर्ण झाल्यावर पडल्याच्या घटना घडल्या आहेत. यामध्ये नागरिकांना आपला जीव गमवावा लागला आहे. त्यामुळे थोड्या आर्थिक फायद्यासाठी अनधिकृत बांधकाम करणाऱ्या व्यक्‍तींकडून सर्वसामान्य नागरिकांच्या जीवाशी खेळण्याचा प्रकार होताना दिसत आहे.

यासंदर्भात महापौर अजीव पाटील यांना निवेदन देऊन कारवाई ची मागणी करणार आहे कारवाई न झाल्यास प्रभाग समिती ई येथे ठिय्या आंदोलन करणार असल्याचे रुचिता नाईक यांनी स्पष्ट केले.