राज्यातील सर्व शाळांमध्ये १८ ते ३१ ऑक्टोबर दरम्यान विशेष स्वच्छता मोहीम !!

राज्यातील सर्व शाळांमध्ये १८ ते ३१ ऑक्टोबर दरम्यान विशेष स्वच्छता मोहीम !!

*मुंबई :* राज्यातील सर्व शाळांमध्ये १८ ते ३१ ऑक्टोबर २०२६ या कालावधीत ‘चला शाळेत जाऊ या... विशेष शालेय स्वच्छता मोहीम’ राबवण्याचा निर्णय शासनाने घेतला आहे. यासंदर्भातील परिपत्रक शालेय शिक्षण विभागाने १६ ऑक्टोबर २०२६ रोजी जारी केले आहे.

शाळा व्यवस्थापन समिती, शिक्षक, विद्यार्थी, पालक, माजी विद्यार्थी, ग्रामस्थ आणि स्थानिक समुदायाच्या सहभागातून शाळांची स्वच्छता, सुशोभीकरण आणि देखभाल करून शैक्षणिक वातावरण अधिक पोषक करणे, हा या मोहिमेचा उद्देश आहे.

शाळा परिसर स्वच्छ, सुंदर, सुरक्षित आणि आनंददायी ठेवण्यासोबतच विद्यार्थ्यांमध्ये स्वच्छता, पर्यावरण संवर्धन, श्रमप्रतिष्ठा, सामाजिक जबाबदारी आणि शिस्तीची भावना रुजवणे, हा देखील हेतू आहे. समग्र शिक्षा योजनेंतर्गत शाळांमध्ये आवश्यक मूलभूत सुविधा आणि अनुकूल वातावरण निर्माण करण्याच्या प्रयत्नांना या मोहिमेमुळे चालना मिळणार आहे.

‘माझी शाळा - माझी जबाबदारी’ या भावनेतून या मोहिमेत शाळा व्यवस्थापन समिती, शिक्षक, पालक, माजी विद्यार्थी संघ, ग्रामस्थ, स्थानिक लोकप्रतिनिधी, स्वयंसेवी संस्था तसेच उपलब्धतेनुसार सीएसआर आणि स्थानिक सामाजिक संस्थांचा सक्रिय सहभाग घेतला जाणार आहे. मोहिमेच्या शाळास्तरीय अंमलबजावणीची संपूर्ण जबाबदारी मुख्याध्यापकांवर राहणार आहे.