जागतिक श्वानदंश दिनानिमित्त डोंबिवलीत जनजागृती वॉकेथॉन व चर्चासत्र !!

जागतिक श्वानदंश दिनानिमित्त डोंबिवलीत जनजागृती वॉकेथॉन व चर्चासत्र !!

*डोंबिवली, राजू नलावडे: रोटरी क्लब ऑफ डोंबिवली मिडटाऊन आणि व्हेटर्नरी प्रॅक्टिशनर्स वेलफेअर असोसिएशनतर्फे जागतिक श्वानदंश दिनानिमित्त (२८ सप्टेंबर) जनजागृती वॉकेथॉन व चर्चासत्राचे आयोजन करण्यात आले होते.

या अंतर्गत ६ ते १२ आणि २५-२६ सप्टेंबर दरम्यान भटक्या कुत्रा/मांजरांसाठी मोफत अँटी-रेबीज लसीकरण मोहीम राबवण्यात आली. केडीएमसी व दानशूर व्यक्तींच्या सहकार्याने २३९७ भटके कुत्रे व २०६ मांजरे अशा एकूण २६०३ जनावरांचे लसीकरण करण्यात आले. गेल्या १५ वर्षांतील ही सर्वाधिक संख्या आहे. ही मोहीम डोंबिवली पूर्व-पश्चिम, एमआयडीसी निवासी, रिजेन्सी अनंतम, पलावा, रुणवाल परिसरात राबवण्यात आली.

सोमवारी २८ सप्टेंबर रोजी सकाळी ८ वाजता वंदेमातरम उद्यान, मिलापनगर येथून वॉकेथॉनला सुरुवात झाली. मिलापनगर रस्ता क्र. २, सिस्टर निवेदिता स्कूल, औदुंबर कट्टा, घरडा सर्कल मार्गे डोंबिवली जिमखाना येथे त्याचा समारोप झाला. यात विविध शाळा-महाविद्यालयांचे विद्यार्थी, रोटरियन, सायकल सखी ग्रुप, प्राणीमित्र व नागरिक सहभागी झाले होते.

त्यानंतर सकाळी १०.१५ ते १२ वाजता डोंबिवली जिमखाना सभागृहात चर्चासत्र झाले. यावेळी सहभागी संस्था व प्राणीप्रेमींचा सन्मान करण्यात आला.

याप्रसंगी केडीएमसी आयुक्त अभिनव गोयल, नगरसेविका खुशबू चौधरी, डिस्ट्रिक्ट गव्हर्नर डॉ. निलेश जयवंत, असिस्टंट गव्हर्नर संजय तांबे, मिडटाऊनचे अध्यक्ष किशोर अढळकर, सचिव गणेश डोयफोडे, प्रकल्प प्रमुख डॉ. मनोहर अकोले उपस्थित होते. सूत्रसंचालन डॉ. मकरंद गणपुले यांनी केले. डॉ. अकोले यांनी केलेल्या मागण्या मान्य करून लवकरच कार्यवाही करण्याचे आश्वासन आयुक्तांनी दिले.