महात्मा जोतिबा फुले यांचा पुतळा परिसर बनला 'पे अँड पार्किंग चे ठिकाण, कल्याण महानगरपालिकेचे दुर्लक्ष ?

महात्मा जोतिबा फुले यांचा पुतळा परिसर बनला 'पे अँड पार्किंग चे ठिकाण, कल्याण महानगरपालिकेचे दुर्लक्ष ?

कल्याण, (संजय कांबळे) : कल्याण पश्चिमेकडील कल्याण न्यायालयाला लागून असलेला महात्मा जोतिबा फुले यांचा अर्धपुतळा सध्या अनाधिकृत पे अँड पार्किंगचे ठिकाण बनले असून यामुळे हा समाजसुधारक, राष्ट्रपुरुषांचा अपमान नाही कां? असा प्रश्न उपस्थित केला जात आहे.

श्री सावता माळी मंडळ कल्याण या संस्थेने इ स १९६३ साली कल्याण मुरबाड रोड च्या बाजूला व न्यायालयाला लागून महात्मा जोतिबा फुले यांचा अर्धपुतळा उभारुन पुढील सुव्यवस्थेसाठी कल्याण नगरपालिकेच्या स्वाधीन केला. या पुतळ्याचे अनावरण कृष्णराव धुळूप, विरोधी पक्षनेते महाराष्ट्र विधानसभा यांच्या हस्ते तर  के ,टी, गिरमे, उपसभापती, विधानसभा, महाराष्ट्र राज्य, यांच्या प्रमुख उपस्थितीत झाले होते. पुतळयाची प्रतिष्ठापना नामदेव आहेर, अध्यक्ष, कल्याण नगरपालिका परिषद, यांच्या हस्ते १९७४ मध्ये करण्यात आली आणि वरील मेघडंबरीचे काम तत्कालीन नगरसेवक कै. प्रकाश पेणकर यांच्या निधीतून केले, या लोकार्पण सोहळ्यास शहर प्रमुख अरविंद मोरे हे उपस्थित होते.

कल्याण डोंबिवली महानगरपालिकेच्या हद्दीत आणि भारतरत्न डॉ बाबासाहेब आंबेडकर यांच्या पुर्णाकृती पुतळ्याचे समोर कल्याण न्यायालयाला लागूनच महात्मा जोतिबा फुले यांचा अर्धपुतळा बसविण्यात आले आहे या परिसराला महात्मा फुले चौक असे नामकरण ही करण्यात आले आहे. स्टेशन परिसरात हा पुतळा असल्याने येथे सतत वाहनाची वर्दळ सुरू असते. या चौकातून एक रस्ता छ. शिवाजी महाराज चौक, महानगरपालिका मुख्यालय, तर दुसरा रस्ता स्टेशन, कल्याण बाजार समिती, डोंबिवली कडे जातो, सध्या या परिसरात मोठ्या प्रमाणात कामे सुरू असल्याने वाहतूक कोंडी चे तीनतेरा वाजलेले असतात, लोकांना चालणे मुश्कील होऊन जाते.

विशेष म्हणजे, कल्याण डोंबिवली महापालिकेने नुकतेच बांधलेल्या सुसज्ज अशा कै दिलीप कपोते, पे अँड पार्किंग वाहनतळाचे उद्घाटन मुख्यमंत्री एकनाथ शिंदे यांचा हस्ते झाले होते, ते सुरू देखील झाले असताना महात्मा फुले यांच्या पुतळ्याशेजारी रस्त्यावर पार्किंग कशासाठी? असा सवाल उपस्थित केला जात आहे.महात्मा फुले चौकात इतकी वाहने पार्किंग केली आहेत की येथे पुतळा आहे हेच कळत नाही, दिसत नाही.

महात्मा जोतिबा फुले यांनी शैक्षणिक क्षेत्रात क्रांतिकारी कार्य केले, समाजसुधारकामध्ये ते देशात अग्रस्थानी असून, त्यांच्या पुतळ्यामुळे नवीन पिढीला प्रेरणा, उर्जा, शक्ती, दिशा मिळत असताना आणि त्याहीपेक्षा दोनतीन दिवसावर त्यांची 'जयंती, उत्सव आला असताना त्यांच्या पुतळ्याला अशा अनाधिकृत पार्किंग चा वेढा पडला आहे हा त्यांचा अपमान नाही का? याकडे महानगरपालिका प्रशासन, वाहतूक पोलीस, आणि स्वतः ला या भागाचे लोकप्रतिनिधी म्हणवून घेणारे यांनी सोईस्कर दुर्लक्ष केले आहे. असेच दिसते.