रोटरी क्लब चोपडातर्फे गूळ नदी स्वच्छता मोहीम उत्साहात संपन्न; पर्यावरण रक्षणाचा दिला संदेश !!

रोटरी क्लब चोपडातर्फे गूळ नदी स्वच्छता मोहीम उत्साहात संपन्न; पर्यावरण रक्षणाचा दिला संदेश !!

चोपडा, प्रतिनिधी :

नुकत्याच पार पडलेल्या गणेशोत्सवानंतर तालुक्यातील नद्यांमध्ये गणपती विसर्जनामुळे पीओपीच्या मूर्तींचे अवशेष, निर्माल्य आणि प्लास्टिकच्या पिशव्या मोठ्या प्रमाणात साचून प्रदूषण झाले होते. या समस्येचे निर्मूलन करण्यासाठी आणि नदीचे जलप्रदूषण रोखण्यासाठी रोटरी क्लब चोपडा तर्फे "गूळ नदी स्वच्छता प्रकल्प" हा अभिनव व स्तुत्य उपक्रम राबविण्यात आला. रोटरीच्या "पर्यावरण संरक्षण" या मूलभूत तत्त्वाला अनुसरून हा सेवाभावी उपक्रम उत्साहात पार पडला.

विशेष बाब म्हणजे गूळ नदीचे पाणी चोपडा तालुक्यासह इतर काही तालुक्यांनाही पिण्याच्या पाण्यासाठी पुरविले जाते. ही माहिती समजल्यानंतर रोटरी क्लब चोपडाच्या पदाधिकाऱ्यांनी तातडीने नदी परिसराची पाहणी केली. पाहणीदरम्यान नदीपात्रामध्ये मोठ्या प्रमाणावर प्लास्टिक कचरा, निर्माल्य तसेच पीओपीच्या गणेशमूर्तींचे अवशेष आढळून आले. अनेक ठिकाणी नदीपात्र हे या कचऱ्याने भरून गेलेले दिसून आले. पिण्याच्या पाण्याच्या स्रोताची अशी अवस्था पाहून रोटरी क्लबने त्वरित स्वच्छता मोहीम राबविण्याचा निर्णय घेतला.

गणेश विसर्जनानंतर नदीपात्राची झालेली दुरवस्था लक्षात घेऊन रोटरी क्लब चोपडाने सामाजिक व पर्यावरणीय जबाबदारीतून या मोहिमेला सुरुवात केली. रोटरीच्या सर्व सदस्यांनी व स्थानिक नागरिकांनी एकत्र येत गूळ नदीपात्रातील पीओपी मूर्तींचे अवशेष, निर्माल्य आणि प्लास्टिक कचरा संकलित करून परिसर स्वच्छ व प्रदूषणमुक्त केला. या मोहिमेमुळे नदीपात्राने पुन्हा एकदा मोकळा श्वास घेतला.

यावेळी रोटरी क्लब चोपडाच्या वतीने नागरिकांना शाडू मातीच्या व पर्यावरणपूरक गणेशमूर्तींचा वापर करण्याचे, निर्माल्याचे योग्य व्यवस्थापन करण्याचे तसेच प्लास्टिकचा वापर व प्लास्टिक प्रदूषण टाळण्याचे आवाहन करण्यात आले. श्रद्धा आणि पर्यावरण यांचा समतोल राखत सण साजरे करणे ही काळाची गरज असून, पर्यावरण संवर्धनासाठी प्रत्येक नागरिकाने आपली जबाबदारी ओळखून योगदान द्यावे, असेही आवाहन करण्यात आले.

रोटरी क्लब चोपडा हे सदैव पर्यावरण संरक्षणाबाबत जागरूक राहिले असून, अशा प्रकारच्या लोककल्याणकारी व निसर्गपूरक प्रकल्पांमुळे रोटरी क्लबच्या या उपक्रमाचे चोपडा तालुक्यातील विविध क्षेत्रांतून आणि समाजाच्या सर्व स्तरांतून मोठे कौतुक करण्यात येत आहे.

या स्वच्छता मोहिमेत रोटरी क्लब चोपडाचे अध्यक्ष रोटे. संजय बारी, मानद सचिव रोटे. लीना पाटील, सहसचिव रोटे. चंद्रशेखर साखरे, प्रकल्प मार्गदर्शक रोटे. नितीन अहिरराव, प्रकल्प प्रमुख रोटे. शशिकांत पाटील व रोटे. मनोज पाटील, तसेच रोटे. विलास कोष्टी, रोटे. प्रदीप पाटील, रोटे. संदेश क्षीरसागर, रोटे. विलास पी. पाटील, रोटे. निखिल सोनवणे, रोटे. संदीप सूर्यवंशी, रोटे. वसंत नागपुरे, रोटे. विश्वास दलाल यांच्यासह रोटरी क्लबचे सर्व पदाधिकारी, सदस्य आणि स्थानिक नागरिक मोठ्या संख्येने सहभागी झाले होते.

"स्वच्छ नदी, निरोगी पर्यावरण" या मूळ उद्देशाला धरून राबविण्यात आलेला हा प्रकल्प सर्वांच्या उत्स्फूर्त सहभागामुळे अत्यंत यशस्वीरीत्या पार पडला. पर्यावरण संवर्धनासाठी समाजातील प्रत्येक घटकाने पुढाकार घेण्याची गरज असल्याचा संदेश या उपक्रमातून देण्यात आला.