फेरीवाला हटाव सह पथक प्रमुखावर हप्तेखोरीचा आरोप !!
*डोंबिवली, विनोद गिरी:* 'फ' प्रभाग क्षेत्र, कल्याण डोंबिवली महानगरपालिका हद्दीत स्टेशन परिसर ते 90 फूट रोड, ठाकुर्ली परिसरात फेरीवाल्यांकडून हप्ता वसुली केली जात असल्याचा गंभीर आरोप करण्यात आला आहे.
छोटे फळ विक्रेते, भाजी विक्रेते आणि इतर फेरीवाल्यांनी सेफ्टी वेल्फेअर असोसिएशनचे संस्थापक अध्यक्ष विशाल शेटे यांच्याकडे तक्रार केली आहे. 'फ' प्रभागात कार्यरत असलेले फेरीवाला हटाव सह पथक प्रमुख वेदपाल तीसांबर हे दरमहा ठराविक रकमेची मागणी करतात. पैसे न दिल्यास माल जप्ती आणि तोडक कारवाईची धमकी देऊन पुन्हा धंदा करू दिला जाणार नाही, अशी भीती दाखवून आर्थिक व मानसिक त्रास दिला जात असल्याचा आरोप फेरीवाल्यांनी केला आहे.
तसेच ठाकुर्ली येथे बांबूचे शेड उभारून अनधिकृत चिकन सेंटर सुरू आहेत. त्यांच्याकडून रोज मोफत चिकन घेऊन जाणे आणि दरमहा मोठ्या रकमेचा हप्ता मागितला जात असल्याचेही तक्रारीत म्हटले आहे. उपजीविकेच्या भीतीने फेरीवाले उघडपणे तक्रार करण्यास धजावत नसल्याचे सांगण्यात आले.
वेदपाल तीसांबर हे मूळचे सफाई कामगार असून सध्या त्यांची नेमणूक 'फ' प्रभागात फेरीवाला सह पथक प्रमुख म्हणून करण्यात आली आहे. या पदाचा गैरवापर करून ते हप्ते मागत असल्याची लेखी तक्रार विशाल शेटे यांनी 'फ' प्रभाग क्षेत्र अधिकारी आणि आयुक्त अभिनव गोयल यांच्याकडे केली आहे.
वेदपाल तीसांबर यांना तातडीने या पदावरून हटवून कमी जबाबदारीच्या विभागात बदली करावी आणि त्यांची निष्पक्ष चौकशी करावी, अशी मागणी शेटे यांनी केली आहे. प्रशासनाने लवकर कायदेशीर पावले उचलली नाहीत तर सामान्य डोंबिवलीकरांच्या न्याय हक्कासाठी तीव्र आंदोलन छेडले जाईल, असा इशारा सेफ्टी वेल्फेअर असोसिएशनने दिला आहे.
"डोंबिवली स्टेशन परिसरातील फुटपाथ मोकळे करायचे असतील तर असे हप्तेखोर अधिकारी नेमून कसे चालेल? हेच पैसे घेऊन अभय देत असतील तर अशा कर्मचाऱ्यांचे तातडीने निलंबन करावे," अशी ठाम भूमिका विशाल शेटे यांनी मांडली आहे.
No comments:
Post a Comment