डोंबिवलीतील ज्येष्ठ रहिवासी दत्तात्रय गाडेकर यांचे निधन !!

डोंबिवलीतील ज्येष्ठ रहिवासी दत्तात्रय गाडेकर यांचे निधन !!

*डोंबिवली :* एमआयडीसी निवासी, मिलापनगर येथील सर्वात वयोवृद्ध आणि डोंबिवलीतील जुने जाणते रहिवासी दत्तात्रय किसनराव गाडेकर (वय ९६) यांचे अल्पशा आजाराने बुधवारी पहाटे त्यांच्या निवासस्थानी निधन झाले.

गाडेकर हे रेल्वेच्या ठाकुर्ली पॉवर हाऊसमध्ये ३६ वर्षे सेवा करून सेवानिवृत्त झाले होते. चांदीच्या अत्तरदाण्या बनवण्यात त्यांचा हातखंडा होता आणि त्या कामात ते कुशल कारागीर म्हणून ओळखले जात होते. ते सन १९५२ पासून डोंबिवलीत राहत होते.

रोज सकाळ-संध्याकाळ फिरणे हा त्यांचा नित्यक्रम होता. फिरताना लहानांपासून मोठ्यांपर्यंत सर्वांशी प्रेमाने, आपुलकीने चौकशी करणारे हसतमुख व्यक्तिमत्व म्हणून त्यांची सर्वपरिचित ओळख होती. त्यांच्या जाण्याने निवासी परिसरात, विशेषतः सकाळ-संध्याकाळ फिरणाऱ्या नागरिकांमध्ये हळहळ व्यक्त होत आहे.

त्यांच्या पश्चात तीन मुले, सुना, नातवंडे, पणतवंडे असा मोठा परिवार आहे. मिलापनगरमधील बंगल्यात ते तीन मुलांसह एकत्र कुटुंब पद्धतीने राहत होते.

त्यांच्यावर आज दुपारी पाथर्ली स्मशानभूमीत अंत्यसंस्कार करण्यात आले. यावेळी डोंबिवलीतील अनेक प्रतिष्ठित नागरिक उपस्थित होते.

जेष्ठ नागरिक व सामाजिक कार्यकर्ते राजू नलावडे (डोंबिवली) यांनी भावपूर्ण श्रद्धांजली अर्पण केली आहे.