रशिया- युक्रेन युद्धानंतर राज्यात हालचालींना वेग, मुख्यमंत्र्यांनी 'दिल्या' या सूचना !!
भिवंडी, दिं,24, अरुण पाटील (कोपर) :
रशियाने युक्रेन देशावर हल्ले सुरू केल्यानंतर दोन देशांमध्ये युद्ध सुरू झाले आहे. याची चिंता संपूर्ण जगाला लागली असून या दोन्ही देशांमधील नागरिकांचे जीवन धोक्यात आले आहे. युक्रेनमध्ये भारतातील अनेक नागरिक कामानिमित्त तेथे राहत असून त्या भारतीयांमध्ये महाराष्ट्रातील नागरिकांचाही समावेश आहे. भारतातील नागरिकांसह महाराष्ट्रातील नागरिकांची चिंता राज्य सरकारला असून त्यांच्या सुरक्षेसाठी मुख्यमंत्री उद्धव ठाकरे यांनी पावले उचलायला सुरुवात केली आहे.
युक्रेनमधील युद्ध परिस्थिती पाहता महाराष्ट्रातील जे नागरिक युक्रेनमध्ये अडकले आहेत. त्यांची तिथे काय व्यवस्था आहे ते पाहण्याच्या तसेच त्यांना परत महाराष्ट्रात सुखरूप घेऊन येण्यासाठी परराष्ट्र मंत्रालयाशी व्यवस्थित समन्वय साधावा, विशेषत: महाराष्ट्रातील जे विद्यार्थी युक्रेनमध्ये आहेत त्यांची काळजी घेण्याविषयी मुख्यमंत्री उद्धव ठाकरे यांनी प्रशासनाला प्राधान्याने केंद्राशी बोलावे असे सांगितले आहे.
रशियाने युक्रेनवर हल्ला केल्याच्या पार्श्वभूमीवर महाराष्ट्रातून उद्योग , शिक्षण, व्यवसायनिमित्त तिथे गेलेल्या नागरिकांच्या सुरक्षिततेबाबत मुख्यमंत्र्यांनी चिंता व्यक्त केली आहे. या परिस्थितीच्या पार्श्वभूमीव मुख्य सचिवांनी केंद्र शासनाशी समन्वय साधून या नागरिकांशी सातत्याने संपर्कात राहावे, अशा सूचना मुख्यमंत्री ठाकरे यांनी केल्या आहेत.
रशियाच्या युक्रेनवरील हल्ल्यांना युक्रेनही प्रत्युत्तर देत आहे. रशियाच्या हल्ल्यांमुळे युक्रेनमधील अनेक शहरांत युद्धाचा भडका उडाला आहे. या युद्धात आतापर्यंत किमान १०० नागरिक ठार झाल्याचे वृत्त असून त्यात रशियाच्या ५० सैनिकांचा समावेश असल्याची माहिती मिळत आहे. तसेच या युद्धात युक्रेनचे ४० सैनिक मारले गेले आहेत. या युद्धामुळे युक्रेन देशाचे दहा नागरिक ठार झाले प्राथमिक माहिती हाती आली आहे.
रशियाच्या या भीषण हल्ल्यानंतर युक्रेनने 'चाणक्य' आणि 'महाभारता'चा उल्लेख करत भारताचे पंतप्रधान नरेंद्र मोदी यांनी मदत करावी असे आवाहन केले आहे. रशिया आणि भारताचे अनेक दशकांपासून चांगले संबंध आहेत. तसेच रशियाचे अध्यक्ष व्लादिमीर पुतीन यांच्याशी पंतप्रधान मोदींचेही चांगले संबंध आहेत. हे पाहता हे युद्ध थांबवण्यासाठी पंतप्रधान मोदी यांनी पुढाकार घ्यावा अशी इच्छा युक्रेनने व्यक्त केली आहे.
No comments:
Post a Comment