अवैध वाळू माफियांवर ठाणे जिल्हा प्रशासनाचा सर्जिकल स्ट्राईक; १० बार्ज, १६ सक्शन पंप जप्त, ३.६० कोटींचा मुद्देमाल उद्ध्वस्त !!

अवैध वाळू माफियांवर ठाणे जिल्हा प्रशासनाचा सर्जिकल स्ट्राईक; १० बार्ज, १६ सक्शन पंप जप्त, ३.६० कोटींचा मुद्देमाल उद्ध्वस्त !!

*भिवंडी, अरुण पाटील, दि. २९ :* जिल्हाधिकारी श्रीकृष्ण पांचाळ आणि अपर जिल्हाधिकारी हरिश्चंद्र पाटील यांच्या मार्गदर्शनाखाली ठाणे जिल्हा प्रशासनाने अवैध वाळू उत्खननावर आजवरची सर्वात मोठी कारवाई केली आहे.

भिवंडी तालुक्यातील दिवे-केवणी (दिवे बंदर) खाडीपात्रात महसूल विभाग, जिल्हा खनिकर्म विभाग, दक्षता पथक, पोलीस आणि महाराष्ट्र सागरी मंडळ यांच्या संयुक्त पथकाने मध्यरात्री छापा टाकून *१० बेकायदेशीर बार्ज आणि १६ सक्शन पंप जप्त केले.* सुमारे ३.५० ते ३.६० कोटी रुपयांचा मुद्देमाल नष्ट करण्याची कारवाई सुरू आहे.

सोमवार २८ सप्टेंबर रात्रीपासून सुरू झालेली ही मोहीम मंगळवार २९ सप्टेंबर पहाटे २.४५ वाजता निर्णायक ठरली. जिल्हा खनिकर्म अधिकारी विवेक घुले यांच्या नेतृत्वाखाली दक्षता पथक १ व २, ठाणे तहसीलदार उमेश पाटील, भिवंडी तहसीलदार अभिजीत खोले यांचे पथक दिवे-केवणी स्मशानभूमीजवळ गस्त घालत असताना हा प्रकार उघडकीस आला.

पथकाची चाहूल लागताच कामगारांनी बार्ज व सक्शन पंपाचे व्हॉल्व्ह उघडून ते पाण्यात बुडवण्याचा प्रयत्न केला. पळून जाताना बार्जने खाडीतील कांदळवनाला धडक देऊन पर्यावरणाचे नुकसानही केले. बहुतांश कामगारांनी पाण्यात उड्या मारून पलायन केले, मात्र *तोहीब रमझान शेख (वय १९, रा. झारखंड)* याला पकडण्यात यश आले. त्याला पोलीस स्वाधीन करण्यात आले आहे.

जप्त केलेले १० ही बार्ज महाराष्ट्र मेरीटाईम बोर्डाकडे नोंदणीकृत नसल्याचे स्पष्ट झाले आहे.

ओहोटीची वाट पाहून अधिकाऱ्यांनी स्वतः खाडीपात्रात उतरून बार्जचे व्हॉल्व्ह बंद करून ते पुन्हा तरंगते केले. त्यानंतर भरतीच्या वेळी बोटींच्या सहाय्याने हे बार्ज कळव्यातील गणेश घाट आणि मुंब्रा येथे हलवून स्क्रॅप (नष्ट) करण्याची प्रक्रिया पार पाडली. मुद्देमालाचा ताबा खारबावचे मंडळ अधिकारी सुधाकर कामडी यांच्याकडे देण्यात आला आहे.

या प्रकरणी भारतीय न्याय संहिता, पर्यावरण संरक्षण कायदा आणि महसूल अधिनियमांतर्गत भिवंडी व मुंब्रा पोलीस ठाण्यात गुन्हे दाखल करण्याची प्रक्रिया सुरू आहे. यापुढेही अवैध वाळू उत्खननाविरोधात झिरो टॉलरन्स कारवाई सुरू राहील, असा इशारा प्रशासनाने दिला आहे.

या मोहिमेत उपविभागीय अधिकारी अमित सानप, उर्मिला पाटील, तहसीलदार अभिजीत खोले, उमेश पाटील, मंडळ अधिकारी सुधाकर कामडी, तलाठी सूर्यकांत पाटील तसेच सहाय्यक महसूल अधिकारी संजय जाधव, दिनेश बोऱ्हाडे, दर्शन नटे, अनिल राजपूरे, पोलीस शिपाई संदीप शिसोदे, मारुती यमगार यांनी महत्त्वपूर्ण योगदान दिले.