महापालिकेचे स्वतःचे मोरबे धरण असताना दिघ्यावर अन्याय का? दिघ्याला मोरबे धरणाचे पाणी द्या !
सामाजिक कार्यकर्ते योगेश शिंदे यांचे आयुक्त व महापौरांना निवेदन दिघावासीयांना शुद्ध पाणीपुरवठा करण्याची मागणी
दिघा, प्रतिनिधी :- नवी मुंबई महानगरपालिकेचे स्वतःच्या मालकीचे मोरबे धरण असताना दिघा विभागातील नागरिकांना मोरबे धरणाचे शुद्ध पाणी का दिले जात नाही? दिघा विभागावर अन्याय का केला जात आहे? असा सवाल उपस्थित करत दिघा विभागाला मोरबे धरणाचे पाणी तातडीने उपलब्ध करून द्या, अशी मागणी सामाजिक कार्यकर्ते योगेश शिंदे यांनी नवी मुंबई महानगरपालिका आयुक्त व महापौर यांच्याकडे निवेदनाद्वारे केली आहे.
नवी मुंबई महानगरपालिकेचे स्वतःचे मोरबे धरण असताना त्याचा लाभ दिघा विभागातील नागरिकांनाही मिळणे अपेक्षित आहे. मात्र, दिघा विभागातील नागरिकांना शुद्ध व मुबलक पाण्यासाठी प्रतीक्षा करावी लागत असल्याची परिस्थिती आहे. महापालिकेच्या मालकीचे धरण असतानाही दिघा विभागातील नागरिकांना त्याचा लाभ मिळत नसेल, तर हा दिघा विभागातील नागरिकांवर अन्याय नाही का? असा प्रश्न योगेश शिंदे यांनी उपस्थित केला आहे.
दिघा विभागातील काही परिसरांत होणारा पाणीपुरवठा अत्यंत खराब दर्जाचा असून पाण्याचा रंग पिवळसर आहे. तसेच पाण्याची चव रासायनिक पदार्थ मिसळल्याप्रमाणे जाणवत असल्याच्या तक्रारी नागरिकांकडून करण्यात येत आहेत. यामुळे नागरिकांच्या आरोग्याला धोका निर्माण होण्याची शक्यता आहे. त्यामुळे संबंधित पाण्याचे नमुने प्रयोगशाळेत तपासून दूषित पाणीपुरवठ्याचे कारण शोधावे आणि तातडीने सुरक्षित पाण्याची व्यवस्था करावी, अशी मागणीही निवेदनात करण्यात आली आहे.
दिघा विभागातील नागरिकांनाही नवी मुंबईतील इतर नागरिकांप्रमाणे शुद्ध, सुरक्षित आणि मुबलक पाणी मिळण्याचा अधिकार आहे. त्यामुळे मोरबे धरणाचे पाणी दिघा विभागाला उपलब्ध करून देण्यासाठी आवश्यक तांत्रिक सर्वेक्षण, निधीची तरतूद व प्रशासकीय मंजुरी तातडीने पूर्ण करावी. याबाबत केवळ आश्वासने न देता निश्चित कालमर्यादा जाहीर करून प्रत्यक्ष अंमलबजावणी करावी, अशी आग्रही मागणी योगेश शिंदे यांनी केली आहे.
"महापालिकेचे स्वतःचे मोरबे धरण असताना दिघा विभागातील नागरिकांना शुद्ध पाण्यापासून वंचित का ठेवले जात आहे? दिघ्यावर अन्याय नको, दिघ्याला मोरबे धरणाचे पाणी द्या!" अशी भूमिका सामाजिक कार्यकर्ते योगेश शिंदे यांनी निवेदनातून मांडली आहे.